சென்னையை வாட்டி வதைக்கும் வெயில்..!! குறைந்தது நிலத்தடி நீர்மட்டம்..!! லாரி தண்ணீரை நம்பும் மக்கள்..!!

சென்னையில் கோடைக்கால வெயிலின் தீவிரம் நாளுக்கு நாள் அதிகரித்து வருகிறது. பகல் நேரங்களில் 100 டிகிரி ஃபாரன்ஹீட் அளவுக்கு வெப்பம் பதிவாகி, மக்களின் அன்றாட வாழ்க்கையை பாதித்து வருகிறது. இந்த தொடர் வெப்ப அலை காரணமாக நிலத்தடி நீர் மட்டம் வேகமாக குறைந்து வருவது பெரும் கவலையை ஏற்படுத்தியுள்ளது.

புள்ளிவிவரங்களின்படி, கடந்த பிப்ரவரி மாதத்தில் சராசரியாக 4.32 மீட்டர் ஆழத்தில் இருந்த நிலத்தடி நீர், மார்ச் மாதத்தில் 4.79 மீட்டராகவும், ஏப்ரல் மாதத்தில் 5 மீட்டர் ஆழத்திற்கும் இறங்கியுள்ளது. இந்த சரிவு வட சென்னை பகுதிகளை மிகவும் பாதித்துள்ளது. திருவொற்றியூர், மாதவரம், திரு.வி.க. நகர், சோளிங்கநல்லூர், ராயபுரம், வியாசர்பாடி, ஆர்.கே. நகர் உள்ளிட்ட பல்வேறு பகுதிகளில் ஆழ்துளை கிணறுகள் (போர்வெல்) வறண்டு போயுள்ளன.

கடல் நீர் ஊடுருவல் காரணமாக உப்புத் தன்மை அதிகரித்து, குடிநீர் தரம் மோசமடைந்துள்ளது. ராயபுரம் போன்ற பகுதிகளில் வீடுகளில் வரும் நீரில் உப்பு அளவு அதிகமாக இருப்பதால், குளிப்பது, துணி துவைப்பது போன்ற அடிப்படைத் தேவைகளுக்குகூட அந்த நீரைப் பயன்படுத்த முடியாத நிலை ஏற்பட்டுள்ளது. இதனால் பொதுமக்கள் குடிநீர் லாரிகளை முழுமையாக நம்பியிருக்கும் சூழல் உருவாகியுள்ளது.

இதையும் படிங்க: தவெக எம்எல்ஏக்களுடன் விஜய் இன்று முக்கிய ஆலோசனை: அமைச்சரவை பட்டியல் தயாரிப்பு தீவிரம்!

18,000 லிட்டர், 12,000 லிட்டர் கொள்ளளவு கொண்ட பெரிய டேங்கர் லாரிகள் மற்றும் மினி லாரிகள் மூலம் மெட்ரோ நீர் நிலையங்களில் இருந்து தண்ணீர் வாங்கும் நடவடிக்கை கடந்த ஒரு மாதமாகக் கணிசமாக அதிகரித்துள்ளது. பாதிக்கப்பட்ட பகுதி மக்கள் சிலர் கூறுகையில், “சமைப்பதற்கும், குடிப்பதற்கும், பாத்திரங்கள் கழுவுவதற்கும் டேங்கர் லாரி தண்ணீரையே நம்ப வேண்டியுள்ளது. மெட்ரோ குடிநீர் கிடைத்தாலும் அது போதுமானதாக இல்லை” என்று வருத்தம் தெரிவித்தனர்.

இருப்பினும், சென்னை மாநகராட்சி மற்றும் அதிகாரிகள் நிலைமையைக் கட்டுக்குள் வைத்திருப்பதாக உறுதியளித்துள்ளனர். பூண்டி, புழல், செம்பரம்பாக்கம், சோழவரம், வீராணம், கண்ணன் கோட்டை தேர்வாய் கண்டிகை உள்ளிட்ட முக்கிய ஏரிகளில் தற்போது 8,330.80 மில்லியன் அளவு தண்ணீர் இருப்பு உள்ளது. இது சென்னையின் குடிநீர் தேவையை பூர்த்தி செய்ய போதுமானது என்று தெரிவிக்கப்பட்டுள்ளது. மேலும், கடல் நீரை குடிநீராக்கும் திட்டத்தின் மூலமும் தண்ணீர் வினியோகம் செய்யப்படுகிறது.

போர்வெல் நீர் வறண்ட பகுதிகளில் மெட்ரோ குடிநீர் இணைப்புகளை அதிகரித்து, முன்பதிவு செய்யும் மக்களுக்கு லாரிகள் மூலம் தண்ணீர் வழங்கும் பணி தொடர்ந்து மேற்கொள்ளப்பட்டு வருகிறது. தடையின்றி குடிநீர் வினியோகம் செய்யப்படுவதால் பொதுமக்களுக்கு பெரிய அளவில் பாதிப்பு ஏற்படாது என்று அதிகாரிகள் நம்பிக்கை தெரிவித்துள்ளனர். ஆயினும், நீண்டகால தீர்வாக நிலத்தடி நீர் மட்டத்தை உயர்த்த நீர் மேலாண்மை திட்டங்கள், மழைநீர் சேகரிப்பு மற்றும் கடல் நீர் நீக்கல் திட்டங்களை தீவிரப்படுத்த வேண்டிய அவசியம் உள்ளது. 

இதையும் படிங்க: "கொசுத் தொல்லை: 48 மணி நேரத்தில் ஆக்ஷன் எடுங்க!" - தமிழக அரசுக்குச் சென்னை உயர் நீதிமன்றம் அதிரடி உத்தரவு!