"சோப்ளாங்கி அரசு"..! சொந்த புத்தியும் இல்ல.. சொல் புத்தியும் இல்ல.! தவெகவை வெளுத்த ஸ்டாலின்..!!

தமிழகத்தில் சட்டம் ஒழுங்கு நிலைமை கடுமையாக சீர்கெட்டு வருவதாகக் குற்றம்சாட்டி திமுக தலைவர் மு.க. ஸ்டாலின் கடும் விமர்சனம் தெரிவித்துள்ளார். பட்டப்பகலில் வெட்டவெளியில் கொலைகள் தொடர்வதாகவும், சேலத்தில் பொது இடத்திலேயே பகல் நேரத்தில் கொலை நடந்திருப்பதாகவும் அவர் சுட்டிக்காட்டினார். மதுரையில் காணாமல் போன சிறுவன் பின்னர் சடலமாக மீட்கப்பட்டதையும், செஞ்சியில் மாயமான சிறுமியின் விவகாரம் இன்னும் மர்மமாகத் தொடர்வதையும் குறிப்பிட்ட அவர், இவை மாநிலத்தின் சட்டம் ஒழுங்கு நிர்வாகத்தில் உள்ள குறைபாடுகளை வெளிப்படுத்துவதாகக் கூறினார்.

த.வெ.க. ஆட்சியில் குற்றவாளிகளுக்கு சுதந்திரமாக செயல்படும் சூழல் ஏற்பட்டுள்ளதாகவும், அவர்கள் அச்சமின்றி குற்றச் செயல்களில் ஈடுபடுவதாகவும் ஸ்டாலின் குற்றம்சாட்டினார். தினமும் கொலைகளை எண்ணும் கொடிய நிலையில் தமிழகம் இருப்பதாகக் குறிப்பிட்ட அவர், சட்டம் ஒழுங்குக்கும் தனக்கும் சம்பந்தமில்லை என்பது போல முதலமைச்சர் ஏன் மவுனமாக இருக்கிறார் எனக் கேள்வி எழுப்பினார். சட்டம் ஒழுங்கு பற்றி வாய் கிழியப் பேசுவதில் வல்லவரான முதலமைச்சர் இப்போது ஏன் வாயே திறப்பதில்லை என்றும் வினவினார்.இந்த சீர்கேட்டைக் கண்டித்து வரும் அக்டோபர் 31 ஆம் தேதி தமிழ்நாடு முழுவதும் திமுக மகளிர் அணி சார்பில் ஆர்ப்பாட்டம் நடத்தப்படும் என ஸ்டாலின் அறிவித்தார்.

இந்த ஆர்ப்பாட்டம் தறிகெட்டு ஓடும் த.வெ.க. அரசுக்கு ஒரு விழிப்புணர்வு அழைப்பு என்றும், முதலமைச்சரையும் தூங்கி வழியும் ஆட்சி நிர்வாகத்தையும் எழுப்ப முயற்சிப்போம் என்றும், ஆளத் தெரியாத அரசுக்குப் பாடம் புகட்டுவோம் என்றும் அவர் வலியுறுத்தினார்.சொந்த புத்தியும் இல்லாமல், சொல் புத்தியும் இல்லாமல் சட்டம்-ஒழுங்கைச் சீரழித்துவிட்ட சோப்ளாங்கி த.வெ.க. அரசு என அவர் தனது அறிக்கையில் குறிப்பிட்டார். கடந்த சில மாதங்களாக கொலை, கொள்ளை, பாலியல் வன்கொடுமை மற்றும் சிறுவர்கள் மாயமாகும் சம்பவங்கள் அதிகரித்துள்ளதால் பொதுமக்கள் பீதியில் உறைந்து போயுள்ளதாகவும் அவர் தெரிவித்தார்.

இதையும் படிங்க: 119-வது தேவர் ஜெயந்தி… 64-வது குருபூஜை.! ஸ்டாலின் மரியாதை..!! மதுரையில் குவியும் அரசியல் தலைவர்கள்.!

தனது சொகுசைப் பற்றி இருக்கும் அக்கறையில் சிறிதேனும் பொதுமக்கள் மற்றும் குழந்தைகளின் பாதுகாப்பில் முதலமைச்சருக்கு இருக்க வேண்டும் என்றும், கொலைக்களமாகவும் குற்றவாளிகளின் வேட்டைக்காடாகவும் தமிழ்நாடு மாறி வருவதைத் தடுக்க வேண்டும் என்றும் அழைப்பு விடுத்தார்.இந்த விமர்சனங்கள் த.வெ.க. ஆட்சி தொடங்கிய சில மாதங்களுக்குள் வருவது குறிப்பிடத்தக்கது. ஆட்சிப் பொறுப்பேற்ற பிறகு சட்டம் ஒழுங்கு சீர்கேடு அதிகரித்துள்ளதாக எதிர்க்கட்சித் தரப்பில் குற்றச்சாட்டுகள் எழுந்துள்ள நிலையில், திமுக மகளிர் அணியின் மாநில அளவிலான ஆர்ப்பாட்டம் இந்தப் பிரச்சினையை முன்னிலைப்படுத்தும் முயற்சியாக அமைந்துள்ளது. ஸ்டாலின் தனது அறிக்கையில் ஆட்சி நிர்வாகத்தின் செயலற்ற தன்மையை வலியுறுத்தி, மக்களின் பாதுகாப்பை உறுதி செய்யும் வகையில் உடனடி நடவடிக்கை தேவை என்பதை வலியுறுத்தியுள்ளார்.

இதையும் படிங்க: 2538 பணியிட ஊழல், ஹவாலா பணம்: கே.என்.நேரு தொடர்புடைய இடங்களில் 170 ஆவணங்கள் பறிமுதல்!