விசாரணையின்றி டாஸ்மாக் ஊழியர்களை பணிநீக்கம் செய்ய கூடாது! சென்னை உயர்நீதிமன்றம் அதிரடி உத்தரவு!

மது பாட்டில்களுக்குக் கூடுதல் கட்டணம் வசூலித்ததாகக் கூறப்படும் புகாரில், நியாயமான மற்றும் முறையான ஒழுங்கு நடவடிக்கை விசாரணை நடத்தாமல் டாஸ்மாக் பணியாளர்களை உடனடியாகப் பணிநீக்கம் செய்யக்கூடாது என்று சென்னை உயர்நீதிமன்றம் அதிரடியாக உத்தரவிட்டுள்ளது.

தமிழ்நாடு மாநில வாணிபக் கழகத்தின் மதுபானக் கடைகளில் நிர்ணயிக்கப்பட்ட அதிகபட்ச சில்லறை விலையை விடக் கூடுதலாக மதுபானங்களை விற்பனை செய்தால், தொடர்புடைய விற்பனையாளர்கள் மற்றும் ஊழியர்கள் உடனடியாகப் பணிநீக்கம் செய்யப்படுவார்கள் என டாஸ்மாக் நிர்வாகம் சுற்றறிக்கை ஒன்றை வெளியிட்டிருந்தது.

இந்தச் சுற்றறிக்கைக்கு எதிராகத் தமிழ்நாடு டாஸ்மாக் விற்பனையாளர்கள் நலச் சங்கம் சார்பில் சென்னை உயர்நீதிமன்றத்தில் மனு தாக்கல் செய்யப்பட்டது. அந்த மனுவில், ஊழியர்களின் தரப்பு நியாயத்தைக் கேட்காமல், எந்தவித முறையான துறைசார் விசாரணையையும் மேற்கொள்ளாமல் நேரடியாகப் பணிநீக்கம் போன்ற கடுமையான தண்டனைகளை விதிப்பது இயற்கை நீதிக்கு எதிரானது என்றும், எனவே அந்தச் சுற்றறிக்கைக்குத் தடை விதிக்க வேண்டும் என்றும் கோரிக்கை விடுக்கப்பட்டது.

இதையும் படிங்க: ரூ.1 கோடி நஷ்ட ஈடு..? தவெக அமைச்சர்களுக்கு செக்... வழக்கு தொடர திமுகவுக்கு கிரீன் சிக்னல்..!!

இந்த வழக்கை விசாரித்த நீதிபதி கே. சுரேந்தர், டாஸ்மாக் ஊழியர்களின் பணிப் பாதுகாப்பு மற்றும் ஒழுங்கு நடவடிக்கைகளுக்கான நெறிமுறைகளைச் சுட்டிக்காட்டி முக்கிய உத்தரவைப் பிறப்பித்தார்.அப்போது நீதிபதி தனது உத்தரவில், டாஸ்மாக் சுற்றறிக்கையின் அடிப்படையில் எடுக்கப்படும் எந்தவொரு ஒழுங்கு நடவடிக்கையும் இயற்கை நீதியின் கோட்பாடுகளை முழுமையாகப் பின்பற்றியே அமைய வேண்டும்;

குற்றச்சாட்டுகளுக்கு ஆளாகும் ஊழியர்களுக்கு விளக்கம் அளிக்க உரிய வாய்ப்பு வழங்கப்பட வேண்டும். முறையான, நியாயமான மற்றும் பாரபட்சமற்ற விசாரணைக்குப் பிறகே குற்றத்தின் தன்மைக்கேற்ப உரிய தண்டனைகள் விதிக்கப்பட வேண்டும்; மாறாக, தன்னிச்சையாக ஊழியர்களைப் பணிநீக்கம் செய்யக்கூடாது என்று திட்டவட்டமாக உத்தரவிட்டார்.

டாஸ்மாக் பணியாளர்களை உடனடியாகப் பணிநீக்கம் செய்யும் நடவடிக்கைகளுக்கு முற்றுப்புள்ளி வைக்கும் வகையில் சென்னை உயர்நீதிமன்றம் பிறப்பித்துள்ள இந்தத் தீர்ப்பு, மாநிலம் முழுவதும் உள்ள டாஸ்மாக் விற்பனையாளர்கள் மற்றும் பணியாளர்களிடையே நிம்மதியையும் வரவேற்பையும் ஏற்படுத்தியுள்ளது.

இதையும் படிங்க: வெற்றிப் பயணத்திற்கு தடை கோரி வழக்கு..! ட்விஸ்ட்... மனுவை வாபஸ் பெற்ற மனுதாரர்..!!