ஒவ்வொரு வாக்காளருக்கும் சல்யூட்..! தேர்தல் ஆணையர் ஞானேஷ் குமார் பெருமிதம்..!

இந்திய தலைமைத் தேர்தல் ஆணையர் ஞானேஷ் குமார், 2026 ஏப்ரல் 23 அன்று தமிழ்நாடு மற்றும் மேற்கு வங்காளத்தில் நடைபெற்ற சட்டப்பேரவைத் தேர்தல் வாக்குப்பதிவைப் பாராட்டி, ஒவ்வொரு வாக்காளருக்கும் தேர்தல் ஆணையத்தின் சல்யூட் என்று அறிவித்தார். சுதந்திரத்துக்குப் பிறகு இதுவரை இல்லாத அளவுக்கு இரு மாநிலங்களிலும் அதிகபட்ச வாக்குப்பதிவு சதவீதம் பதிவாகியுள்ளதாகக் கூறி, வாக்காளர்களின் ஜனநாயக பங்களிப்பைப் பெரிதும் பாராட்டினார்.

தமிழ்நாட்டில் 234 தொகுதிகளுக்கான ஒரே கட்ட வாக்குப்பதிவு அன்று காலை 7 மணிக்குத் தொடங்கி மாலை 6 மணியுடன் அமைதியாக நிறைவடைந்தது. இதில் தோராயமாக 84.69 சதவீதம் முதல் 84.98 சதவீதம் வரை வாக்குகள் பதிவாகியுள்ளன. இது 2011ஆம் ஆண்டின் முந்தைய அதிகபட்ச சதவீதமான 78.29ஐ விடவும், 2021ஆம் ஆண்டின் 73.6 சதவீதத்தை விடவும் புதிய உச்சமாகும். கரூர் மாவட்டத்தில் 91.92 சதவீதம் வரை உயர்ந்த வாக்குப்பதிவு நிலவரம் பதிவாகியிருந்தது.

மொத்தம் 75,064 வாக்குச்சாவடிகளில் 4,023 வேட்பாளர்கள் போட்டியிட்ட இந்தத் தேர்தல், எந்தவித பெரிய வன்முறையும் இன்றி நடைபெற்றது. அதேநேரத்தில், மேற்கு வங்காளத்தில் 294 தொகுதிகளுக்கான இரண்டு கட்டத் தேர்தலின் முதல் கட்டமாக 152 தொகுதிகளில் வாக்குப்பதிவு நடைபெற்றது. இங்கும் காலை 7 மணி முதல் மாலை 6 மணி வரை வாக்குப்பதிவு விறுவிறுப்பாக இருந்தது.

இதையும் படிங்க: தேர்தல் நடத்தை விதிகளில் தளர்வு..! தேர்தல் ஆணையம் அதிரடி அறிவிப்பு..!

மாலை 6 மணி நிலவரப்படி 92.14 சதவீதம் வாக்குகள் பதிவாகியிருந்த நிலையில், இரவு 9 மணிக்கு இது 92.31 சதவீதமாக உயர்ந்தது. இது அம்மாநிலத்தின் சுதந்திரத்துக்குப் பிறகான மிக உயர்ந்த வாக்குப்பதிவு சதவீதமாகும். தக்‌ஷின் தினஜ்பூர் போன்ற இடங்களில் 94.87 சதவீதம் வரை வாக்குகள் பதிவானதாகத் தெரிவிக்கப்பட்டது. இந்த வரலாற்றுச் சிறப்புமிக்க வாக்குப்பதிவைத் தொடர்ந்து, தலைமைத் தேர்தல் ஆணையர் ஞானேஷ் குமார் தனது எக்ஸ் பக்கத்தில் ஒரு முக்கிய பதிவை வெளியிட்டார். அதில், “சுதந்திரத்துக்கு முன் இதுவரை இல்லாத அளவுக்கு தமிழகம், மேற்கு வங்காளத்தில் வாக்குப்பதிவு நடைபெற்றுள்ளது. தமிழகம் மற்றும் மேற்கு வங்காளத்தின் ஒவ்வொரு வாக்காளருக்கும் ஆணையத்தின் சல்யூட்” என்று குறிப்பிட்டார். 

இதையும் படிங்க: வாக்குப்பதிவு இயந்திரம் உடைக்கப்பட்ட விவகாரம்..! போலி ஏஜெண்டுகள் கைது..!