ரூ.755 கோடி டெண்டர் ஜோய் ஆலுக்காஸ் வசமா? ‘தாய்மாமன் தங்க மோதிரம்’ திட்டத்தில் எதிர்பார்ப்பு..!!
மொத்தம் 4,41,667 ஒரு கிராம் எடைகொண்ட தங்க மோதிரங்களை வாங்கும் பொருட்டு விண்ணப்பங்கள் கோரப்பட்டன.
- Fri, 21 Aug 2026 11:26:40 IST
by
Shanthi M.
- #
தமிழ்நாட்டில் பிறக்கும் ஒவ்வொரு குழந்தைக்கும் ஒரு கிராம் தங்க மோதிரம் வழங்கும் ‘தாய்மாமன் தங்க மோதிரம்’ திட்டத்திற்கான கொள்முதல் டெண்டரை ஜோய் ஆலுக்காஸ் நிறுவனம் பெறும் வாய்ப்பு அதிகம் உள்ளதாக தகவல்கள் வெளியாகியுள்ளன. தங்கத்தின் அடிப்படை விலையைத் தவிர்த்து, சேதாரம் மற்றும் இதர செலவுகளுக்கு வெறும் ஒரு பைசா மட்டுமே மேற்கோள் காட்டியதால், இந்த நிறுவனம் எல்1 ஏலதாரராக தேர்வு செய்யப்பட்டுள்ளதாக தெரிகிறது.
அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது. தமிழ்நாடு வெற்றிக் கழகத்தின் சட்டசபைத் தேர்தல் வாக்குறுதியாக அறிவிக்கப்பட்ட இந்தத் திட்டம், ஜூன் 23-ஆம் தேதி அரசால் முறையாக அறிவிக்கப்பட்டது. மாநிலத்தில் நிரந்தரமாக வசிக்கும் குடும்பங்களைச் சேர்ந்த பெண்களுக்குப் பிறக்கும் குழந்தைகளுக்கு 22 காரட் தூய்மையுள்ள, 916 தரச்சான்றிதழுடன் கூடிய ஒரு கிராம் தங்க மோதிரம் வழங்கப்படும்.
பேரறிஞர் அண்ணாவின் பிறந்தநாளான செப்டம்பர் 15-ஆம் தேதி முதல்வர் விஜய் அவர்களால் இத்திட்டம் தொடங்கி வைக்கப்பட உள்ளது. ஆண்டுக்கு ரூ.755.83 கோடி நிதி ஒதுக்கீடு செய்யப்பட்டுள்ளது.ஜூன் 22 முதல் அரசு மருத்துவமனைகளில் பிறந்த அனைத்துக் குழந்தைகளும் இத்திட்டத்தால் பயன்பெறுவார்கள். இதற்காக ஜூலை 14-ஆம் தேதி டெண்டர் அழைக்கப்பட்டது. மொத்தம் 4,41,667 ஒரு கிராம் எடைகொண்ட தங்க மோதிரங்களை வாங்கும் பொருட்டு விண்ணப்பங்கள் கோரப்பட்டன.
இதையும் படிங்க: சென்னை மெட்ரோவின் அடுத்த மெகா திட்டம்... கிளாம்பாக்கம் - செங்கல்பட்டு மெட்ரோ பணிகள்..!! எகிறும் எதிர்பார்ப்பு..!!
டெண்டர் சமர்ப்பிக்கும் காலம் ஆகஸ்ட் 18, காலை 11 மணியுடன் முடிவடைந்தது.இந்தப் பின்னணியில், ஜோய் ஆலுக்காஸ் நிறுவனம் சமர்ப்பித்த மேற்கோளில் தங்க விலையைத் தவிர சேதாரம் மற்றும் இதர கட்டணங்களுக்கு வெறும் 1 பைசா மட்டுமே குறிப்பிடப்பட்டுள்ளது. இதனால் குறைந்த செலவுடன் எல்1 ஆக அந்த நிறுவனம் தேர்ந்தெடுக்கப்பட்டுள்ளதாக தகவல். திட்டம் தொடங்க இன்னும் சுமார் 25 நாட்களே உள்ள நிலையில், அதிகாரப்பூர்வ அறிவிப்பு அடுத்த சில நாட்களில் வெளியிடப்படும் என பார்க்கப்படுகிறது.
இந்தத் திட்டம் தமிழக குழந்தைகளின் எதிர்காலத்துக்கு சிறிய ஆனால் அர்த்தமுள்ள பரிசாக அமையும் என அரசு தரப்பில் நம்பப்படுகிறது. தங்க மோதிரங்களின் தரம், விநியோக நடைமுறை மற்றும் பெறுநர்களின் பதிவு போன்ற விவரங்கள் விரைவில் தெளிவுபடுத்தப்படும்.
இதையும் படிங்க: புனித ஜார்ஜ் கோட்டையில் முக்கிய மாற்றம்..! புதிய இடத்திற்கு மாறும் முதல்வர் அலுவலகம்..! ரூ.5.54 கோடிக்கு டெண்டர்..!!
