குதிரை பேர வழக்கில் தவெகவுக்கு சிக்கல்!! முதல்வர் விஜய்க்கு கடிவாளம் போட கவர்னர் அர்லேகர் முடிவு?!

தமிழக அரசியலில் எம்.எல்.ஏ.க்கள் இடமாற்றம் தொடர்பான சர்ச்சை மீண்டும் தீவிரமடைந்துள்ளது. குதிரை பேரம் நடைபெற்றதாக எதிர்க்கட்சிகள் முன்வைத்துள்ள புகார்கள் தொடர்பாக, தமிழக அரசிடம் விளக்கம் கேட்க ஆளுநர் ராஜேந்திர அர்லேக்கர் முடிவு செய்துள்ளதாக அரசியல் வட்டாரங்களில் தகவல் வெளியாகியுள்ளது.

கடந்த மே 7-ஆம் தேதி, ஆட்சி அமைக்க உரிமை கோரி தமிழக வெற்றிக் கழகத் தலைவர் விஜய் ஆளுநரை சந்தித்திருந்தார். அந்த நேரத்தில், தனது கட்சியின் ஒரே எம்.எல்.ஏ.வை குதிரை பேரம் மூலம் த.வெ.க. இழுத்துச் சென்றதாக அ.ம.மு.க. பொதுச்செயலாளர் டிடிவி தினகரன் குற்றம்சாட்டியிருந்தார். அதனைத் தொடர்ந்து, த.வெ.க. அரசு பதவியேற்ற பிறகு அ.தி.மு.க.வைச் சேர்ந்த ஆறு எம்.எல்.ஏ.க்கள் ராஜினாமா செய்து த.வெ.க.வில் இணைந்தது அரசியல் வட்டாரங்களில் பெரும் விவாதத்தை ஏற்படுத்தியது.

இதற்கிடையில், மேலும் பல எம்.எல்.ஏ.க்களை தங்கள் கட்சிக்கு இழுக்க த.வெ.க. முயற்சி செய்து வருவதாக அ.தி.மு.க. தொடர்ந்து குற்றம்சாட்டி வருகிறது. இதேபோல், தங்கள் கட்சியைச் சேர்ந்த சட்டப்பேரவை உறுப்பினர்களையும் அணுகும் முயற்சிகள் நடைபெறுவதாக தி.மு.க. தரப்பிலும் குற்றச்சாட்டுகள் முன்வைக்கப்பட்டுள்ளன.

இதையும் படிங்க: முதல்வர் விஜய் உடன் நெருக்கம் வேண்டாம்!! அன்புமணி ராமதாஸுக்கு வன்னியர் சங்கங்கள் வார்னிங்!

இந்தச் சூழலில், கடந்த 4-ஆம் தேதி அ.தி.மு.க., தி.மு.க. மற்றும் பா.ஜ.க. நிர்வாகிகள் ஆளுநர் ராஜேந்திர அர்லேக்கரை நேரில் சந்தித்து மனு அளித்தனர். அந்த மனுவில், த.வெ.க. அரசு குதிரை பேரத்தில் ஈடுபடுவதாகக் கூறி, அதைத் தடுக்க அரசியல் சட்டத்தின்படி உடனடி நடவடிக்கை எடுக்க வேண்டும் என்று வலியுறுத்தியதாக கூறப்படுகிறது.

இதையடுத்து, இந்திய அரசியல் சட்டத்தின் 167-வது பிரிவின் கீழ், மாநில அரசிடம் தேவையான தகவல்கள் மற்றும் விளக்கங்களை கேட்க ஆளுநருக்கு அதிகாரம் இருப்பதாக கூறப்படுகிறது. அதன்படி, எம்.எல்.ஏ.க்கள் ராஜினாமா செய்து த.வெ.க.வில் இணைந்த விவகாரம் குறித்து தமிழக அரசிடம் விளக்கம் கோர ஆளுநர் பரிசீலித்து வருவதாக ஆளுநர் மாளிகை வட்டாரங்களில் தகவல் வெளியாகியுள்ளது.

எனினும், இதுகுறித்து ஆளுநர் மாளிகை அல்லது தமிழக அரசு சார்பில் இதுவரை அதிகாரப்பூர்வ அறிவிப்பு எதுவும் வெளியாகவில்லை. இருப்பினும், இந்த விவகாரம் தமிழக அரசியலில் மீண்டும் பரபரப்பை ஏற்படுத்தியுள்ளது.

இதையும் படிங்க: திடீரென நீக்கப்பட்ட ‘விடியல்’... தாறுமாறு வைரலான வீடியோ.. பதறியடித்துக் கொண்டு விளக்கம் கொடுத்த அதிகாரிகள்...!