தமிழக அரசுத் துறைகளில் அதிரடி மாற்றம்: சுனில்குமார், சங்கர் ஜிவால் உள்ளிட்ட உயரதிகாரிகள் திடீர் ராஜினாமா!

தமிழகத்தில் புதிய ஆட்சி மாற்றம் ஏற்பட்டுள்ள சூழலில், அரசுத் துறைகளின் முக்கியப் பொறுப்புகளில் உள்ள ஓய்வு பெற்ற ஐபிஎஸ் அதிகாரிகள் தங்களது பதவிகளை அடுத்தடுத்து ராஜினாமா செய்து வருகின்றனர். அந்த வகையில், தமிழ்நாடு சீருடை பணியாளர் தேர்வு வாரியத்தின் (TNUSRB) தலைவராகப் பொறுப்பு வகித்து வந்த ஓய்வு பெற்ற ஐபிஎஸ் அதிகாரி சுனில்குமார் தனது பதவியை முறைப்படி ராஜினாமா செய்துள்ளார். அவரைத் தொடர்ந்து, தமிழகத் தகவல் ஆணையராக (State Information Commissioner) நியமிக்கப்பட்டிருந்த மற்றொரு மூத்த ஓய்வு பெற்ற ஐபிஎஸ் அதிகாரியான அபய் குமார் சிங் என்பவரும் தனது பதவியை ராஜினாமா செய்துள்ளார்.

இதேபோன்று, தமிழகத் தீயணைப்பு மற்றும் மீட்புப் பணிகள் துறையின் ஆணையர் (Fire and Rescue Services Commissioner) பொறுப்பில் இருந்த முன்னாள் சென்னை மாநகரக் காவல் ஆணையரும், ஓய்வு பெற்ற ஐபிஎஸ் அதிகாரியுமான சங்கர் ஜிவால் தற்பொழுது தனது பதவியை ராஜினாமா செய்துள்ளார். கடந்த ஆட்சிக் காலத்தின் போது இந்த முக்கியப் பொறுப்புகளில் நியமிக்கப்பட்ட மூத்த அதிகாரிகள் தங்களது பதவிகளைத் துறந்திருப்பது கோட்டை வட்டாரத்தில் பரவலாகப் பேசப்பட்டு வருகிறது.

தீயணைப்புத் துறை ஆணையர் சங்கர் ஜிவாலின் ராஜினாமாவைத் தொடர்ந்து, தீயணைப்புத் துறை ஆணையத்தின் முக்கியச் சார்பு உறுப்பினர்களாகப் பதவி வகித்து வந்த சத்யமூர்த்தி, நமச்சிவாயம் மற்றும் இக்ராம் ஆகிய மூவரும் தங்களது பதவிகளை முறைப்படி ராஜினாமா செய்துள்ளனர். புதிய அரசு பொறுப்பேற்ற பிறகு, மாநிலத்தின் முக்கியத் துறை வாரியங்கள் மற்றும் ஆணையங்களை மறுசீரமைப்பு செய்யத் திட்டமிட்டு வரும் சூழலில், இந்த அடுத்தடுத்த ராஜினாமாக்கள் புதிய அதிகாரிகள் நியமனத்திற்கான வழிகளை உருவாக்கியுள்ளன. இந்த ஒட்டுமொத்த அதிகாரிகள் மாற்றப் படலம் தற்பொழுது அரசு நிர்வாக வட்டாரங்களில் முக்கிய விவாதப் பொருளாக மாறியுள்ளது.

இதையும் படிங்க: முன்னாள் துணை ஜனாதிபதி வெங்கையா நாயுடு மகளிடம் மோசடி! ரூ.2 கோடி சுருட்டிய மர்ம நபர்கள்!!

இதையும் படிங்க: விமானப்படை அதிகாரி மனைவிக்கு மயக்கமருந்து கொடுத்து பாலியல் வன்கொடுமை! கட்டாய மதமாற்றம்! 2 பேர் கைது!