வெள்ள முன்னெச்சரிக்கை தீவிரம்: படகுகளுடன் சென்னைக்கு விரைந்த தேசிய பேரிடர் மீட்பு படை!

சென்னையில் வடகிழக்குப் பருவமழை தீவிரம் அடைந்து இடைவிடாது கனமழை கொட்டித் தீர்த்து வரும் சூழலில், ஏற்படக்கூடிய வெள்ளப்பெருக்கு மற்றும் பேரிடர் இடர்களை எதிர்கொண்டு பொதுமக்களின் பாதுகாப்பை உறுதி செய்யும் பொருட்டு, ராணிப்பேட்டை மாவட்டம் அரக்கோணத்தில் உள்ள தேசிய பேரிடர் மீட்புப் படையின் (NDRF) 04-வது பட்டாலியனில் இருந்து மூன்று சிறப்பு மீட்புக் குழுக்கள் சென்னைக்கு உடனடியாக அனுப்பி வைக்கப்பட்டுள்ளன.

தென்மேற்கு வங்கக்கடலில் நிலைகொண்டுள்ள வளிமண்டல மேலடுக்கு சுழற்சியால் சென்னை மற்றும் அதன் சுற்றுவட்டார மாவட்டங்களில் வரலாறு காணாத அளவுக்கு மழை கொட்டித் தீர்த்து வருகிறது. ஏற்கனவே நகரின் பல முக்கியச் சாலைகள் மற்றும் தாழ்வான பகுதிகள் வெள்ளக் காடாக மாறியுள்ள நிலையில், மேலும் சில தினங்களுக்கு அதீத கனமழை நீடிக்கும் என வானிலை ஆய்வு மையம் எச்சரிக்கை விடுத்துள்ளது.

இச்சூழலில், சூழ்நிலையின் தீவிரத்தை உணர்ந்து முன்னெச்சரிக்கை நடவடிக்கைகளைத் துரிதப்படுத்திய தமிழ்நாடு பேரிடர் மேலாண்மைத் துறை, மீட்புப் பணிகளுக்காகக் கூடுதல் பேரிடர் மீட்புப் படைகளை அனுப்பி வைக்குமாறு மத்திய அரசிடமும் என்டிஆர்எஃப் நிர்வாகத்திடமும் அவசரக் கோரிக்கை விடுத்தது.

இதையும் படிங்க: வடகிழக்கு பருவமழை 18% குறைவு! தமிழ்நாடு மழைப்பொழிவு குறித்து வானிலை மையம் தகவல்!

இக்கோரிக்கையை உடனடியாக ஏற்றுக்கொண்ட அரக்கோணம் அருகே நகரிகுப்பத்தில் அமைந்துள்ள 04-வது தேசிய பேரிடர் மீட்புப் படை பட்டாலியன் சீனியர் கமாண்டன்ட் அகிலேஷ் குமார், சென்னைக்கான மீட்புக் குழுக்களை உடனடியாக அனுப்பி வைக்க உத்தரவிட்டார். அதன்படி, தலா 30 வீரர்கள் வீதம் கொண்ட மூன்று குழுக்களாக மொத்தம் 90 சிறப்புப் பயிற்சி பெற்ற பேரிடர் மீட்பு வீரர்கள், அதிநவீன உபகரணங்கள், தகவல் தொடர்பு கருவிகள், மரங்களை அறுக்கும் இயந்திரங்கள் மற்றும் வெள்ள மீட்புக்கான காற்றடைக்கப்பட்ட ரப்பர் படகுகளுடன் சென்னைக்குப் புறப்பட்டுச் சென்றுள்ளனர்.

சென்னையை வந்தடையும் இந்த மூன்று குழுக்களும், மாநகராட்சி மற்றும் மாவட்ட நிர்வாகத்தின் வழிகாட்டுதலின்படி, மழைநீர் அதிகம் தேங்கக்கூடிய தாழ்வான பகுதிகளுக்கு உடனடியாகப் பிரித்து அனுப்பப்பட்டு பாதுகாப்புப் பணிகளில் ஈடுபடுத்தப்படவுள்ளனர். பருவமழைக் காலங்களில் வெள்ள நீரில் சிக்கும் பொதுமக்களைப் பத்திரமாக மீட்டு நிவாரண முகாம்களுக்குக் கொண்டு சேர்த்தல் மற்றும் அவசர மருத்துவ உதவிகளை வழங்குதல் ஆகிய பணிகளை இவர்கள் போர்க்கால அடிப்படையில் மேற்கொள்வார்கள்.

அரசு நிர்வாகம், உள்ளாட்சி அமைப்புகள் மற்றும் தேசிய பேரிடர் மீட்புப் படை ஆகியவை ஒருங்கிணைந்து களமிறங்கியுள்ளதால், பெருமழையால் ஏற்படும் எத்தகைய இடர்களையும் திறம்பட எதிர்கொள்ள அனைத்து முன்னேற்பாடுகளும் தலைநகரில் முழுவீச்சில் உறுதி செய்யப்பட்டுள்ளன.

இதையும் படிங்க: அடுத்த 48 மணி நேரத்தில் வடகிழக்கு பருவமழை தொடக்கம்! வானிலை மையம் அறிவிப்பு!