ஒகேனக்கல்லில் திடீர் வெள்ளம்! 8,000-ல் இருந்து 12,500 கனஅடியாக எகிறிய நீர்வரத்து! பரிசல் தடை நீட்டிப்பு!

தர்மபுரி மாவட்டம் ஒகேனக்கல்லில் காவிரி ஆற்றின் நீர்வரத்து வேகமாக அதிகரித்து வரும் நிலையில், சுற்றுலாப் பயணிகளின் பாதுகாப்பை கருத்தில் கொண்டு பரிசல் இயக்கத்திற்கான தடை நீட்டிக்கப்பட்டுள்ளது. நீர்வரத்து இன்று காலை 12,500 கனஅடியாக உயர்ந்ததால், காவிரி ஆற்றில் வெள்ளம் கரைபுரண்டு ஓடுகிறது.

கர்நாடகாவில் உள்ள கபினி மற்றும் கிருஷ்ணராஜசாகர் (கேஆர்எஸ்) அணைகளில் இருந்து தமிழகத்துக்கு தண்ணீர் திறக்க கர்நாடகா தொடர்ந்து மறுத்து வந்த நிலையில், காவிரி நீர்பிடிப்பு பகுதிகளில் கடந்த சில நாட்களாக கனமழை பெய்து வருகிறது. இதனால் கர்நாடக அணைகளுக்கு வரும் நீரின் அளவு அதிகரித்து, அணைகளின் நீர்மட்டமும் வேகமாக உயர்ந்தது.

அணைகளின் பாதுகாப்பை கருத்தில் கொண்டு உபரி நீர் வெளியேற்றப்பட்டு வருகிறது. இதற்கிடையே, காவிரி மேலாண்மை வாரியத்தின் உத்தரவின்படி, கடந்த 15-ம் தேதி முதல் தமிழகத்துக்கு தொடர்ந்து வினாடிக்கு 12,298 கனஅடி தண்ணீர் திறக்கப்பட்டு வருவதாக தெரிவிக்கப்பட்டுள்ளது.

இதையும் படிங்க: ஒகேனக்கல்லில் 8,000 கனஅடியாக அதிகரித்த காவிரி நீர்வரத்து! பரிசல் இயக்கத்துக்கு தடை!

இதன் தாக்கமாக ஒகேனக்கல் காவிரி ஆற்றில் நீர்வரத்து படிப்படியாக அதிகரித்து வருகிறது. நேற்றிரவு ஒகேனக்கல்லுக்கு வினாடிக்கு சுமார் 8,000 கனஅடி தண்ணீர் வந்து கொண்டிருந்த நிலையில், இன்று காலை இந்த அளவு 12,500 கனஅடியாக உயர்ந்துள்ளது. ஒரே இரவில் நீர்வரத்தில் ஏற்பட்ட இந்த கணிசமான உயர்வு காரணமாக காவிரி ஆற்றில் நீரின் வேகம் அதிகரித்து காணப்படுகிறது.

நீர்வரத்து தொடர்ந்து அதிகரித்து வருவதால் சுற்றுலாப் பயணிகள் ஆற்றில் இறங்கி குளிக்கவும், ஆபத்தான பகுதிகளுக்குச் செல்லவும் கட்டுப்பாடுகள் விதிக்கப்பட்டுள்ளன. குறிப்பாக, சுற்றுலாப் பயணிகளை ஏற்றிச் செல்லும் பரிசல்களை இயக்குவதற்கான தடை ஏற்கனவே அமலில் இருந்த நிலையில், தற்போதைய நீர்வரத்தை கருத்தில் கொண்டு அந்தத் தடை நீட்டிக்கப்பட்டுள்ளது.

ஒகேனக்கல் வரும் சுற்றுலாப் பயணிகள் பாதுகாப்பு நடவடிக்கைகளுக்கு ஒத்துழைக்க வேண்டும் என அதிகாரிகள் அறிவுறுத்தியுள்ளனர். காவிரி கரையோரப் பகுதிகளில் போலீசார் மற்றும் மீட்புப் படையினர் தொடர்ந்து கண்காணிப்பில் ஈடுபட்டு வருகின்றனர்.

நீர்வரத்து மேலும் அதிகரித்தால் ஒகேனக்கல் சுற்றுவட்டாரப் பகுதிகளில் கூடுதல் பாதுகாப்பு நடவடிக்கைகள் மேற்கொள்ளப்படலாம் என எதிர்பார்க்கப்படுகிறது. இதனால், ஒகேனக்கல் செல்லும் சுற்றுலாப் பயணிகள் தற்போதைய நிலவரத்தை தெரிந்து கொண்டு பயணத்தை திட்டமிடுவது அவசியமாகியுள்ளது

இதையும் படிங்க: காவிரியில் தமிழகத்திற்கு திறக்கப்படும் நீர் திடீர் குறைப்பு! 25,000 கனஅடியில் இருந்து 9,958 கனஅடியாக சரிவு!