ஈரோட்டில் இ.பி.எஸ் சூறாவளி பிரச்சாரம்! மார்ச் 7-ல் அந்தியூர், மார்ச் 8-ல் பெருந்துறை, பவானியில் பரப்புரை!

தமிழக சட்டமன்றத் தேர்தலை முன்னிட்டு அதிமுக பொதுச்செயலாளர் எடப்பாடி பழனிசாமி (EPS) "மக்களைக் காப்போம், தமிழகத்தை மீட்போம்" என்ற முழக்கத்துடன் தமிழகம் முழுவதும் தீவிரப் பரப்புரை மேற்கொண்டு வருகிறார். அந்த வகையில், ஈரோடு மாவட்டத்தில் அவரது அடுத்தகட்ட தேர்தல் சுற்றுப்பயணம் குறித்த அதிகாரப்பூர்வ அறிவிப்பை அதிமுக தலைமை இன்று வெளியிட்டுள்ளது.

ஈரோடு மாவட்டத்தின் அந்தியூர் சட்டமன்றத் தொகுதியில் இபிஎஸ் தனது பரப்புரையைத் தொடங்குகிறார். அன்று மாலை அந்தியூர் மற்றும் அதன் சுற்றுவட்டாரப் பகுதிகளில் திறந்த வேனில் வீதி வீதியாகச் சென்று அவர் வாக்குச் சேகரிக்க உள்ளார்.

இரண்டாம் நாள் பயணமாக பெருந்துறை மற்றும் பவானி ஆகிய இரண்டு முக்கியத் தொகுதிகளில் இபிஎஸ் பரப்புரை மேற்கொள்கிறார். காலையில் பெருந்துறையிலும், மாலையில் பவானியிலும் நடைபெறும் பிரம்மாண்டப் பொதுக்கூட்டங்களில் பங்கேற்று அவர் உரையாற்றுகிறார்.

இதையும் படிங்க: இதுதான் சமூக நீதியா ஸ்டாலின் அவர்களே? தூத்துக்குடி மாணவன் மீதான தாக்குதலுக்கு இபிஎஸ் கடும் கண்டனம்!

இந்தப் பரப்புரையின் போது திமுக அரசின் 5 ஆண்டுகாலச் செயல்பாடுகள், விலைவாசி உயர்வு மற்றும் ஈரோடு மாவட்டத்தின் முக்கியத் தேவைகளான ஜவுளித் தொழில் மேம்பாடு மற்றும் நீர் மேலாண்மைத் திட்டங்கள் குறித்து அவர் விரிவாகப் பேச உள்ளார்.

பாமக, பாஜக மற்றும் தேமுதிக ஆகிய கூட்டணிக் கட்சிகளின் மாவட்ட நிர்வாகிகளும் இந்தப் பரப்புரை நிகழ்வுகளில் பங்கேற்று இபிஎஸ்-ஸிற்கு உற்சாக வரவேற்பு அளிக்கத் திட்டமிட்டுள்ளனர்.

நேற்று டெல்லியில் அமித் ஷாவைச் சந்தித்துத் தொகுதிப் பங்கீடு குறித்துப் பேசிவிட்டுத் திரும்பிய கையோடு, இபிஎஸ் தனது அடுத்தகட்டப் பிரச்சாரப் பயணத்தை அறிவித்துள்ளது அதிமுக தொண்டர்களிடையே பெரும் உற்சாகத்தை ஏற்படுத்தியுள்ளது.

இதையும் படிங்க: "டெல்லி போலீசார் வரும் வரை தமிழக ATS தூங்கிக் கொண்டிருந்ததா?" - எதிர்கட்சி தலைவர் இபிஎஸ் சரமாரி கேள்வி!