சி. விஜயபாஸ்கர் மீதான ரூ.4 கோடி மோசடி வழக்கு முடித்து வைப்பு: சென்னை உயர்நீதிமன்றம்  உத்தரவு!

தமிழக முன்னாள் அமைச்சரும், தமிழக வெற்றிக் கழகத்தின் (தவெக) முக்கிய நிர்வாகியுமான டாக்டர் சி.விஜயபாஸ்கருக்கு எதிராகத் தொடரப்பட்ட ரூ.4 கோடி ரூபாய் பண மோசடி வழக்கில் எந்தவித முகாந்திரமும் இல்லை என்று காவல்துறை தரப்பில் திட்டவட்டமாகத் தெரிவிக்கப்பட்டதை அடுத்து, அவ்வழக்கை முழுமையாக முடித்துவைத்துச் சென்னை உயர்நீதிமன்றம் அதிரடி உத்தரவு பிறப்பித்துள்ளது.

முன்னாள் மக்கள் நல்வாழ்வுத்துறை அமைச்சரான சி.விஜயபாஸ்கர் மீது கடந்த காலங்களில் தொழில் ரீதியான நிதி பரிவர்த்தனைகள் தொடர்பாக ரூ.4 கோடி ரூபாய் வரை மோசடி செய்ததாகக் கூறி காவல் துறையில் புகார் அளிக்கப்பட்டு, அது தொடர்பாகச் சென்னை உயர்நீதிமன்றத்திலும் வழக்கு தொடரப்பட்டிருந்தது.

அரசியல் ரீதியாகப் பெரும் பரபரப்பை ஏற்படுத்திய இந்த விவகாரத்தில், தன் மீதான குற்றச்சாட்டு அடிப்படை ஆதாரமற்றது என்றும், காழ்ப்புணர்ச்சியோடு தொடரப்பட்ட இந்த வழக்கை ரத்து செய்து முடிக்க வேண்டும் என்றும் விஜயபாஸ்கர் தரப்பில் நீதிமன்றத்தில் வலுவாக வாதிடப்பட்டது. இந்நிலையில், இந்த வழக்கு சென்னை உயர்நீதிமன்றத்தில் இன்று மீண்டும் விசாரணைக்கு வந்தது.

இதையும் படிங்க: சொத்து வரி வழக்கில் வழக்கறிஞர்கள் ஆஜராகாததால் மாநகராட்சி ஆணையர்களுக்கு ஐகோர்ட் சம்மன்!

அப்போது அரசுத் தரப்பு மற்றும் காவல்துறை சார்பில் விரிவான அறிக்கை நீதிமன்றத்தில் சமர்ப்பிக்கப்பட்டது; அதில், "மனுதாரர் தரப்பில் வைக்கப்பட்ட குற்றச்சாட்டுகள் குறித்துக் காவல்துறை ஆவணங்கள் மற்றும் சாட்சிகளின் அடிப்படையில் முழுமையான விரிவான ஆரம்பக்கட்ட விசாரணையை மேற்கொண்டது; அந்த விசாரணையின் முடிவில், முன்னாள் அமைச்சர் சி.விஜயபாஸ்கர் மீது கூறப்பட்டுள்ள ரூ.4 கோடி மோசடிப் புகாரில் எந்தவித உண்மைத்தன்மையும் முகாந்திரமும் இல்லை என்பது தெளிவாகத் தெரியவந்துள்ளது" எனத் தெரிவிக்கப்பட்டது.

காவல்துறையின் இந்த அதிகாரப்பூர்வ விசாரணை அறிக்கையைப் பதிவு செய்துகொண்ட உயர்நீதிமன்றம், புகாரில் முகாந்திரம் இல்லாத காரணத்தால் இந்த வழக்கை மேற்கொண்டு நடத்தத் தேவையில்லை எனக் குறிப்பிட்டு, சி.விஜயபாஸ்கருக்கு எதிரான மோசடி வழக்கை அடியோடு முடித்து வைத்து தீர்ப்பளித்தது.
 

இதையும் படிங்க: பட்டினப்பாக்கத்தில் புதிய தலைமை செயலகத்திற்கு எதிர்ப்பு! சென்னை உயர்நீதிமன்றத்தில் திமுக வழக்கு!