மலேசியாவிலிருந்து கடத்தி வரப்பட்ட ரூ.3.4 கோடி கஞ்சா பறிமுதல்! சென்னை பெண் பயணி கைது!

மலேசிய தலைநகர் கோலாலம்பூரில் இருந்து சென்னைக்கு விமானத்தில் கடத்தி வரப்பட்ட சுமார் ₹3.4 கோடி சர்வதேச மதிப்பிலான 3.4 கிலோ உயர்ரக ஹைட்ரோபோனிக் கஞ்சா போதைப் பொருளைச் சென்னை சர்வதேச விமான நிலைய சுங்கத்துறை அதிகாரிகள் அதிரடியாகப் பறிமுதல் செய்துள்ளனர்; இது தொடர்பாகக் கடத்தல் குருவியாகச் செயல்பட்ட சென்னையைச் சேர்ந்த 40 வயதுப் பெண்ணைக் கைது செய்து தீவிர விசாரணை நடத்தி வருகின்றனர்.

சென்னை சர்வதேச விமான நிலையத்தின் வருகை முனையத்திற்கு, மலேசியாவின் கோலாலம்பூரில் இருந்து தனியார் பயணிகள் விமானம் ஒன்று நள்ளிரவு வந்து தரையிறங்கியது. அந்த விமானத்தில் வந்திறங்கிய பயணிகளை, விமான நிலைய சுங்கத்துறை ஏர் இன்டெலிஜென்ஸ் யூனிட் அதிகாரிகள் தீவிரமாகக் கண்காணித்து, சந்தேகத்திற்குரிய நபர்களை இடைமறித்து வழக்கமான உடைமை சோதனைகளை நடத்தி வந்தனர்.

அப்போது, சுற்றுலா விசாவில் மலேசியா சென்றுவிட்டுத் திரும்பிய சென்னையைச் சேர்ந்த சுமார் 40 வயது மதிக்கத்தக்க பெண் பயணி ஒருவர் மீது அதிகாரிகளுக்குச் சந்தேகம் எழுந்தது. அவர் தனது குடியுரிமை சோதனைகளை முடித்துக்கொண்டு, கன்வேயர் பெல்ட்டில் இருந்து தனது டிராலி பேக்கை எடுத்துத் தள்ளியபடி, சுங்க வரி செலுத்தும் பொருட்கள் ஏதுமில்லை எனக் கூறி கிரீன் சேனல் வழியாக நைசாக வெளியேற முற்பட்டார்.

இதையும் படிங்க: நடுவானில் திக்... திக்...!! - 36,000 அடி உயரத்தில் மரண போராட்டம்... சென்னையில் அவசர அவசரமாக தரையிறக்கப்பட்ட விமானம்...!

அவரது நடவடிக்கைகளில் கடுமையான பதற்றம் தென்பட்டதால், உஷாரான சுங்கத்துறை அதிகாரிகள் அவரை உடனடியாகத் தடுத்து நிறுத்தித் தனி அறைக்கு அழைத்துச் சென்று தீவிர விசாரணை மேற்கொண்டனர். அவரது டிராலி பேக்கை முழுமையாகத் திறந்து சோதனையிட்டபோது, அதற்குள் மிகவும் நேர்த்தியாக மறைத்து வைக்கப்பட்டிருந்த 4 பார்சல்களை அதிகாரிகள் கண்டுபிடித்தனர்.

அந்த பார்சல்களைப் பிரித்துப் பார்த்தபோது, சர்வதேச அளவில் அதிஉயர் சந்தை மதிப்பு கொண்ட சுமார் 3 கிலோ 420 கிராம் எடையுள்ள 'ஹைட்ரோபோனிக் கஞ்சா' போதைப்பொருள் பதுக்கி வைக்கப்பட்டிருந்தது அம்பலமானது. இதன் சர்வதேச மதிப்பு சுமார் ₹3.4 கோடி எனக் கணக்கிடப்பட்டுள்ளது. இதனையடுத்து, போதைப் பொருளைப் பறிமுதல் செய்த அதிகாரிகள், அந்தப் பெண் பயணியைக் கைது செய்தனர்.

அவரிடம் நடத்தப்பட்ட கிடுக்கிப்பிடி விசாரணையில், சர்வதேச போதைக் கடத்தல் கும்பலிடம் இவர் 'கடத்தல் குருவியாக' செயல்பட்டு வந்ததும், அக்கும்பல் விமான டிக்கெட் மற்றும் கமிஷன் கொடுத்து இவரை மலேசியாவுக்கு அனுப்பி இந்தக் கடத்தலை அரங்கேற்றியதும் தெரியவந்துள்ளது.

இதன் பின்னணியில் உள்ள சர்வதேச போதைக் கடத்தல் கும்பலின் முக்கியப் புள்ளிகளைச் சுங்கத்துறை அதிகாரிகள் தற்போது வலைவீசித் தீவிரமாகத் தேடி வருகின்றனர்.

இதையும் படிங்க: சென்னை விமான நிலையத்தில் ரூ.22.88 கோடியில் பிக்கப் பிளாசா! மத்திய அமைச்சர் ராம்மோகன் நாயுடு திறந்து வைத்தார்!