ஜி.கே.மணி தொகுதியில் அன்புமணி போட்டி?! மல்லுக்கட்டும் தொண்டர்கள்!! பாமக-வில் மோதல் உச்சக்கட்டம்!

பாட்டாளி மக்கள் கட்சியில் (பாமக) நிறுவனர் ராமதாஸ் - இளைஞர் அணித் தலைவர் அன்புமணி ராமதாஸ் இடையிலான மோதல் தீவிரமடைந்துள்ளது. இதனால் கட்சி இரு அணிகளாகப் பிளவுபட்டு செயல்பட்டு வருகிறது. வரும் 2026 சட்டசபைத் தேர்தலில் அன்புமணி களமிறங்க முடிவு செய்துள்ளதாகத் தகவல்கள் வெளியாகியுள்ளன.

கட்சியின் வேட்பாளர் தேர்வுக்காக விருப்ப மனு அளிக்கும் கால அவகாசம் டிசம்பர் 14 முதல் 20 வரை என்று அறிவிக்கப்பட்டிருந்தது. பின்னர் அது 27-ஆம் தேதி வரை நீட்டிக்கப்பட்டது. இதுவரை பல்வேறு தொகுதிகளில் இருந்து விருப்ப மனுக்கள் வந்துள்ளன. குறிப்பாக, தர்மபுரி மாவட்டம் பென்னாகரம் தொகுதியில் அன்புமணி போட்டியிட வேண்டும் என்று கட்சி நிர்வாகிகள் ஏராளமானோர் விருப்ப மனு அளித்துள்ளனர்.

கடந்த 2016 சட்டசபைத் தேர்தலில் பென்னாகரத்தில் போட்டியிட்ட அன்புமணி சிறிய வாக்கு வித்தியாசத்தில் தோல்வி அடைந்தார். 2021 தேர்தலில் அதிமுக கூட்டணியில் பாமக சார்பில் கவுரவத் தலைவர் ஜி.கே.மணி போட்டியிட்டு வென்றார். தற்போது ஜி.கே.மணி ராமதாஸ் அணியில் உள்ளார். அவரை “துரோகி”, “திமுகவின் கைக்கூலி” என்று அன்புமணி கடுமையாக விமர்சித்து வருகிறார்.

இதையும் படிங்க: "அம்மாவை பாட்டிலால் அடிப்பவருக்கு திமுகவை விமர்சிக்க அருகதை இருக்கா?".. அன்புமணியை விளாசிய ஆர். எஸ்.பாரதி...!!

இதனால், பென்னாகரத்தில் ஜி.கே.மணியை தோற்கடிக்கும் நோக்கில் அன்புமணி அந்தத் தொகுதியில் போட்டியிட முடிவு செய்துள்ளதாகக் கூறப்படுகிறது. தர்மபுரி மாவட்ட நிர்வாகிகள் பலர் அன்புமணியை ஆதரித்து விருப்ப மனு அளித்துள்ளது இதை உறுதிப்படுத்துகிறது.

அதேநேரம், அன்புமணியின் மனைவி சௌமியா அன்புமணியும் தீவிர அரசியலில் ஈடுபட்டு வருகிறார். கடந்த லோக்சபா தேர்தலில் தர்மபுரி தொகுதியில் போட்டியிட்ட அவர், தற்போது மகளிரணி கூட்டங்களில் பங்கேற்கிறார். 

முதலில் பென்னாகரத்தில் போட்டியிட திட்டமிட்டிருந்த சௌமியா, இப்போது தனது தந்தை கிருஷ்ணசாமியின் சொந்தத் தொகுதியான செய்யாறில் போட்டியிட ஆலோசித்து வருவதாகத் தகவல்கள் உள்ளன. இதற்காக செய்யாறு தொகுதியில் இருந்தும் பலர் சௌமியாவுக்கு விருப்ப மனு அளித்துள்ளனர்.

ராமதாஸ் தலைமையிலான நிர்வாகக் குழு கூட்டத்தில் அன்புமணி மீதான ஊழல் வழக்கை விரைவாக விசாரிக்க வேண்டும் என்ற தீர்மானம் நிறைவேற்றப்பட்டது. இது இரு தரப்புக்கும் இடையிலான மோதலை மேலும் தீவிரப்படுத்தியுள்ளது. சமாதான வாய்ப்பு இல்லை என்று கட்சி வட்டாரங்கள் தெரிவிக்கின்றன.

பாமகவில் ஏற்பட்டுள்ள இந்தப் பிளவு வரும் சட்டசபைத் தேர்தலில் கட்சியின் வாக்கு வங்கியைப் பாதிக்கலாம் என்ற அச்சம் எழுந்துள்ளது.

இதையும் படிங்க: அன்புமணி கொடுத்த அனைத்து ஆதாரங்களும் பொய் - நீதிமன்றம் சொன்ன ஷாக்கிங் தகவல்... புட்டு, புட்டு வைத்த அருள் எம்.எல்.ஏ...!