ரூ.1200 கோடி..! பட்டினப்பாக்கத்தில் புதிய தலைமை செயலகம்.. தமிழக அரசு அரசாணை வெளியீடு..!!

சென்னையின் புனித ஜார்ஜ் கோட்டையில் நீண்டகாலமாக இயங்கி வரும் தமிழ்நாடு தலைமைச் செயலகம் மற்றும் சட்டப்பேரவை வளாகம் இடநெருக்கடி மற்றும் பாரம்பரியக் கட்டுப்பாடுகளால் விரிவாக்கம் செய்ய இயலாத நிலையில் உள்ளது. இதனைக் கருத்தில் கொண்டு தமிழக அரசு நவீன ஒருங்கிணைந்த புதிய தலைமைச் செயலக வளாகத்தை அமைக்கும் திட்டத்தை முன்னெடுத்துள்ளது. இந்தத் திட்டத்திற்கான அதிகாரப்பூர்வ அரசாணை வெளியிடப்பட்டு, சென்னை பட்டினப்பாக்கம் பகுதியில் உள்ள ஃபோர்ஷோர் எஸ்டேட்டில் புதிய வளாகம் உருவாக்கப்படும் என உறுதி செய்யப்பட்டுள்ளது.

முதலமைச்சர் விஜய் சட்டப்பேரவையில் இந்தத் திட்டத்தை அறிவித்ததைத் தொடர்ந்து, அரசாணை மூலம் நிர்வாக அனுமதி வழங்கப்பட்டுள்ளது. அதன்படி, சுமார் ரூ.1,200 கோடி மதிப்பீட்டில் 20 லட்சம் சதுர அடி பரப்பளவில் புதிய சட்டப்பேரவை மற்றும் தலைமைச் செயலக வளாகம் கட்டப்படும். பட்டினப்பாக்கத்தில் தமிழ்நாடு வீட்டுவசதி வாரியம், சென்னை மாநகராட்சி மற்றும் வருவாய்த் துறைக்குச் சொந்தமான நிலங்கள் உள்ளிட்ட சுமார் 25 முதல் 26 ஏக்கர் பரப்பளவு இதற்காக ஒதுக்கப்பட்டுள்ளது.

சம்பந்தப்பட்ட அமைப்புகள் நிலப் பயன்பாட்டிற்கு அனுமதி வழங்கிய நிலையில் அரசாணை இதனை முறைப்படுத்தியுள்ளது.புதிய வளாகத்தின் பிரதான கட்டிடம் 15 மாடிகளைக் கொண்டதாக அமையும். இதில் சட்டப்பேரவை அமர்வு அறை, அனைத்து அரசுத் துறை அலுவலகங்கள், நவீன பாதுகாப்பு அமைப்புகள், தீயணைப்பு வசதிகள் மற்றும் போதுமான வாகன நிறுத்துமிடங்கள் இடம்பெறும். சாந்தோம் ஹை ரோட்டில் இருந்து எளிதாக அணுகக்கூடிய இந்த இடம் மெரினா கடற்கரைக்கு அருகில் அமைந்துள்ளதால் அணுகல் வசதி உயர்வாகக் கருதப்படுகிறது. அப்பகுதியில் போக்குவரத்து நெரிசலைச் சமாளிக்க கலங்கரை விளக்கம் முதல் அடையாறு வரை சுமார் 3.5 கிலோமீட்டர் உயர்மட்ட மேம்பாலம் அமைக்கும் திட்டமும் இணைந்து பரிசீலிக்கப்படுகிறது.

இதையும் படிங்க: முதல்வர் விஜய் தலைமையில் பனையூரில் முக்கிய கூட்டம்! தவெக கூட்டணிக்கு பெயர் முதல் தேர்தல் வியூகம் வரை ஆலோசனை!

இந்த அரசாணை தமிழகத்தின் நிர்வாகத் திறனை மேம்படுத்தும் முக்கிய நடவடிக்கையாக அமைந்துள்ளது. அனைத்துத் துறைகளும் ஒரே வளாகத்தில் இயங்குவதால் ஒருங்கிணைப்பு எளிதாகும். அலுவலர்களுக்கு நவீன பணிச்சூழல் கிடைக்கும். பொதுமக்கள் மற்றும் அதிகாரிகள் இடையேயான தொடர்பு மேம்படும். எதிர்கால வளர்ச்சிக்கும் போதுமான இடவசதி உருவாக்கப்படும். முன்னதாக பல்வேறு இடங்கள் பரிசீலிக்கப்பட்ட நிலையில், பட்டினப்பாக்கம் தேர்வு செய்யப்பட்டு அரசாணை மூலம் உறுதிப்படுத்தப்பட்டுள்ளது.

இதையும் படிங்க: அடி தூள்...!! - இனி அரசு மருத்துவமனைக்கு போறீங்களா?... இதை கட்டாயம் கொண்டு செல்லக்கூடாது...!