ரெஸ்டோ பார்களுக்கு அனுமதி அளிப்பதா? தவெக அரசுக்கு பாமக தலைவர் அன்புமணி எச்சரிக்கை!

தமிழ்நாட்டில் 'ரெஸ்டோ பார்களை' (Resto-Bars) அனுமதிப்பதற்கும், அதற்குப் புதிய HL3A உரிமம் வழங்குவது குறித்தும் முதலமைச்சர் விஜய் தலைமையிலான தவெக அரசு பரிசீலனை செய்து வருவது அப்பட்டமான பிற்போக்குத்தனமான செயல் என்று பாட்டாளி மக்கள் கட்சியின் தலைவர் மருத்துவர் அன்புமணி ராமதாஸ் மிகக் கடுமையாகச் சாடியுள்ளார். இது தொடர்பாக அவர் வெளியிட்டுள்ள அதிகாரப்பூர்வ அறிக்கையில், இத்திட்டத்தைத் தவெக அரசு உடனடியாகக் கைவிட வேண்டும் என வலியுறுத்தியுள்ளார்.

அன்புமணி ராமதாஸ் விடுத்துள்ள கண்டன அறிக்கையில் குறிப்பிட்டுள்ளதாவது உணவகங்களோடு இணைந்து மதுபானம் அருந்தும் ரெஸ்டோ பார்களை அனுமதிப்பது மற்றும் அதற்கு HL3A உரிமம் வழங்கும் திட்டத்தைச் செயல்படுத்துவது தமிழ்நாட்டில் மாபெரும் சமூகக் கேட்டையும், புதிய குடிகாரர்களையும் உருவாக்குவதற்கு வழிவகுக்கும். மது ஒழிப்பை நோக்கி நடைபோட வேண்டிய அரசு, அதற்கு முற்றிலும் மாறாக மதுப் பழக்கத்தை மேலும் எளிமையாக்க முயல்வது கண்டிக்கத்தக்கது.

அரசுக்கு எச்சரிக்கை விடுத்துள்ள அவர், பொதுமக்களின் நல்வாழ்வைப் பாதிக்கும் இந்த ரெஸ்டோ பார் உரிமம் வழங்கும் திட்டத்தை அரசு தற்போதே கைவிட வேண்டும். அவ்வாறு செய்யாமல் இத்திட்டத்தை அரசு முன்னெடுத்தால், அதற்கு எதிராகப் பாட்டாளி மக்கள் கட்சி சார்பில் மிகக் கடுமையான சட்ட மற்றும் அரசியல் ரீதியான தொடர் போராட்டங்களை முன்னெடுப்போம் என்று திட்டவட்டமாகத் தெரிவித்துள்ளார்.

இதையும் படிங்க: 100 ஆண்டுகால தண்ணீருக்காக போராடும் கட்சி பாமக: மேகேதாது அணை விவகாரத்தில் சௌமியா அன்புமணி பேட்டி!

பாமகவின் 38-வது ஆண்டு விழாவில் தவெக அரசின் சில முடிவுகளைப் பாராட்டிப் பேசியிருந்த அன்புமணி ராமதாஸ், தற்போது மது விவகாரத்தில் தவெக அரசுக்கு இந்த எச்சரிக்கையை விடுத்துள்ளது தமிழக அரசியல் வட்டாரத்தில் பரபரப்பை ஏற்படுத்தியுள்ளது.

இதையும் படிங்க: விஜய் அரசுக்கு கற்றுக்கொள்ளும் ஆர்வம் உள்ளது! 38-வது ஆண்டு விழாவில் தவெக-வை பாராட்டிய அன்புமணி!