தவெக கூட்டணியில் பாமக என்பது திட்டமிட்ட வதந்தி: விசிக தலைவர் திருமாவளவன் முகநூல் நேரலையில் ஆவேசம்!

தமிழக வெற்றிக் கழகக் கூட்டணியில் பாட்டாளி மக்கள் கட்சி இணையப் போவதாகவும், இடைத்தேர்தலுக்குப் பின் பாமக அமைச்சரவையில் இடம்பெற்றுத் துணை முதலமைச்சர் பதவி பெறப் போவதாகவும் சமூக வலைதளங்களில் திட்டமிட்டு நச்சு வதந்திகளைப் பரப்பி வருவதாகவும், விசிகவினரின் தீவிர தேர்தல் களப்பணியைத் தடுத்து வாக்குகளைப் பிரிப்பதே இதன் பின்னணியில் உள்ள சூழ்ச்சி என்றும் விடுதலைச் சிறுத்தைகள் கட்சியின் தலைவர் தொல். திருமாவளவன் தனது முகநூல் நேரலை உரையில் மிகக் காட்டமாகச் சாடியுள்ளார்.

செங்கல்பட்டு மாவட்டம் மதுராந்தகம் சட்டமன்றத் தொகுதி இடைத்தேர்தல் களம் இறுதிக்கட்ட அனல் பறக்கும் பிரச்சாரத்தை எட்டியுள்ள நிலையில், ஆளுங்கட்சியான தவெக தலைமையிலான மதச்சார்பற்ற சமூகநீதி வெற்றிக் கூட்டணியின் வாக்கு வங்கியைக் குறிவைத்துச் சமூக வலைதளங்களில் பல்வேறு யூகங்கள் பரப்பப்பட்டு வருகின்றன. இது தொடர்பாக முகநூல் நேரலையில் தோன்றித் தொண்டர்களிடையே விரிவாக உரையாற்றிய விசிக தலைவர் தொல். திருமாவளவன், அரசியல் களத்தின் உண்மை நிலவரத்தை உடைத்துப் பேசினார்.

தமிழக வெற்றிக் கழகம் தமிழ்நாட்டில் ஆட்சியமைக்க வேண்டும் என்பதற்காக இடதுசாரி கம்யூனிஸ்ட் கட்சிகள், விடுதலைச் சிறுத்தைகள் கட்சி மற்றும் இந்திய யூனியன் முஸ்லிம் லீக் ஆகிய ஜனநாயக சக்திகளின் ஆதரவைப் பெறுவதில் மாபெரும் முயற்சிகளை முன்னெடுத்தது என்பதை யாராலும் மறுத்துவிட முடியாது என்று அவர் தனது உரையைத் தொடங்கினார்.

இதையும் படிங்க: தலைமை தேர்தல் ஆணையர் ஞானேஷ்குமாரை உடனே கைது செய்! தொல்.திருமாவளவன் ஆவேச முழக்கம்!

தொடர்ந்து பேசிய அவர், மதுராந்தகம் இடைத்தேர்தல் களத்தில் மதச்சார்பற்ற சமூகநீதி வெற்றிக் கூட்டணியின் சார்பில் நிறுத்தப்பட்டுள்ள வேட்பாளர் மரகதம் குமரவேலின் மாபெரும் வெற்றி இப்போதே உறுதியாகிவிட்டது; இந்த அசைக்க முடியாத தேர்தல் வெற்றியைப் பொறுத்துக்கொள்ள முடியாத சில அரசியல் சக்திகள் சமூக ஊடகங்களில் திட்டமிட்டு அவதூறுகளை அள்ளி வீசுகின்றன எனக் குறிப்பிட்டார்.

பாஜகவும், பாமகவும் அங்கம் வகிக்கும் எந்தவொரு கூட்டணியிலும் விடுதலைச் சிறுத்தைகள் கட்சி ஒருபோதும் இருக்காது என்பதை நாங்கள் கடந்த 15 ஆண்டுகளுக்கும் மேலாக மிகத் தெளிவாகவும் வெளிப்படையாகவும் அறிவித்து வருகிறோம் என்று தனது கொள்கை நிலைப்பாட்டை அவர் மீண்டும் அழுத்தமாகப் பதிவு செய்தார்.

சமூக வலைதளங்களில் பரப்பப்படும் புரளிகள் குறித்துக் கடுமையான எச்சரிக்கை விடுத்த அவர், தவெக கூட்டணியில் பாமக இணையப் போகிறது; அதனால்தான் அவர்கள் அதிமுகவுக்கு ஆதரவு தராமல் நடுநிலை வகிப்பது போல் பாசாங்கு செய்கிறார்கள்; இடைத்தேர்தல் முடிந்ததும் தவெகவுடன் பாமக கைகோர்த்து அமைச்சரவையிலும் இடம்பெற்று துணை முதலமைச்சர் பதவியைப் பிடிக்கப் போகிறது என்றெல்லாம் அப்பட்டமான பொய்களைப் பரப்புகின்றனர் என்று கொதித்தார்.

இத்தகைய வதந்திகளின் உண்மையான சதியை வெளிப்படுத்திய திருமாவளவன், பாமக வரப்போகிறது என்ற அச்சத்தை ஏற்படுத்தினால் விசிக தொண்டர்கள் தேர்தல் களத்தில் இருந்து பின்வாங்குவார்கள், பிரச்சாரத்தில் ஆர்வம் காட்டமாட்டார்கள், தவெக வேட்பாளருக்கு வாக்கு சேகரிக்க மாட்டார்கள் என்ற தவறான கணக்குப் போட்டு, விசிகவின் வாக்குகள் தவெகவிற்கு முழுமையாகச் சென்று சேருவதைத் தடுப்பதற்காகவே இந்தக் குழப்பத்தை அரங்கேற்றுகின்றனர் என்று தெரிவித்தார்.

மேலும், தமிழக வெற்றிக் கழகத்திற்கும் பாமகவிற்கும் இடையே எத்தகைய அரசியல் உறவு உள்ளது என்பது நமக்குத் தெரியாது; அது குறித்து நாம் எந்த ஆய்வையும் செய்ய வேண்டிய அவசியமும் இல்லை; ஏனென்றால் விசிக ஏற்கனவே கொள்கை ரீதியான உறுதியான நிலைப்பாட்டை எடுத்து அதைத் தொடர்ந்து நடைமுறைப்படுத்தி வருகிறது; இது அனைவரும் அறிந்த அரசியல் உண்மை; இதில் எங்களுக்கு எந்தவித ஊசலாட்டமும் தடுமாற்றமும் கிடையாது எனத் தொல். திருமாவளவன் தெரிவித்தார்.

இதையும் படிங்க: மிசாவில் சித்ரவதையை அனுபவித்தவர் மு.க.ஸ்டாலின்! அந்த வரலாற்றை மறக்க முடியாது என திருமாவளவன் பேட்டி!