அரசு விழாவா? தவெக மாநாடா? அதிகாரிகளுடன் வாக்குவாதம் செய்து ஓ.எஸ். மணியன் வெளிநடப்பு!

நாகப்பட்டினம் மாவட்டம் தலைஞாயிறில் சமூக நலன் மற்றும் மகளிர் உரிமைத் துறை சார்பில் நடைபெற்ற அரசு சமுதாய வளைகாப்பு விழாவின் மேடையை, தமிழக வெற்றிக் கழகத்தினர் (தவெக) முற்றிலுமாக ஆக்கிரமித்து அமர்ந்திருந்ததைக் கண்டு கொதித்தெழுந்த வேதாரண்யம் தொகுதி சட்டமன்ற உறுப்பினரும் முன்னாள் அமைச்சருமான ஓ.எஸ். மணியன், அதிகாரிகளுடன் காரசார வாக்குவாதத்தில் ஈடுபட்டு நிகழ்ச்சியை முற்றிலுமாகப் புறக்கணித்து ஆவேசமாக வெளிநடப்பு செய்தார்; இந்த அதிரடிச் சம்பவம் நாகை மாவட்ட அரசியல் வட்டாரத்தில் பெரும் பரபரப்பையும் புயலையும் கிளப்பியுள்ளது.

நாகப்பட்டினம் மாவட்டம் தலைஞாயிறு ஊராட்சி ஒன்றியத்திற்கு உட்பட்ட தலைஞாயிறு பேரூராட்சி சமுதாயக் கூடத்தில், சமூக நலன் மற்றும் மகளிர் உரிமைத் துறை சார்பில் கர்ப்பிணிப் பெண்களுக்கு ஊட்டச்சத்து பெட்டகம் மற்றும் பாரம்பரியச் சீர்வரிசைகள் வழங்கும் சமுதாய வளைகாப்பு விழா இன்று காலை அரசு முறைப்படி ஏற்பாடு செய்யப்பட்டிருந்தது. அரசு நெறிமுறைகளின்படி, வேதாரண்யம் தொகுதி எம்.எல்.ஏ ஓ.எஸ். மணியன், மாவட்ட ஆட்சியர் மற்றும் துறை சார்ந்த உயர் அதிகாரிகளுக்கு அதிகாரப்பூர்வ அழைப்பு விடுக்கப்பட்டிருந்தது. எனினும், மாவட்ட ஆட்சியருக்கு அவசர அலுவல் கூட்டம் இருந்ததன் காரணமாக அவரால் இந்நிகழ்ச்சியில் நேரில் பங்கேற்க முடியவில்லை.

இந்நிலையில், விழா தொடங்குவதற்கு முன்பாகவே தமிழக வெற்றிக் கழகத்தைச் சேர்ந்த நூற்றுக்கும் மேற்பட்ட நிர்வாகிகள் மற்றும் தொண்டர்கள் விழா மேடையை முழுமையாக ஆக்கிரமித்து அமர்ந்திருந்தனர். நிகழ்ச்சி ஏற்பாட்டாளர்களான அரசு அதிகாரிகள், பொறுப்பு அதிகாரிகள் மற்றும் முறைப்படியான அழைப்பாளர்கள் மட்டுமே மேடையில் அமர வேண்டும். மற்றவர்களுக்குக் கீழே தனியாக இருக்கைகள் ஏற்பாடு செய்யப்பட்டுள்ளது, அங்கு சென்று அமருங்கள் எனக் கனிவுடன் கேட்டுக்கொண்டனர். ஆனால், அதிகாரிகளின் வேண்டுகோளைத் துளியும் பொருட்படுத்தாமல் தவெகவினர் மேடையிலேயே பிடிவாதமாக அமர்ந்திருந்தனர்.

இதையும் படிங்க: மதத்தை காரணம் காட்டுவதா.? சீராய்வு மனு தாக்கல்..! தமிழக அரசுக்கு ஸ்டாலின் வலியுறுத்தல்..!!

இந்தச் சூழலில், அரசு அழைப்பை ஏற்றுச் சிறப்பு அழைப்பாளராக விழாவிற்கு வருகை தந்த வேதாரண்யம் எம்.எல்.ஏ ஓ.எஸ். மணியன், அரசு மேடையில் துறைசார்ந்த உயர் அதிகாரிகள் எவருமின்றி குறிப்பிட்ட ஒரு புதிய அரசியல் கட்சியினர் மட்டுமே குழுமியிருந்ததைக் கண்டு கடும் அதிருப்தியும் ஆத்திரமும் அடைந்தார்.

அங்கிருந்த சமூக நலத்துறை அதிகாரிகளை நேரில் அழைத்து அவர் சரமாரியாகக் கேள்வி எழுப்பினார்: மாவட்ட ஆட்சியரும் அரசு அதிகாரிகளும் பங்கேற்பார்கள் என்று கூறி என்னை முறைப்படி அழைத்துவிட்டு, அரசு மேடை முழுவதும் தவெகவினரை ஆக்கிரமித்து அமர வைத்துள்ளீர்களே? இது அரசு நடத்தும் மக்கள் நல விழாவா அல்லது தவெகவின் உட்கட்சி மாநாடா? என்று பகிரங்கமாகக் கேட்டு அதிகாரிகளைத் திணறடித்தார்.

அதிர்ச்சியடைந்த அதிகாரிகள் அவரைச் சமாதானப்படுத்த முற்பட்டபோதும், மக்கள் வரிப்பணத்தில் நடத்தப்படும் அரசு விழாக்களில் நெறிமுறைகள் அப்பட்டமாக மீறப்படுவதை ஒரு மக்கள் பிரதிநிதியாக என்னால் வேடிக்கை பார்க்க முடியாது என்று திட்டவட்டமாகக் கூறிய ஓ.எஸ். மணியன், விழா மேடையைப் புறக்கணித்துவிட்டு தனது ஆதரவாளர்களுடன் ஆவேசமாக அங்கிருந்து வெளியேறினார். அரசு நலத்திட்ட விழாவில் ஒரு புதிய அரசியல் கட்சியின் மேடை ஆதிக்கமும், அதை எதிர்த்து அதிமுகவின் மூத்த சட்டமன்ற உறுப்பினர் வெளிநடப்பு செய்ததும் தமிழக அரசியல் களத்தில் மிக முக்கிய விவாதப் பொருளாக உருவெடுத்துள்ளது.

இதையும் படிங்க: செங்கோட்டையன் பேச்சால் சர்ச்சை! ஆளுநரை சந்திக்கிறார் அதிமுக கொறடா? தமிழக அரசியலில் திடீர் திருப்பம்!