டெல்லியில் எடப்பாடி பழனிசாமி - அமித் ஷாவுடன் இன்று இரவு தொகுதிப் பங்கீடு குறித்த முக்கியப் பேச்சுவார்த்தை!

அதிமுக பொதுச்செயலாளரும், தமிழக எதிர்க்கட்சித் தலைவருமான எடப்பாடி பழனிசாமி (EPS) இன்று மதியம் டெல்லி சென்றடைந்தார். தமிழக அரசியலில் 2026 சட்டமன்றத் தேர்தல் கூட்டணிக் கணக்குகள் உச்சகட்டத்தை எட்டியுள்ள நிலையில், அவரது இந்தப் பயணம் மிகவும் முக்கியத்துவம் வாய்ந்ததாகப் பார்க்கப்படுகிறது.

டெல்லி விமான நிலையத்தில் இருந்து நேரடியாக ஒரு தனியார் நட்சத்திர விடுதிக்குச் சென்ற எடப்பாடி பழனிசாமி, அங்கிருந்து இன்று இரவு 9:00 மணியளவில் மத்திய உள்துறை அமைச்சர் அமித் ஷா-வை அவரது இல்லத்தில் சந்தித்துப் பேச உள்ளார்.

தேசிய ஜனநாயகக் கூட்டணியில் (NDA) அதிமுக - பாஜக இடையிலான தொகுதிப் பங்கீடு குறித்து இந்தச் சந்திப்பில் இறுதி முடிவு எடுக்கப்பட வாய்ப்புள்ளது. கடந்த 2024 மக்களவைத் தேர்தலில் பாஜக பெற்ற 11% வாக்குகள் மற்றும் தற்போது தமிழகத்தில் நிலவும் அரசியல் சூழலைக் கருத்தில் கொண்டு, பாஜக கூடுதல் தொகுதிகளைக் கோரி வருவதாகத் தெரிகிறது.

இதையும் படிங்க: கண்டுக்காத ஓபிஎஸ்..!! மீண்டும் அதிமுகவுடன் கைகோர்த்தார் கொளத்தூர் கிருஷ்ணமூர்த்தி..!!

தமிழகத்தில் அதிமுக தலைமையிலானக் கூட்டணி தான் என்பதை ஏற்கனவே அமித் ஷா உறுதி செய்துள்ள நிலையில், பாமக, அமமுக ஆகிய கூட்டணிக் கட்சிகளுக்கானத் தொகுதிகள் குறித்தும் இந்தச் சந்திப்பில் ஆலோசிக்கப்பட உள்ளது.

பின்னணி: நேற்று மதுரையில் நடைபெற்றப் பிரம்மாண்டப் பொதுக்கூட்டத்தில் பிரதமர் மோடி பங்கேற்று உரையாற்றிய ஒரு நாளுக்குள்ளேயே, எடப்பாடி பழனிசாமி டெல்லி சென்று அமித் ஷாவைச் சந்திப்பது, தேர்தல் பணிகளை அதிமுக - பாஜக கூட்டணி அதிகாரப்பூர்வமாகத் தொடங்கிவிட்டதைக் காட்டுகிறது.

ஈரான் - இஸ்ரேல் போர் பதற்றம் காரணமாகத் துபாயில் சிக்கியுள்ளத் தமிழர்களை மீட்பது குறித்தும், மத்திய அரசு எடுக்க வேண்டிய அவசர நடவடிக்கைகள் குறித்தும் அமித் ஷாவிடம் எடப்பாடி பழனிசாமி கோரிக்கை வைக்க உள்ளதாகவும் தகவல்கள் தெரிவிக்கின்றன.

இதையும் படிங்க: மீண்டும் தாய் கழகத்தில் வெல்லமண்டி நடராஜன்! எடப்பாடி பழனிசாமி முன்னிலையில் அதிமுக-வில் இணைவு!