மீண்டும் ஓர் துயரச்சம்பவம்! பட்டாசு ஆலை வெடி விபத்து... அநியாயமாக போன உயிர்கள்..!

இந்தியாவில், குறிப்பாக தமிழ்நாட்டின் விருதுநகர் மாவட்டத்தில் உள்ள சிவகாசி, சாத்தூர், மற்றும் அருப்புக்கோட்டை போன்ற பகுதிகளில் பட்டாசு உற்பத்தி ஒரு முக்கிய தொழிலாக விளங்குகிறது. இந்தியாவின் பட்டாசு தேவையில் கணிசமான பங்கு இங்கு உற்பத்தி செய்யப்படுகிறது. ஆனால், இந்தத் தொழில் பொருளாதாரத்திற்கு பங்களிக்கும் அதே வேளையில், அடிக்கடி நிகழும் வெடி விபத்துகள் தொழிலாளர்களின் உயிர்களைப் பறிப்பதோடு, பல குடும்பங்களைப் பேரழிவில் ஆழ்த்தி வருகின்றன.

பட்டாசு ஆலைகளில் வெடி விபத்துகள் தமிழ்நாட்டில், குறிப்பாக சிவகாசி பகுதியில், தொடர்ந்து நிகழ்ந்து வருகின்றன. 2025 ஆம் ஆண்டு மட்டும் பல விபத்துகள் பதிவாகியுள்ளன. விருதுநகர் மாவட்டம், சாத்தூர் அருகே கீழத்தாயில்பட்டியில் உள்ள பட்டாசு ஆலையில் நிகழ்ந்த வெடி விபத்தில் ஒருவர் உயிரிழந்தார், மேலும் 15-க்கும் மேற்பட்ட அறைகள் தரைமட்டமாகின. சிவகாசி அருகே சின்னகாமன்பட்டியில் உள்ள கோகுலேஸ் ஃபயர் ஒர்க்ஸ் ஆலையில் ஏற்பட்ட விபத்தில் 7 பேர் உயிரிழந்தனர்.

சாத்தூர் அருகே பொம்மையாபுரத்தில் உள்ள சாய்நாத் பட்டாசு ஆலையில் நிகழ்ந்த விபத்தில் 6 பேர் உயிரிழந்தனர். சிவகாசி அருகே எம்.புதுப்பட்டியில் உள்ள ஸ்டாண்டர்டு பட்டாசு ஆலையில் ஏற்பட்ட விபத்தில் 4 பேர் உயிரிழந்தனர். இவை மட்டுமல்லாமல், கடந்த சில ஆண்டுகளில் நூற்றுக்கணக்கான விபத்துகள் நிகழ்ந்துள்ளன. 2021 ஆம் ஆண்டு மட்டும் விருதுநகர் மாவட்டத்தில் 7 விபத்துகளில் 37 பேர் உயிரிழந்தனர். 

இதையும் படிங்க: அனாமத்தாய் போகும் மனித உயிர்கள்! கொலைக்களமாகும் சிவகாசி... கிருஷ்ணசாமி ஆதங்கம்

இந்த நிலையில் மீண்டும் ஒரு துயரச் சம்பவம் நிகழ்ந்துள்ளது. சிவகாசி அருகே ஆண்டியாபுரத்தில் உள்ள பட்டாசு ஆலையில் பயங்கர வெடி விபத்து நிகழ்ந்தது. ஆண்டியாபுரத்தில் உள்ள மாரியம்மாள் பட்டாசு ஆலையில் ஏற்பட்ட இந்த வெடி விபத்தில் மூன்று பேர் பரிதாபமாக உயிரிழந்தனர்.

சம்பவ இடத்திற்குச் சென்று போலீசார் விசாரணை நடத்தி வரும் நிலையில், எத்தனை உயிரிழப்புகள் நிகழ்ந்தாலும் பாதுகாப்பு ஏற்பாடுகள் உறுதி செய்யப்படாமல் இருப்பது கவலை அளிப்பதாக சமூக ஆர்வலர்கள் தெரிவித்துள்ளனர்.

இதையும் படிங்க: சிவகாசி பட்டாசு ஆலை வெடி விபத்து.. நிவாரணம் அறிவித்தார் முதல்வர் மு.க ஸ்டாலின்..!