கோவை போதைப் பொருள் கடத்தல் புகார்: அமைச்சர் ஆதவ் அர்ஜுனாவை பதவி நீக்கணும்..!! டாக்டர் கிருஷ்ணசாமி வலியுறுத்தல்..!!

கோவையைச் சேர்ந்த அமைச்சர் ஆதவ் அர்ஜுனாவின் உறவினர்கள் மீதான போதைப் பொருள் கடத்தல் குற்றச்சாட்டுகள் தமிழக அரசியலில் பெரும் பரபரப்பை ஏற்படுத்தியுள்ள நிலையில், புதிய தமிழகம் கட்சித் தலைவர் டாக்டர் கிருஷ்ணசாமி கடுமையான விமர்சனங்களை முன்வைத்துள்ளார். அமலாக்கத் துறை (ED) கடந்த மாதம் 27-ம் தேதி வெளியிட்ட அறிக்கையில், அமைச்சரின் உறவினர்களான ஜான் பிரிட்டோ மற்றும் ஜான் கென்னடி ஆகியோர் போதைப் பொருள் கடத்தலில் ஈடுபட்டதாகக் குறிப்பிடப்பட்டுள்ளதாக அவர் சுட்டிக்காட்டினார்.

“இந்தக் குற்றச்சாட்டுகள் தமிழக அரசின் நம்பகத்தன்மையை பெரிதும் பாதிக்கும் வகையில் உள்ளன. முதலமைச்சர் விஜய் தேர்தல் பிரச்சாரத்தில் ஊழலற்ற ஆட்சியையும், மதுபோதை இல்லாத தமிழகத்தையும் உருவாக்குவேன் என்று வாக்குறுதி அளித்திருந்தார். ஆனால், இத்தகைய தீவிர குற்றச்சாட்டுகள் எழுந்திருப்பது மிகுந்த அதிர்ச்சியை ஏற்படுத்துகிறது” என்று டாக்டர் கிருஷ்ணசாமி தெரிவித்தார். இந்த விவகாரத்தை சாதாரணமாகக் கருத முடியாது என்றும், அமைச்சர் ஆதவ் அர்ஜுனா தொடர்ந்து அமைச்சரவையில் நீடிப்பது பொருத்தமானதா என்பதை முதலமைச்சர் விஜய் உடனடியாகப் பரிசீலிக்க வேண்டும் என்றும் அவர் வலியுறுத்தினார்.

கரூர் பகுதியில் பாதிக்கப்பட்டவர்களுக்கு வழங்கப்பட்ட நிதி உதவிப் பணம் ஆதவ் அர்ஜுனா மூலம் வழங்கப்பட்டதா என்பதை விசாரிக்க வேண்டும் என்றும், அந்தப் பணத்தின் மூலம் என்ன என்பதை அறிய உரிய நடவடிக்கைகள் எடுக்க வேண்டும் என்றும் டாக்டர் கிருஷ்ணசாமி கோரிக்கை வைத்தார். மத்திய அரசு முழுமையான விசாரணை நடத்த வேண்டும் என்றும், சிபிஐ விசாரணைக்கு உத்தரவிட வேண்டும் என்றும் அவர் வலியுறுத்தினார். 

இதையும் படிங்க: அமைச்சர் ரமேஷின் சாதி எங்களுக்கே தெரியாது.. எதிர்க்கட்சிகளின் அவதூறுகளுக்கு ஆதவ் அர்ஜுனா பதில்!

“முதலமைச்சர் இந்த விவகாரத்தில் மவுனம் சாதிக்கக் கூடாது. தூய்மையான ஆட்சியை உறுதி செய்ய வேண்டுமானால், ஆதவ் அர்ஜுனாவை அமைச்சர் பதவியிலிருந்து மட்டுமல்ல, கட்சியிலிருந்தும் உடனடியாக நீக்க வேண்டும்” என்றார்.மேலும், அதிமுக எம்.எல்.ஏ. லீமா ரோஸ் தனது சொத்து மதிப்பை ரூ.5,000 கோடியாக உயர்த்தியது எப்படி என்பதையும் டாக்டர் கிருஷ்ணசாமி கேள்வி எழுப்பினார். அவரையும் கட்சியிலிருந்து நீக்க நடவடிக்கை எடுக்க வேண்டும் என்று வலியுறுத்தினார். 

உறவினர்கள் மீது குற்றச்சாட்டு எழும்போது, அமைச்சர்கள் தாங்களாகவே முன்வந்து பதவி விலக வேண்டும் என்பதை அரசியல் தலைவர்கள் கடைப்பிடிக்க வேண்டும் என்ற கொள்கையையும் அவர் வலியுறுத்தினார். இந்தப் புகார்கள் தமிழக அரசின் சட்ட ஒழுங்கு, நேர்மை மற்றும் நம்பகத்தன்மைக்கு பெரும் சவாலாக அமைந்துள்ளதாக அரசியல் வட்டாரங்கள் கருதுகின்றன. 

முதலமைச்சர் விஜய் இந்த விவகாரத்தில் உரிய, உடனடி நடவடிக்கை எடுப்பாரா என்பதை பொதுமக்கள் உன்னிப்பாகக் கவனித்து வருகின்றனர். தமிழகத்தில் போதைப் பொருள் கடத்தல் மற்றும் ஊழல் ஒழிப்பு குறித்து தொடர்ச்சியான விவாதங்கள் எழுந்துள்ள நிலையில், இந்த விவகாரம் ஆளும் கட்சிக்கு பெரும் சோதனையாக மாறியுள்ளது.

இதையும் படிங்க: முதல்வர் விஜய் குறித்து அவதூறு பேச்சு! திமுக எம்.எல்.ஏ அனிதா ராதாகிருஷ்ணன் மீது டிஎஸ்பியிடம் வழக்கறிஞர்கள் புகார்!