பிணவறையிலும் அலட்சியம்... நிர்வாக சீர்கேடு..! திமுகவை விளாசிய தவெக..!!

திமுக அரசின் நிர்வாகச் சீர்கேடு உச்சமாக பிணவறையிலும் அலட்சியம் தொடர்வதாக தமிழக வெற்றி கழகம் தெரிவித்துள்ளது. மதுரை அரசு இராஜாஜி மருத்துவமனையில் உயிரிழந்தவர்களின் உடல்களை மாற்றி ஒப்படைத்திருக்கும் செய்தி, தமிழக அரசு மருத்துவமனைகளின் தற்போதைய அவல நிலையைத் தோலுரித்துக் காட்டியுள்ளது என்று கூறியது. 'விடியல் அரசு' என்று தம்பட்டம் அடித்துக் கொள்ளும் திமுக ஆட்சியில், உயிருடன் இருப்பவர்களுக்குத் தான் பாதுகாப்பு இல்லை என்றால், உயிரிழந்தவர்களின் உடல்களுக்குக் கூடக் குறைந்தபட்ச கண்ணியம் வழங்கப்படுவதில்லை என்பது வேதனைக்குரியது என்று தெரிவிக்கப்பட்டு உள்ளது.

கரூர் மாவட்டத்தைச் சேர்ந்த ஆனந்தராஜ் என்பவரின் உடலுக்குப் பதிலாக, விருதுநகரைச் சேர்ந்த தேவேந்திரன் என்பவரின் உடலை உறவினர்களிடம் ஒப்படைத்திருப்பது சாதாரணத் தவறு கிடையாது என்றும் இது மருத்துவமனை நிர்வாகத்தின் ஒட்டுமொத்தப் பொறுப்பற்றத் தன்மையையும், கண்காணிப்புக் குறைபாட்டையும் காட்டுகிறது எனவும் கூறியுள்ளது. சொந்த ஊருக்கு உடலை எடுத்துச் சென்று, இறுதிச் சடங்குகள் செய்யத் தயாரான நிலையில், அது வேறு ஒருவரின் உடல் எனத் தெரியவந்தபோது அந்த உறவினர்கள் அடைந்த மன உளைச்சலுக்கு இந்த அரசு என்ன பதில் சொல்லப் போகிறது என்று கேட்டுள்ளது.

அரசு மருத்துவமனைகளில் பிணவறை ஊழியர்கள் முதல் உயர் அதிகாரிகள் வரை முறையாகக் கண்காணிக்கத் தவறியதே இத்தகைய குளறுபடிகளுக்குக் காரணம் என்றும் உடல்களை அடையாளம் காண்பதில் அடிப்படை விதிகளைக் கூடப் பின்பற்றாமல், பொத்தாம் பொதுவாக உடல்களை ஒப்படைப்பது ஒரு மாபெரும் குற்றவியல் அலட்சியம் எனவும் தெரிவித்து உள்ளது. ஒரு குடும்பத்தின் உணர்வுகளோடு விளையாடும் இத்தகைய போக்கு, திமுக அரசின் நிர்வாகம் எந்த லட்சணத்தில் இருக்கிறது என்பதற்குச் சான்று என்றும் இந்த விவகாரத்தில் மருத்துவர்கள் தரப்பில் கூறப்படும் விளக்கம் இன்னும் அதிர்ச்சியளிக்கிறது எனவும் கூறியது. 

இதையும் படிங்க: GAS தட்டுப்பாடு பிரச்சனை... அம்மா உணவகங்களில் கவனம் தேவை... EPS வலியுறுத்தல்..!!

தமிழக முதல்வர் ஸ்டாலின் விளம்பரங்களில் காட்டும் அக்கறையை, அரசு மருத்துவமனைகளின் செயல்பாடுகளில் காட்ட வேண்டும் என்றும் இந்தச் சம்பவத்திற்குத் தார்மீகப் பொறுப்பேற்று, சம்பந்தப்பட்ட ஊழியர்கள் மற்றும் அதிகாரிகள் மீது கடுமையான நடவடிக்கை எடுக்க வேண்டும் எனவும் வலியுறுத்தி உள்ளது.

இதையும் படிங்க: பாஜகவினர் நிழல் பட்டாலே கைவிலங்குடன் துரத்தும் திமுக...!! நயினார் கண்டனம்..!!