இந்தியாவுக்கு வந்தது புதிய வாய்ப்பு? 2036 ஒலிம்பிக் கனவுக்காக களத்தில் இருக்கும் நாடுகள்! அதிகரிக்கும் எதிர்பார்ப்பு!

2036-ம் ஆண்டு ஒலிம்பிக் போட்டிகளை நடத்த இந்தியா தொடர்ந்து ஆர்வம் காட்டி வரும் நிலையில், போட்டியை நடத்த விருப்பம் தெரிவித்துள்ள நாடுகள் குறித்து சர்வதேச ஒலிம்பிக் கமிட்டி முக்கிய தகவலை வெளியிட்டுள்ளது. இதனால் இந்தியாவில் ஒலிம்பிக் போட்டிகளை நடத்துவதற்கான வாய்ப்பு தொடர்பான எதிர்பார்ப்பு மீண்டும் அதிகரித்துள்ளது.

2036-ம் ஆண்டு ஒலிம்பிக் போட்டிகளை நடத்த விருப்பம் தெரிவித்து இந்தியா கடந்த 2024-ம் ஆண்டு சர்வதேச ஒலிம்பிக் கமிட்டியிடம் தனது விண்ணப்பத்தை சமர்ப்பித்திருந்தது. இதையடுத்து போட்டியை நடத்தும் நகரம் அல்லது நாட்டை தேர்வு செய்வதற்கான நடவடிக்கைகள் தொடர்பாக ஆலோசனைகள் நடைபெற்று வந்தன.

இந்த நிலையில், சர்வதேச ஒலிம்பிக் கமிட்டியின் தலைவராக கிறிஸ்டி கவன்ட்ரி தேர்வு செய்யப்பட்டதைத் தொடர்ந்து, 2036 ஒலிம்பிக் போட்டியை நடத்தும் இடத்தை இறுதி செய்யும் முடிவு ஒத்திவைக்கப்பட்டது. தற்போது போட்டியை நடத்துவதில் ஆர்வம் காட்டி வரும் நாடுகளுடன் ஐஓசி தொடர்ந்து ஆலோசனை நடத்தி வருவதாக தெரிவித்துள்ளது.

இதையும் படிங்க: ஆடிட்டர் செய்த தவறுக்காக முதல்வர் விஜய் வெற்றியை ரத்து செய்ய முடியுமா?: ஐகோர்ட் கேள்வி!   

ஐஓசி வெளியிட்ட தகவலின்படி, இந்தியாவுடன் ஜெர்மனி, ஹங்கேரி, கத்தார், தென் கொரியா, தென் ஆப்ரிக்கா மற்றும் துருக்கி ஆகிய நாடுகளும் 2036 ஒலிம்பிக்கை நடத்துவதற்கான திட்டங்கள் குறித்து ஆலோசனை நடத்தி வருகின்றன.

ஒலிம்பிக் போட்டியை நடத்தும் நாட்டை தேர்வு செய்வதில் பல்வேறு அம்சங்கள் கவனத்தில் கொள்ளப்படும் என ஐஓசி தெரிவித்துள்ளது. குறிப்பாக போட்டிகளை நடத்துவதற்கான திட்டம், ஏற்கனவே பெற்றுள்ள விளையாட்டு ஏற்பாட்டு அனுபவம், நிதி திட்டமிடல், அரசியல் ஆதரவு, பொதுமக்களின் ஆதரவு மற்றும் மிகப்பெரிய சர்வதேச விளையாட்டு நிகழ்வை நடத்துவதற்கான திறன் ஆகியவை மதிப்பீடு செய்யப்படும்.

அதேபோல், விளையாட்டுத்துறையை மேம்படுத்துவதற்கான நாடுகளின் நீண்டகால தொலைநோக்கு திட்டங்கள் மற்றும் போட்டிகள் நடைபெறும் பகுதிகளில் ஏற்படுத்தப்பட உள்ள உள்ளூர் வளர்ச்சி திட்டங்களும் பரிசீலிக்கப்படும் என ஐஓசி தெரிவித்துள்ளது.

இதனால் 2036 ஒலிம்பிக் போட்டியை நடத்தும் வாய்ப்பை இந்தியா பெறுமா என்ற எதிர்பார்ப்பு விளையாட்டு ரசிகர்களிடையே அதிகரித்துள்ளது. இறுதி முடிவை சர்வதேச ஒலிம்பிக் கமிட்டி மேற்கொள்ள உள்ளது.

இதையும் படிங்க: கரப்பான்பூச்சி மக்கள் கட்சியை காப்பி அடிக்கிறதா காங்கிரஸ்? கிண்டல் செய்யும் எதிர்க்கட்சிகள்! டெல்லியில் பரபரப்பு!