‘உலகநாயகன்’ பட்டத்தை பயன்படுத்தத் தடை!  ‘நீயே விடை’ நிறுவனத்திற்கு எதிராக கமல்ஹாசன் வழக்கு!

தனது பெயர், புகைப்படம் மற்றும் ‘உலகநாயகன்’ என்ற பட்டத்தை வர்த்தக ரீதியாகப் பயன்படுத்தத் தடை விதிக்கக் கோரி நடிகரும், மக்கள் நீதி மய்யம் தலைவருமான கமல்ஹாசன் சென்னை உயர் நீதிமன்றத்தில் வழக்குத் தொடர்ந்துள்ளார்.

சினிமா மற்றும் பொதுவாழ்வில் பல தசாப்தங்களாகத் தனக்கென ஒரு தனித்துவமான பிம்பத்தை (Personality Rights) உருவாக்கியுள்ள கமல்ஹாசன், அதனைத் தனது அனுமதியின்றிப் பிறர் பயன்படுத்துவதைத் தடுக்க இந்தச் சட்டப் போராட்டத்தைக் கையில் எடுத்துள்ளார். சென்னையைத் தலைமையிடமாகக் கொண்டு செயல்படும் ஒரு தனியார் நிறுவனம், இவரது புகழைப் பயன்படுத்தி லாபம் ஈட்டுவதாகக் கிளம்பியுள்ள புகார், திரையுலகினர் மத்தியில் பெரும் பரபரப்பை ஏற்படுத்தியுள்ளது.

கமல்ஹாசன் தாக்கல் செய்துள்ள மனுவில், சென்னையைச் சேர்ந்த ‘நீயே விடை’ (Neeye Vidai) என்ற நிறுவனம், தனது அனுமதியின்றித் தனது புகைப்படங்கள், ‘உலகநாயகன்’ என்ற பட்டம் மற்றும் திரைப்படங்களில் தான் பேசிய புகழ்பெற்ற வசனங்களை அச்சிட்டு டி-சர்ட் மற்றும் சட்டைகளை விற்பனை செய்து வருவதாகக் குறிப்பிட்டுள்ளார். இது தனது ஆளுமை உரிமைகளைப் (Personality Rights) பாதிப்பதோடு, அந்தத் தயாரிப்புகளைத் தான் விளம்பரப்படுத்துவது போன்ற ஒரு தவறான பிம்பத்தை மக்களிடையே உருவாக்குவதாக அவர் வேதனை தெரிவித்துள்ளார். தனது வெளிப்படையான ஒப்புதல் இல்லாமல், தனது பெயர், முதலெழுத்துக்கள் (KH) மற்றும் படங்களை வணிக ரீதியாகவோ அல்லது தனிப்பட்ட லாபத்திற்காகவோ யாரும் பயன்படுத்த அனுமதிக்கக் கூடாது என்று அந்த மனுவில் வலியுறுத்தப்பட்டுள்ளது.

இதையும் படிங்க: "கொரோனா போராளியின் குடும்பத்திற்கு என்ன செய்தீர்கள்?" தமிழக அரசு பதிலளிக்க ஹைகோர்ட் உத்தரவு!

இந்த வழக்கின் முக்கிய அம்சமாக, ‘நீயே விடை’ நிறுவனம் மட்டுமின்றி, அடையாளம் தெரியாத நபர்கள் அல்லது பிற நிறுவனங்களும் தனது ஆளுமைப் பண்புகளைப் பயன்படுத்தக் கூடாது என நிரந்தரத் தடை கோரி ‘ஜான் டோ’ (John Doe Suit) மனுவைத் தாக்கல் செய்துள்ளார். 71 வயதாகும் கமல்ஹாசன், தனது சிறு வயது முதலே உழைப்பால் செதுக்கிய இந்த அடையாளத்தை யாரும் லாபத்திற்காகச் சுரண்டக் கூடாது என்பதில் உறுதியாக உள்ளார். இந்த மனுவை ஏற்றுக்கொண்டுள்ள நீதிபதி செந்தில்குமார் ராமமூர்த்தி, நடிகரின் இந்த வழக்கினை நாளை (திங்கள்கிழமை, ஜனவரி 12, 2026) விசாரிப்பார் என்று எதிர்பார்க்கப்படுகிறது. ஏற்கனவே பாலிவுட் நட்சத்திரங்கள் இதுபோன்ற உரிமையியல் வழக்குகளைத் தொடர்ந்து வெற்றி பெற்றுள்ள நிலையில், கமல்ஹாசனின் இந்த வழக்கு தமிழ் சினிமாவில் ஒரு முக்கிய முன்னுதாரணமாகப் பார்க்கப்படுகிறது.

இதையும் படிங்க: "ஸ்டெர்லைட் விவகாரத்தில் அதிரடி!" தமிழகத்தில் புதிய ஆலை தொடங்க வேதாந்தாவிற்கு அனுமதி?