"வணிக மண்டலமான பட்டினப்பாக்கம்"..! வலுக்கும் எதிர்ப்பு... CMDA-வில் மீனவர்கள் மனு..!!
பட்டினபாக்கத்தை வணிக மண்டலமாக அறிவித்ததற்கு எதிர்ப்பு தெரிவித்து மீனவர்கள் மனு அளித்துள்ளனர்.
by
சென்னை பட்டினப்பாக்கத்தில் புதிய தலைமைச் செயலகம் மற்றும் சட்டமன்ற வளாகம் அமைக்கும் அரசின் திட்டம் தொடர்பாக மீனவ சமூகத்தினர் கடும் எதிர்ப்பு தெரிவித்து வருகின்றனர். குறிப்பாக அப்பகுதியில் தேர்வு செய்யப்பட்ட நிலத்தின் வகைப்பாட்டை வணிகப் பயன்பாட்டு மண்டலமாக மாற்றியதற்கு எதிராக போராட்டக் குழுவினர் தீவிரமாக செயல்பட்டு வருகின்றனர். புனித ஜார்ஜ் கோட்டையில் இயங்கி வரும் தற்போதைய தலைமைச் செயலகத்தில் இடப்பற்றாக்குறை உள்ளதால், பட்டினப்பாக்கம் பகுதியில் சுமார் 21.37 ஏக்கர் நிலத்தில் ரூ.1,200 கோடி மதிப்பீட்டில் புதிய வளாகம் அமைக்கப்படும் என்று அறிவிக்கப்பட்டது.
இந்த நிலம் முன்பு குடியிருப்பு, நிறுவனப் பயன்பாடு மற்றும் திறந்தவெளி பொழுதுபோக்கு மண்டலங்களாக வகைப்படுத்தப்பட்டிருந்தது. அதை வணிகப் பயன்பாட்டு மண்டலமாக மாற்றி அமைக்க சென்னை பெருநகர வளர்ச்சிக் குழுமம் ஒப்புதல் அளித்தது. இந்த முடிவு மீனவர்களிடையே பெரும் அதிருப்தியை ஏற்படுத்தியுள்ளது. அப்பகுதியில் உள்ள முள்ளிக்குப்பம், சீனிவாசபுரம், முள்ளிமா நகர், ராஜீவ்காந்தி நகர், பவானி குப்பம், இருதயபுரம், செல்வராஜபுரம், நொச்சி நகர் உள்ளிட்ட பல மீனவ கிராமங்களைச் சேர்ந்த மக்கள், இந்த நிலம் தங்களின் பாரம்பரிய வாழ்வாதாரத்துடன் நெருங்கிய தொடர்புடையது எனக் கூறுகின்றனர்.
படகுகளை நிறுத்துவது, வலைகளைப் பராமரிப்பது, மீன்களை உலர்த்துவது, விற்பனை செய்வது போன்ற அன்றாடத் தொழில்களுக்கு இந்த இடம் அவசியமானதாக உள்ளது. புதிய வளாகம் அமைந்தால் பாதுகாப்புக் கட்டுப்பாடுகள் அதிகரித்து, போக்குவரத்து நெரிசல் பெருகி, கடற்கரைக்குச் செல்லும் வழி தடைபடும் என அவர்கள் அச்சம் தெரிவிக்கின்றனர். மேலும், கடலோரச் சூழல் பாதிக்கப்படும் அபாயமும் உள்ளதாகக் கருதுகின்றனர். இந்தச் சூழலில், வணிகப் பயன்பாட்டு மண்டலமாக அறிவிக்கப்பட்ட முடிவை ரத்து செய்யக் கோரி போராட்டக் குழுவினர் சென்னை பெருநகர வளர்ச்சிக் குழும உறுப்பினர் செயலர் ராகுல் நாத்தை சந்தித்தனர்.
இதையும் படிங்க: ரூ.299 கோடி திட்டங்களுக்கு திடீர் மூடுவிழா? 15 திட்டங்கள் ரத்து? நிதி நெருக்கடியில் சிக்கிய CMDA!
அப்போது அவர்கள் விரிவான கோரிக்கை மனுவை அளித்தனர். மனுவில், நில வகைப்பாடு மாற்றம் மீனவர்களின் வாழ்வாதாரத்தைப் பாதிக்கும் என்றும், அரசு உடனடியாக இந்த முடிவை திரும்பப் பெற வேண்டும் என்றும் வலியுறுத்தப்பட்டுள்ளது. மேலும், மாற்று இடத்தில் தலைமைச் செயலகத்தை அமைக்கவும், அப்பகுதியை மீனவர்களின் பாரம்பரிய குடியிருப்புப் பகுதியாக அங்கீகரிக்கவும் கோரப்பட்டுள்ளது.
இதையும் படிங்க: புதிய தலைமைச் செயலகத்துக்கு எதிரான வழக்கு தள்ளுபடி! திடீர் திருப்பம்! ஐகோர்ட்டில் பரபரப்பு தீர்ப்பு!
