கோடை வெயிலுக்கு குட்பை: தமிழகத்தின் 10 மாவட்டங்களில் இன்று கனமழைக்கு வாய்ப்பு!

தமிழகத்தில் நிலவி வரும் கடுமையான கோடை வெயிலுக்கு மத்தியில், இன்று மாநிலத்தின் பல்வேறு மாவட்டங்களில் கனமழை பெய்ய வாய்ப்புள்ளதாகச் சென்னை வானிலை ஆய்வு மையம் மகிழ்ச்சியான செய்தியை வெளியிட்டுள்ளது. குறிப்பாக மேற்குத் தொடர்ச்சி மலையை ஒட்டிய மாவட்டங்கள் மற்றும் உள் மாவட்டங்களில் வளிமண்டல மேலடுக்கு சுழற்சி காரணமாக மழை பெய்யக்கூடும் எனத் தெரிவிக்கப்பட்டுள்ளது.

சென்னை வானிலை ஆய்வு மையம் வெளியிட்டுள்ள அறிக்கையின்படி, இன்று (ஏப்ரல் 30) தமிழகத்தின் 10 முக்கிய மாவட்டங்களில் கனமழை பெய்ய வாய்ப்புள்ளது. கிருஷ்ணகிரி, தருமபுரி, சேலம், நாமக்கல், ஈரோடு, நீலகிரி, கோவை, திருப்பூர், தேனி மற்றும் திருச்சி ஆகிய மாவட்டங்களில் இன்று இடி, மின்னலுடன் கூடிய கனமழைக்கு வாய்ப்பு இருப்பதாகக் குறிப்பிடப்பட்டுள்ளது. கோடை வெயிலின் தாக்கத்தால் தவித்து வரும் இந்த மாவட்ட மக்களுக்கு இந்த மழை ஒரு பெரும் ஆறுதலாக அமையும் என எதிர்பார்க்கப்படுகிறது.

அடுத்தகட்டமாக நாளைய (மே 1) வானிலை நிலவரம் குறித்தும் எச்சரிக்கை விடுக்கப்பட்டுள்ளது. நாளை ஈரோடு, நீலகிரி, கோவை, திருப்பூர், திண்டுக்கல் மற்றும் தேனி ஆகிய 6 மாவட்டங்களில் கனமழை பெய்ய வாய்ப்புள்ளதாகத் தெரிவிக்கப்பட்டுள்ளது. கடந்த சில நாட்களாக 100 டிகிரி பாரன்ஹீட்டைத் தாண்டி வெயில் கொளுத்தி வந்த நிலையில், இந்தத் திடீர் மழை மாற்றமானது வெப்பத்தைத் தணித்து குளிர்ச்சியான சூழலை உருவாக்கும்.

இதையும் படிங்க: தமிழகத்தில் கொளுத்தும் வெயில்! திருச்சியில் 105°F பதிவு - 11 மாவட்டங்களில் 100 டிகிரியைத் தாண்டியது வெப்பம்!

தாழ்வான பகுதிகளில் வசிக்கும் மக்கள் மற்றும் மலைப் பிரதேசங்களுக்குப் பயணம் மேற்கொள்ளத் திட்டமிடுவோர் வானிலை மாற்றங்களைக் கவனித்துச் செயல்படுமாறு அறிவுறுத்தப்படுகிறார்கள். பலத்த சூறைக்காற்று வீசக்கூடும் என்பதால் மரங்கள் மற்றும் மின் கம்பங்களுக்கு அடியில் ஒதுங்குவதைத் தவிர்க்குமாறு பொதுமக்களுக்கு எச்சரிக்கை விடுக்கப்பட்டுள்ளது.

இதையும் படிங்க: புதுச்சேரியில் 2026 கோடை விடுமுறை அறிவிப்பு! சிறப்பு வகுப்புகள் நடத்தினால் நடவடிக்கை!