இதுக்கு ஒரு என்டே இல்லையா?... பிள்ளை குட்டிகளுடன் நடுரோட்டுக்கு வந்த மக்கள்... தினமும் இரவில் நடக்கும் அவலம்

திருவள்ளூர் மாவட்டம் பொன்னேரி அடுத்த ஆரணியில் இரவு நேரத்தில் சுமார் 1மணி நேரத்திற்கும் மேல் நீடித்த மின்வெட்டைக் கண்டித்து பொதுமக்கள் 2வது நாளாக சாலை மறியலில் ஈடுபட்டனர். சனிக்கிழமை இரவும் தொடர் மின்வெட்டு காரணமாக அதே பகுதியில் சாலை மறியல் மேற்கொண்ட நிலையில் நேற்று இரவு நீடித்த மின்தடையை கண்டித்து பொதுமக்கள் சாலை மறியல் போராட்டத்தில் ஈடுபட்டனர்.

ஆரணி பேரூராட்சியில் அண்மைக் காலமாக இரவு நேரங்களில் தொடர்ந்து மின்வெட்டு ஏற்பட்டு வருவதாகவும் இது தொடர்பாக மின்வாரிய அதிகாரிகளை தொடர்பு கொண்டாலும் சரிவர பதிலளிப்பதில்லை என புகார் தெரிவித்தனர்.  நேற்று இரவு தொடர் மின்வெட்டு நீடித்ததால் பொறுமை இழந்த மக்கள் ஆரணி பஜாரில் சாலை மறியலில் ஈடுபட்டனர். பொதுமக்களின் புகார்களுக்கு செவி மடுத்து விளக்கம் அளிக்க மின்வாரிய அதிகாரிகள் முன்வருவது இல்லை என குற்றம் சாட்டினர்.

தொடர் மின்வெட்டு காரணமாக இரவு நேரங்களில் சரிவர உறங்க முடியாமல் பொதுமக்கள் இன்னலுக்கு ஆளாவதாக குற்றம் சாட்டினர். சாலை மறியலில் ஈடுபட்ட மக்களிடம் காவல்துறை அதிகாரிகள் சமரச பேச்சுவார்த்தை நடத்தினர். அப்போது மின்வாரிய அதிகாரிகள் வந்து பதில் அளிக்க வேண்டும் என தெரிவித்ததன் பேரில், மின்வாரிய அதிகாரிகள் சம்பவ இடத்திற்கு வந்து பொதுமக்களிடம் சமரச பேச்சுவார்த்தை நடத்தினர்.

இதையும் படிங்க: சென்னையில் இரவில் தொடரும் மின்வெட்டு! சாலையில் இறங்கி எதிர்ப்பை காட்டிய மக்கள்! ஸ்தம்பித்தது ஈசிஆர்!

கோடை காலம் என்பதால் மின் தேவை அதிகரித்து நுகர்வும் அதிகரித்திருப்பதால் தொழில்நுட்பக் கோளாறு காரணமாக மின்தடை ஏற்பட்டு வருவதாக கூறினர். தொடர் மின்வெட்டு காரணமாக மின் சாதனங்கள் பழுதடைவதாகவும் அதற்கு யார் பொறுப்பு ஏற்பது எனக் கூறி பொதுமக்கள் வாக்குவாதத்தில் ஈடுபட்டனர். ஆரணியில் மின் தடையை தவிர்த்திடும் வகையில் தரம் உயர்த்துவதற்கான நடவடிக்கை எடுக்கப்படும் என சமாதானம் பேசி உறுதியளித்ததை தொடர்ந்து சாலை மறியல் போராட்டத்தை கைவிட்டு பொதுமக்கள் கலைந்து சென்றனர். இதனால் பெரியபாளையம் - புதுவாயல் சாலையில் சிறிது நேரம் போக்குவரத்து பாதிக்கப்பட்டது.

இதையும் படிங்க: மின்வெட்டு ஏன்.? கரண்ட் கட் பிரச்சனைக்கு செக்..! மின்துறை புதிய திட்டம்..!