அமெரிக்காவையே திரும்பி பார்க்க வைத்த தமிழன்!! கவனம் ஈர்த்த தீர்ப்பு! யார் இந்த நீதிபதி அருண் சுப்பிரமணியன்!

அமெரிக்க ராப் இசை பாடகர் சீன் 'டிடி' கோம்ப்ஸ் மீதான பாலியல் குற்றச்சாட்டு வழக்கில், மன்ஹாட்டன் கோர்ட்டில் விசாரணை நடைபெற்றது. இந்த வழக்கை விசாரித்த அமெரிக்க மாவட்ட நீதிமன்ற நீதிபதி அருண் சுப்பிரமணியன், கோம்ப்ஸுக்கு 50 மாதங்கள் (சுமார் 4 ஆண்டுகள் 2 மாதங்கள்) சிறை தண்டனை விதித்தார். 

இந்த தீர்ப்பு, பல்வேறு தரப்பினரின் கவனத்தை ஈர்த்துள்ளது. கோம்ப்ஸ், பாலியல் விஷயங்களுக்காக பெண்களை அமெரிக்காவின் வெவ்வேறு மாநிலங்களுக்கு அனுப்பியதாகக் குற்றம்சாட்டப்பட்டு, ஜூலை 2 அன்று ரேக்கெட்டீரிங் மற்றும் செக்ஸ் டிராஃபிகிங் குற்றச்சாட்டுகளில் இருந்து விடுதலை செய்யப்பட்டாலும், இரண்டு குற்றச்சாட்டுகளில் (பாலியல் சேவைக்காக போக்குவரத்து) குற்றவாளியாக அறிவிக்கப்பட்டார். 

நீதிபதி சுப்பிரமணியன், "பெண்களுக்கு எதிரான சுரண்டல் மற்றும் வன்முறைக்கு உண்மையான பொறுப்பேற்பு தேவை" எனக் கூறி, இந்த தண்டனையை விதித்தார். மேலும், 5 லட்சம் டாலர் அபராதமும், 5 ஆண்டுகள் மேற்பார்வை விடுதலையும் அறிவிக்கப்பட்டது.

இதையும் படிங்க: களத்தில் இறங்கிய தேசிய தாழ்த்தப்பட்டோர் ஆணையம்... கரூர் சம்பவ இடத்தில் ஆய்வு...!

கோம்ப்ஸ், விசாரணையின் போது, "நான் என் வழியை இழந்துவிட்டேன். போதைப்பொருள் அதிகரிப்பால் தவறான பாதையில் சென்றேன்" என வருத்தம் தெரிவித்தார். அவரது வழக்கறிஞர்கள், 14 மாதங்கள் சிறை போதுமானது என வாதிட்டனர், ஆனால் புரோசிக்யூட்டர்கள் 11 ஆண்டுகள் தண்டனை கோரினர். 

நீதிபதி, கோம்ப்ஸின் சுயமுயற்சி வாழ்க்கை மற்றும் சமூக பங்களிப்புகளை அங்கீகரித்தாலும், சாட்சிகளின் வாக்குமூலங்கள் மற்றும் வீடியோ சான்றுகளை (காசி வென்ச்சுராவுக்கு எதிரான வன்முறை) அடிப்படையாகக் கொண்டு கடுமையான தண்டனையை விதித்தார். இந்த தீர்ப்பு, அமெரிக்காவின் பாலியல் குற்ற வழக்குகளில் முக்கியமானதாகக் கருதப்படுகிறது.

இந்த வழக்கை விசாரித்த நீதிபதி அருண் சுப்பிரமணியன், தமிழக வம்சாவளியைச் சேர்ந்த முதல் தென்கிழக்காசிய அமெரிக்க நீதிபதியாக 2022 ஜனவரியில் ஜோ பைடன் அதிபரால் நியமிக்கப்பட்டவர். 45 வயதான சுப்பிரமணியன், அதிகாரத்தை பொருட்படுத்தாமல் "சட்டம் அனைவருக்கும் சமம்" என்பதை அடிப்படையாகக் கொண்டு பல்வேறு வழக்குகளை கையாண்டு வருகிறார். 

மோசடி வழக்குகளில் 1 பில்லியன் டாலர்களுக்கு மேல் மீட்டதில் அவரது பங்கு குறிப்பிடத்தக்கது. சமீபத்தில், வழக்கறிஞர்கள் குழு குறித்து அவதூறு பேசிய பாதுகாப்பு ஆலோசகர் மார்க் ஜெராகோஸை தனிப்பட்ட முறையில் கண்டித்ததும் தலைப்புகளில் இடம்பெற்றது.

அருண் சுப்பிரமணியன் யார்?
அருண் சுப்பிரமணியன், 1979 அக்டோபரி 29 அன்று அமெரிக்காவின் பென்சில்வேனியா மாநிலத்தின் பிட்ஸ்பர்க் நகரில் தமிழக வம்சாவளியைச் சேர்ந்த குடும்பத்தில் பிறந்தவர். தந்தை சுப்பிரமணியன், கம்ப்யூட்டர் இன்ஜினியராக பணியாற்றியவர். தாய் சுந்தரி. மனைவி சவுமியா. 

2001ம் ஆண்டு ஓகியோவின் கேஸ் வெஸ்டர்ன் ரிசர்வ் பல்கலைக்கழகத்தில் கம்ப்யூட்டர் சயின்ஸ் மற்றும் ஆங்கிலத்தில் இளங்கலைப் பட்டம் பெற்றார். 2004ம் ஆண்டு கொலம்பியா சட்டப்பள்ளியில் சட்டப் பட்டம் பெற்றவர். 2004-2005 வரை அமெரிக்க மேல்முறையீட்டு நீதிமன்றத்தில் சட்ட எழுத்தராக, 2005-2006 வரை நியூயார்க் மாவட்ட நீதிமன்ற நீதிபதி இயெரார்டு லிஞ்சின் கீழ், 2006-2007 வரை அமெரிக்க உச்சநீதிமன்ற நீதிபதி ரூத் பேடர் கின்ச்பர்க்கின் சட்ட எழுத்தராக பணியாற்றினார். இந்த அனுபவங்கள் அவரது நீதித்துறை வாழ்க்கையில் முக்கியமானவை.

2014ம் ஆண்டு வட அமெரிக்க தமிழ் சங்கங்களின் கூட்டமைப்பு சார்பில் 'அமெரிக்க முன்னோடி தமிழர் விருது' பெற்ற சுப்பிரமணியன், 2007-2022 வரை சுஸ்மன் காட்ஃப்ரி சட்ட நிறுவனத்தில் பங்குதாரராக பணியாற்றி, மோசடி வழக்குகளில் பெரும் வெற்றிகளைப் பெற்றார். 

அவரது அமர்வில் விசாரிக்கப்படும் வழக்குகள் அனைத்தும் தேசிய அளவில் கவனிக்கப்படுவது வழக்கம். சட்டத்தின் சமநிலையை வலியுறுத்தி, பல தீர்ப்புகளை வழங்கியுள்ளார். இந்திய வம்சாவளியினர் அமெரிக்க நீதித்துறையில் சாதனை புரியும் இந்த சம்பவம், தமிழ் சமூகத்தில் பெருமையை ஏற்படுத்தியுள்ளது.

இதையும் படிங்க: உத்தரகாண்டில் ஆதவ் அர்ஜுனா... உண்மை வெளிவரும் என திட்டவட்டம்...!