நாளை சென்னை வருகிறார் ராகுல் காந்தி! காங்கிரஸ் பயிற்சி முகாமில் பங்கேற்பு!

தமிழ்நாடு காங்கிரஸ் கமிட்டியின் சார்பில் புதிதாக நியமிக்கப்பட்ட மாவட்டத் தலைவர்களுக்கான பயிற்சி முகாமின் நிறைவு விழாவில் பங்கேற்பதற்காக, மக்களவை எதிர்க்கட்சித் தலைவர் ராகுல் காந்தி நாளை (ஆகஸ்ட் 1) சென்னை வருகை தரவுள்ளது மாநில அரசியல் களத்தில் பெரும் பரபரப்பை ஏற்படுத்தியுள்ளது.

தமிழ்நாட்டில் எஸ்.எஸ்.ஏ. திட்டத்தின் மூலம் புதிதாக நியமிக்கப்பட்ட மாவட்ட காங்கிரஸ் கமிட்டி தலைவர்களுக்குக் கடந்த 23-ஆம் தேதி முதல் சென்னையை அடுத்த மாமல்லபுரத்தில் உள்ள தமிழ்நாடு அரசு சுற்றுலா வளர்ச்சிக் கழக கடற்கரை விடுதியில் சிறப்புப் பயிற்சி முகாம் முழுவீச்சில் நடைபெற்று வருகிறது. 

காங்கிரஸ் மாநிலத் தலைவர் மாணிக்கம் தாகூர், மேலிடப் பொறுப்பாளர் குலாம் அகமது மீர் உள்ளிட்ட மூத்த தலைவர்கள் பங்கேற்று ஆலோசனைகளை வழங்கி வரும் இப்பயிற்சி முகாம் நாளை 1-ஆம் தேதியுடன் நிறைவு பெறுகிறது.  இறுதி நாளான நாளை நடைபெறும் இந்த சிறப்பு நிகழ்வில் ராகுல் காந்தி நேரில் கலந்துகொண்டு, புதிய தலைவர்களின் கருத்துக்களைக் கேட்டறிவதுடன், கட்சிக் கட்டமைப்பு குறித்த முக்கிய ஆலோசனைகளையும் சுடச்சுட வழங்கவுள்ளார். அத்துடன், முகாமில் பங்கேற்கும் நிர்வாகிகளின் குடும்பத்தினருடனும் அவர் நேரடியாகக் கலந்துரையாட உள்ளதாகத் தகவல்கள் கசிந்துள்ளன.

இதையும் படிங்க: காவிரி விவகாரத்தில் ராகுல் காந்தி தலையிட முடியாது! அமைச்சர் ராஜேஷ்குமார் பேட்டி!

ராகுல் காந்தியின் இந்தப் குறுகியகாலப் பயணத் திட்டத்தின்படி, நாளை காலை 10 மணிக்குச் சென்னை விமான நிலையம் வந்து இறங்கும் அவருக்குத் தமிழ்நாடு காங்கிரஸ் முக்கிய நிர்வாகிகள் தடபுடலான வரவேற்பு அளிக்கின்றனர். தொடர்ந்து அங்கிருந்து மாமல்லபுரம் செல்லும் அவர், காலை 11.30 மணி முதல் மாலை 5 மணி வரை பயிற்சி முகாமில் தீவிர ஆலோசனைகளில் ஈடுபடுகிறார். 

அதன் பின் மீண்டும் விமான நிலையம் திரும்பி, மாலை 7 மணிக்கு டெல்லி புறப்படுகிறார். இந்த 9 மணி நேரத் திடீர் பயணத்தின் போது தமிழ்நாடு முதலமைச்சரையோ பிற கூட்டணிக் கட்சித் தலைவர்களையோ அவர் சந்திக்க வாய்ப்பில்லை என காங்கிரஸ் மேலிட வட்டாரங்கள் திட்டவட்டமாகத் தெரிவித்துள்ளன. ராகுல் காந்தியின் வருகையை முன்னிட்டு மாமல்லபுரம் மற்றும் அவர் பயணிக்கும் பாதைகளில் காவல்துறையினரால் பலத்த பாதுகாப்பு வளையம் அமைக்கப்பட்டுள்ளது.
 

இதையும் படிங்க: "மன்னிப்பு கேட்கவே மாட்டேன்!" - அமித் ஷா விவகாரத்தில் ராகுல் காந்தி உறுதி!