தவெக அமைச்சர்களுக்கு மு.க.ஸ்டாலின் மருமகன் சபரீசன் நோட்டீஸ்!! ஆதாரமற்ற குற்றச்சாட்டு சுமத்துவதாக புகார்!

தமிழக அரசியலில் புதிய பரபரப்பை ஏற்படுத்தும் வகையில், முதல்வர் மு.க. ஸ்டாலினின் மருமகன் சபரீசன் சார்பில், அவரது வழக்கறிஞர் அமைச்சர் நிர்மல்குமாருக்கு சட்ட நோட்டீஸ் அனுப்பியுள்ளார். மின் துறை தொடர்பான வெள்ளை அறிக்கை வெளியிடப்பட்டபோது சபரீசன் குறித்து ஆதாரமற்ற மற்றும் அவதூறான குற்றச்சாட்டுகள் முன்வைக்கப்பட்டதாக அந்த நோட்டீசில் தெரிவிக்கப்பட்டுள்ளது.

வழக்கறிஞர் அஸ்வின் பிரசன்னா அனுப்பியுள்ள நோட்டீசில், அமைச்சர் நிர்மல்குமார் தொடர்ந்து தி.மு.க. மற்றும் அதன் நிர்வாகிகள் மீது ஆதாரமற்ற குற்றச்சாட்டுகளை முன்வைத்து வருவதாக கூறப்பட்டுள்ளது. குறிப்பாக, சபரீசனின் பெயருக்கும், அவரது குடும்பத்தின் நற்பெயருக்கும் களங்கம் ஏற்படுத்தும் நோக்கில் உண்மைக்கு புறம்பான கருத்துகள் வெளியிடப்பட்டதாக குற்றம்சாட்டப்பட்டுள்ளது.

மேலும், கடந்த 25-ஆம் தேதி நடைபெற்ற செய்தியாளர் சந்திப்பின்போது அமைச்சர் நிர்மல்குமார் தெரிவித்த கருத்துகள் முழுமையாக பொய்யானவை என்றும், அவை எந்த ஆதாரமும் இல்லாதவை என்றும் நோட்டீசில் குறிப்பிடப்பட்டுள்ளது. இதுபோன்ற குற்றச்சாட்டுகள் ஒருவரின் நற்பெயருக்கு பாதிப்பை ஏற்படுத்துவதோடு, சட்டரீதியாகவும் தண்டனைக்குரிய செயலாக கருதப்படலாம் எனவும் வலியுறுத்தப்பட்டுள்ளது.

இதையும் படிங்க: அமைச்சர்கள் ஆதவ் அர்ஜுனா, நிர்மல்குமாருக்கு சபரீசன் தரப்பில் வக்கீல் நோட்டீஸ்!

இதன் காரணமாக, அமைச்சர் நிர்மல்குமார் சபரீசனிடம் நிபந்தனையற்ற மன்னிப்பு கேட்க வேண்டும் என்றும், எதிர்காலத்தில் இதுபோன்ற கருத்துகளை வெளியிட மாட்டேன் என்று எழுத்துப்பூர்வமாக உறுதி அளிக்க வேண்டும் என்றும் சட்ட நோட்டீசில் கோரப்பட்டுள்ளது. அவ்வாறு செய்யத் தவறினால், உரிய சட்ட நடவடிக்கைகள் மேற்கொள்ளப்படும் என்றும் எச்சரிக்கப்பட்டுள்ளது.

இந்த விவகாரத்தில் அமைச்சர் ஆதவ் அர்ஜுனாவுக்கும் தனியாக சட்ட நோட்டீஸ் அனுப்பப்பட்டுள்ளதாக தகவல் வெளியாகியுள்ளது. இதனால், மின் துறை வெள்ளை அறிக்கை தொடர்பாக தொடங்கிய அரசியல் விவாதம் தற்போது சட்டரீதியான மோதலாக மாறியிருப்பது கவனம் பெற்றுள்ளது.

இந்த நோட்டீசுக்கு அமைச்சர் நிர்மல்குமார் அல்லது அமைச்சர் ஆதவ் அர்ஜுனா தரப்பில் இதுவரை அதிகாரப்பூர்வ பதில் வெளியாகவில்லை. அடுத்தகட்டமாக அவர்கள் எவ்வாறு பதிலளிக்கப் போகிறார்கள் என்பதையும், இந்த விவகாரம் நீதிமன்றம் வரை செல்கிறதா என்பதையும் அரசியல் வட்டாரங்கள் உன்னிப்பாக கவனித்து வருகின்றன.

இதையும் படிங்க: "மூன்று மாதத்தில் தேர்தல் வந்தாலும் வரலாம்; திமுக முழுமையாகத் தயாராக இருக்க வேண்டும் - மு.க.ஸ்டாலின்!