பாலியல் டார்ச்சர் கொடுத்த அறிவியல் ஆசிரியர்... மன உளைச்சலில் மாணவி எடுத்த விபரீத முடிவு... 5 நாட்களுக்குப் பிறகு இப்படியா?

கள்ளக்குறிச்சி மாவட்டம் தெங்கியாநத்தம் அரசு மேல்நிலைப் பள்ளியில் ஆசிரியர் பாலியல் தொந்தரவு அளித்ததாக கூறி, மன உளைச்சலுக்கு ஆளாகி தற்கொலைக்கு முயன்ற 10ஆம் வகுப்பு மாணவி, சேலம் அரசு மருத்துவக் கல்லூரி மருத்துவமனையில் சிகிச்சை பலனின்றி இன்று உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

கள்ளக்குறிச்சி மாவட்டம் கச்சிராயபாளையம் அருகே உள்ள தெங்கியாநத்தம் அரசு மேல்நிலைப் பள்ளியில் 10ஆம் வகுப்பு படித்து வந்த மாணவி ஒருவர், கடந்த 7ஆம் தேதி வீட்டில் இருந்த பூச்சிக்கொல்லி மருந்தை குடித்து தற்கொலைக்கு முயன்றுள்ளார். இதையடுத்து, உயிருக்கு ஆபத்தான நிலையில் மாணவி சேலம் அரசு மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டார்.

மாணவியிடம் அவரது பெற்றோர் விசாரித்தபோது, பள்ளியில் பணியாற்றும் அறிவியல் ஆசிரியர் ஜெகதீசன் தனக்கு பாலியல் ரீதியாக தொந்தரவு அளித்ததாகவும், இதனால் ஏற்பட்ட மன உளைச்சல் காரணமாக பூச்சிக்கொல்லி மருந்தை குடித்ததாகவும் மாணவி தெரிவித்ததாக கூறப்படுகிறது.

இதையும் படிங்க: கிணற்றில் கர்ப்பிணி உடல்.. திருமணத்திற்கு மறுத்து போட்டு தள்ளிய காதலன்..!! போலீஸ் விசாரணை..!

ஜெகதீசன் 46 வயதுடைய அறிவியல் ஆசிரியர் என்றும், சம்பவத்திற்கு சுமார் 10 நாட்களுக்கு முன்புதான் வேறு பள்ளியில் இருந்து தெங்கியாநத்தம் அரசு மேல்நிலைப் பள்ளிக்கு பணியிட மாற்றம் செய்யப்பட்டு வந்ததாகவும் வெளியாகியுள்ள தகவல்கள் தெரிவிக்கின்றன.

இதையடுத்து மாணவியின் பெற்றோர் அளித்த புகாரின் பேரில், போலீசார் ஆசிரியர் ஜெகதீசன் மீது போக்சோ சட்டத்தின் கீழ் வழக்குப்பதிவு செய்து விசாரணை மேற்கொண்டனர். பின்னர் அவர் கைது செய்யப்பட்டார்.

இதனிடையே, சேலம் அரசு மருத்துவக் கல்லூரி மருத்துவமனையில் மாணவிக்கு தொடர்ந்து தீவிர சிகிச்சை அளிக்கப்பட்டு வந்தது. உடல்நிலை கவலைக்கிடமாக இருந்த நிலையில், சிகிச்சை பலனின்றி மாணவி இன்று காலை உயிரிழந்ததாக தற்போது தெரிவிக்கப்பட்டுள்ளது.

மாணவி உயிரிழந்த தகவல் வெளியாகியுள்ள நிலையில், சம்பவம் தொடர்பான விசாரணை மேலும் தீவிரமடையும் சூழல் ஏற்பட்டுள்ளது. ஏற்கனவே ஆசிரியர் கைது செய்யப்பட்டுள்ள நிலையில், மாணவிக்கு ஏற்பட்டதாக கூறப்படும் பாலியல் தொந்தரவு தொடர்பான அனைத்து அம்சங்களையும் போலீசார் விசாரித்து வருகின்றனர்.

பள்ளியில் மாணவியின் பாதுகாப்பு, ஆசிரியரின் நடத்தை மற்றும் சம்பவம் தொடர்பாக பள்ளி நிர்வாகத்துக்கு ஏதேனும் தகவல் முன்கூட்டியே கிடைத்ததா என்பது உள்ளிட்ட பல்வேறு கோணங்களிலும் விசாரணை நடைபெற வாய்ப்புள்ளது.

ஒரு அரசு பள்ளியில் 10ஆம் வகுப்பு படித்து வந்த மாணவி, ஆசிரியரால் பாலியல் தொந்தரவுக்கு ஆளானதாக கூறப்பட்ட நிலையில், மன உளைச்சலில் தற்கொலைக்கு முயன்று தற்போது உயிரிழந்த சம்பவம் பெற்றோர், மாணவர்கள் மற்றும் பொதுமக்கள் மத்தியில் கடும் அதிர்ச்சியையும் கொந்தளிப்பையும் ஏற்படுத்தியுள்ளது.

இந்த சம்பவத்தில் மாணவியின் குடும்பத்தினருக்கு உரிய நீதி கிடைக்க வேண்டும் என்றும், பள்ளி மாணவிகளின் பாதுகாப்பை உறுதி செய்ய அதிகாரிகள் கடுமையான நடவடிக்கைகளை எடுக்க வேண்டும் என்றும் கோரிக்கைகள் எழுந்துள்ளன.

இதையும் படிங்க: முதல்வர் விஜய் பாதுகாப்புப் பணியில் திடீர் பரபரப்பு! 2 போலீஸ் அதிகாரிகள் மயங்கி விழுந்ததால் அதிர்ச்சி!