"தமிழே எமது மூச்சு" - மொழிப்போர் தியாகிகள் நினைவிடத்தில் அமைச்சர்கள் மற்றும் திமுகவினர் சங்கமம்!

 தமிழ் மொழி உரிமைக்காகத் தன்னுயிர் ஈந்த மொழிப்போர் தியாகிகளுக்கு வீரவணக்கம் செலுத்தும் வகையில், சென்னை வண்ணாரப்பேட்டை மூலக்கொத்தளம் பகுதியில் அமைந்துள்ள நினைவிடத்தில் தமிழ்நாடு முதலமைச்சர் மு.க.ஸ்டாலின் மற்றும் துணை முதலமைச்சர் உதயநிதி ஸ்டாலின் ஆகியோர் இன்று (ஜனவரி 25) மலர் வளையம் வைத்து நெகிழ்ச்சியுடன் மரியாதை செலுத்தினர். 1930-களில் நடைபெற்ற இந்தி எதிர்ப்புப் போராட்டத்தின் போது சிறையில் உயிர்நீத்த தாளமுத்து, நடராசன் மற்றும் அன்னை தர்மாம்பாள் ஆகியோரின் நினைவிடங்களில் இந்த வீரவணக்க நிகழ்வு நடைபெற்றது.

நிகழ்வின் போது, தியாகிகளின் நினைவிடத்தில் மலர் வளையம் வைத்த முதலமைச்சர் மற்றும் துணை முதலமைச்சர், “மொழிப்போர் தியாகிகளுக்கு வீரவணக்கம்!” எனத் தொண்டர்களுடன் இணைந்து முழக்கங்களை எழுப்பினர். இந்த நிகழ்வில் அமைச்சர்கள் பி.கே.சேகர்பாபு, மு.பெ.சாமிநாதன், சென்னை மாநகராட்சி மேயர் பிரியா மற்றும் வடசென்னை வடக்கு மாவட்டச் செயலாளர் ஆர்.டி.சேகர் எம்.எல்.ஏ உள்ளிட்ட முக்கியப் பிரமுகர்கள் பங்கேற்றனர். மேலும், சட்டமன்ற உறுப்பினர்கள் ஐட்ரீம் மூர்த்தி, ஜே.ஜே.எபினேசர், தாயகம் கவி உள்ளிட்டோரும், திமுக மாணவர் அணியினர் மற்றும் ஏராளமான கழகத் தொண்டர்களும் திரளாகப் பங்கேற்றுத் தியாகிகளுக்கு அஞ்சலி செலுத்தினர்.

இதையும் படிங்க: “இந்திக்கு இங்கே இடமில்லை!” - மொழிப்போர் தியாகிகள் நாளில் முதல்வர் ஸ்டாலின் அதிரடி முழக்கம்!

மரியாதை செலுத்திய பின் பேசிய தலைவர்கள், “தமிழைக் காக்கத் தங்களது இன்னுயிரை ஈந்த தியாகிகளின் வழிநின்று, தமிழகத்தில் இந்தித் திணிப்பைத் தடுத்து நிறுத்தி, இருமொழிக் கொள்கையைத் தொடர்ந்து பாதுகாப்போம்” என உறுதி பூண்டனர். தமிழகம் முழுவதும் இன்று மொழிப்போர் தியாகிகள் தினம் கடைபிடிக்கப்பட்டு வரும் சூழலில், தலைநகர் சென்னையில் நடைபெற்ற இந்தச் சங்கமம் மொழிப்பற்றின் அடையாளமாகத் திகழ்ந்தது.
 

இதையும் படிங்க: "அப்பன் வீட்டு பணமல்ல": பொங்கல் பரிசு விவகாரத்தில் உதயநிதியை சாடிய ஆர்.பி.உதயகுமார்!