தேங்காய் தண்ணீரில் மருத்துவ அற்புதம்... பொள்ளாச்சி இளைஞரின் உலக சாதனை! நயினார் பாராட்டு..!!

தேங்காய்த் தண்ணீரிலிருந்து மருத்துவ அற்புதம் உருவாக்கிய பொள்ளாச்சி இளம் சாதனையாளர் விவேகானந்தனுக்கு தமிழக பாஜக தலைவர் நயினார் நாகேந்திரன் மனமார்ந்த வாழ்த்துக்களைத் தெரிவித்துள்ளார்.பொள்ளாச்சியைச் சேர்ந்த ஆர்டர் பயோமெட் நிறுவனத்தின் தலைவர் விவேகானந்த் மற்றும் அவரது ஆய்வுக் குழுவினர், வேளாண் உற்பத்தியில் வீணாகும் கழிவுப் பொருட்களைப் பயன்படுத்தி சர்க்கரை நோயாளிகளின் ஆறாத புண்களைக் குணப்படுத்தும் அதிநவீன உயிர்-மருத்துவக் கட்டுப் பொருளை வெற்றிகரமாக உருவாக்கியுள்ளனர்.

இந்தக் கண்டுபிடிப்பு சர்வதேச அளவில் பெரும் பாராட்டைப் பெற்றுள்ளது என நயினார் நாகேந்திரன் குறிப்பிட்டார்.கொப்பரை உற்பத்தியின் போது வீணாகும் தேங்காய்த் தண்ணீரை நொதிக்கச் செய்து, தேங்காய் எண்ணெயின் லாரிக் அமிலத்தை இணைத்து கோகோஹீல் என்ற நவீன மருந்துக் கட்டை உருவாக்கியுள்ளனர். சர்க்கரை நோய் காரணமாக ஏற்படும் கொடிய புண்கள், தீக்காயங்கள் மற்றும் அறுவை சிகிச்சைக் காயங்களை விரைவாக ஆற்றும் இந்தத் தயாரிப்பு காப்புரிமை பெற்றுள்ளது.

உள்நாட்டு மற்றும் வெளிநாட்டு மருத்துவமனைகளுக்கு ஏற்றுமதி செய்யப்படும் இந்தக் கண்டுபிடிப்பு தமிழகத்திற்குப் பெருமை சேர்க்கும் மாபெரும் சாதனை என்று அவர் பாராட்டினார்.மத்திய அரசின் மானிய உதவியுடன் மேற்கொள்ளப்பட்ட இந்த ஆராய்ச்சி, கழிவிலிருந்து மதிப்புமிக்க செல்வம் என்ற கொள்கையையும், பிரதமர் நரேந்திர மோடியின் தற்சார்பு பாரதம் மற்றும் மேக் இன் இந்தியா திட்டங்களின் உன்னத நோக்கத்தையும் மெய்ப்பித்துக் காட்டியுள்ளது.

இதையும் படிங்க: ஜெம் வீரமணி நிகழ்ச்சியில் தவெக அமைச்சர்கள் பங்கேற்பு: மூடி மறைக்கும் முயற்சியா?- நயினார் கேள்வி!

உலக மருத்துவ அரங்கில் முத்திரை பதித்துள்ள விவேகானந்த் போன்ற இளம் கண்டுபிடிப்பாளர்கள் நம் தேசத்தின் பெருமிதம் என நயினார் நாகேந்திரன் தெரிவித்தார்.மனித குலத்தின் துயர் துடைக்கும் இத்தகைய பயனுள்ள ஆராய்ச்சிகள் தொடர்ந்து மேற்கொள்ளப்படவும், அவரது நிறுவனம் உலகளாவிய உச்சங்களை எட்டவும் தனது இதயம் கனிந்த வாழ்த்துக்களை அவர் தெரிவித்துள்ளார்.

இதையும் படிங்க: "கள்" பொது சுகாதாரத்திற்கு தீங்கா.? விவசாய விரோதம்..! நயினார் கண்டனம்.!!