புதுச்சேரியில் மீண்டும் ரங்கசாமி ஆட்சி! தேசிய ஜனநாயக கூட்டணி தலைவராக ஒருமனதாக தேர்வு!

புதுச்சேரி யூனியன் பிரதேசத்தின் அரசியல் களம் தற்போது புதிய வேகமெடுத்துள்ளது. நடந்து முடிந்த சட்டமன்றத் தேர்தலில் பெரும்பான்மை பலத்தைப் பெற்றுள்ள தேசிய ஜனநாயக கூட்டணியின் (NDA) ஆலோசனைக் கூட்டம் இன்று காமராஜர் சாலையில் உள்ள ஒரு தனியார் ஓட்டலில் நடைபெற்றது. இந்தக் கூட்டத்தில், புதுச்சேரியின் அடுத்த முதலமைச்சராகவும், தேசிய ஜனநாயக கூட்டணியின் சட்டமன்றக் குழுத் தலைவராகவும் என்.ஆர். காங்கிரஸ் தலைவர் என். ரங்கசாமி அவர்கள் ஒருமனதாகத் தேர்ந்தெடுக்கப்பட்டார்.

புதுச்சேரியின் மொத்தம் உள்ள 30 சட்டமன்றத் தொகுதிகளில், ஆட்சி அமைக்கத் தேவையான மேஜிக் நம்பரான 16-ஐத் தாண்டி, தேசிய ஜனநாயக கூட்டணி 18 இடங்களைக் கைப்பற்றி 'கிளீன் ஸ்வீப்' செய்துள்ளது. இதில் என்.ஆர். காங்கிரஸ் 12 இடங்களிலும், அதன் கூட்டணிக் கட்சிகளான பாஜக 4 இடங்களிலும், அதிமுக மற்றும் லோக் ஜனசக்தி (லஜக) தலா 1 இடத்திலும் வெற்றி வாகை சூடியுள்ளன. இந்த அபார வெற்றியின் மூலம் 'மக்களின் முதல்வர்' என அழைக்கப்படும் ரங்கசாமி தலைமையில் மீண்டும் கூட்டணி ஆட்சி அமைவது உறுதியாகியுள்ளது.

இதையும் படிங்க: அதிமுக எம்.எல்.ஏ-க்களுடன் இபிஎஸ் ஆலோசனை.. தவெக ஆட்சி அமைப்பதை தடுக்க வியூகம்!

கூட்டத்தில் பங்கேற்ற என்.ஆர். காங்கிரஸ், பாஜக, அதிமுக மற்றும் லஜக ஆகிய நான்கு கட்சிகளின் எம்.எல்.ஏ-க்களும் ஒருமித்த குரலில் ரங்கசாமியின் தலைமையை ஆதரித்தனர். இதையடுத்து, விரைவில் அவர் துணைநிலை ஆளுநரைச் சந்தித்து ஆட்சி அமைக்க உரிமை கோர உள்ளார். புதுச்சேரி அரசியலில் நிலையான மற்றும் வளர்ச்சியை நோக்கிய ஆட்சியை வழங்குவோம் எனக்கூறி 'ஜனநாயகக் கடமையை' நிறைவேற்ற இக்கூட்டணி ஆயத்தமாகி வருகிறது. ரங்கசாமியின் இந்த தேர்வு புதுச்சேரி அரசியலில் ஒரு புதிய அத்தியாயத்தைத் தொடங்கி வைத்துள்ளது.

இதையும் படிங்க: புதுச்சேரியில் வாக்கு எண்ணிக்கை தீவிரம்..!! மீண்டும் என்.ஆர் காங்கிரஸ் கூட்டணி ஆட்சி..??