2 நாள் லீவ்..! மீண்டும் திருவல்லிக்கேணி காவல் நிலையத்தில் செந்தில் பாலாஜி ஆஜர்..! சர்ச்சைக்கு DOT..!

திமுக முன்னாள் அமைச்சரும் தற்போதைய சட்டப்பேரவை உறுப்பினருமான வி. செந்தில் பாலாஜி தொடர்பான சட்ட நடவடிக்கைகள் தொடர்ந்து கவனம் பெற்று வருகின்றன. தமிழக வெற்றிக் கழக சட்டப்பேரவை உறுப்பினர் இளையராஜாவிடம் குதிரைப் பேரம் பேசியதாக தொடரப்பட்ட வழக்கில் சென்னை உயர் நீதிமன்றம் அவருக்கு நிபந்தனை முன் ஜாமீன் வழங்கியது. இந்த வழக்கில் அவர் மற்றும் அவரது சகோதரர் அசோக் குமார் இருவரும் தினந்தோறும் காலை மற்றும் மாலை என இரண்டு வேளைகளிலும் திருவல்லிக்கேணி காவல் நிலையத்தில் நேரில் ஆஜராகி கையெழுத்திட வேண்டும் என்ற நிபந்தனை விதிக்கப்பட்டது.

இந்த உத்தரவின்படி சென்னை முதன்மை அமர்வு நீதிமன்றத்தில் சரணடைந்து ஜாமீன் பிணை செலுத்திய பிறகு, ஜூலை 25 முதல் செந்தில் பாலாஜி திருவல்லிக்கேணி காவல் நிலையத்தில் கையெழுத்திடத் தொடங்கினார். அவரது சகோதரரும் உடன் ஆஜராகி வந்தார். காவல் நிலையத்தில் ஆஜராகும்போது காவல்துறை அதிகாரிகள் அவர்களிடம் விசாரணை நடத்தி வந்தனர். சில நாட்களில் காவல் துணை ஆணையர் உள்ளிட்டோர் அரை மணி நேரம் முதல் இரண்டு மணி நேரம் வரை விசாரணை மேற்கொண்டனர்.

இதற்கிடையில் டாஸ்மாக் முறைகேடு தொடர்பான புதிய வழக்கு பதிவு செய்யப்பட்டது. லஞ்ச ஒழிப்புத் துறை இந்த வழக்கில் செந்தில் பாலாஜி உள்ளிட்டோர் மீது குற்றச்சாட்டுகளை பதிவு செய்தது. இந்த வழக்கில் முன் ஜாமீன் கோரி சென்னை உயர் நீதிமன்றத்தில் மனு தாக்கல் செய்யப்பட்டது. ஆனால் நீதிமன்றம் அந்த மனுவை தள்ளுபடி செய்தது. குற்றச்சாட்டுகள் பெரிய அளவிலானவை என்றும், காவல் காவலில் விசாரணை அவசியம் என்றும் நீதிமன்றம் கருதியது. இதையடுத்து உச்ச நீதிமன்றத்தை நாடிய செந்தில் பாலாஜிக்கு இடைக்கால பாதுகாப்பு கிடைத்தது. கைது செய்யக்கூடாது என்றும், விசாரணைக்கு ஒத்துழைக்க வேண்டும் என்றும், பாஸ்போர்ட்டை ஒப்படைக்க வேண்டும் என்றும் உச்ச நீதிமன்றம் நிபந்தனை விதித்தது.

இதையும் படிங்க: #BREAKING ஃபோன் ஸ்விட்ச் ஆஃப்... டாஸ்மாக் மோசடி வழக்கில் திடுக் திருப்பம்... அடுத்த முக்கிய புள்ளி தலைமறைவு?

இந்த சூழலில் குதிரைப் பேர வழக்கில் கையெழுத்திட வேண்டிய நிபந்தனையை பின்பற்ற இயலாத நிலை ஏற்பட்டதாக செந்தில் பாலாஜி தரப்பு தெரிவித்தது. டாஸ்மாக் வழக்கு தொடர்பாக உச்ச நீதிமன்ற வழக்கறிஞர்களுடன் சட்ட ஆலோசனைகள் நடத்த வேண்டியிருப்பதால், ஜூலை 30 முதல் சில நாட்களுக்கு திருவல்லிக்கேணி காவல் நிலையத்தில் ஆஜராவதிலிருந்து விலக்கு அளிக்கக் கோரி உயர் நீதிமன்றத்தில் மனு தாக்கல் செய்யப்பட்டது. இதனால் இரண்டு நாட்களாக அவர் காவல் நிலையத்தில் கையெழுத்திட செல்லவில்லை. அவரது சகோதரரும் சில நாட்களில் ஆஜராகாத சூழல் ஏற்பட்டது. நிபந்தனை மீறல் குறித்து காவல்துறை கவனம் செலுத்தியது. இந்நிலையில் இன்று காலையில் செந்தில் பாலாஜி மீண்டும் திருவல்லிக்கேணி காவல் நிலையத்தில் ஆஜராகி கையெழுத்திட்டார். நீதிமன்ற நிபந்தனையின்படி தனது வருகையை பதிவு செய்து கொண்டார்.

இதையும் படிங்க: #BREAKING: டாஸ்மாக் முறைகேடு.! செந்தில் பாலாஜிக்கு முன்ஜாமின்..! கிரீன் சிக்னல் காட்டிய சுப்ரீம் கோர்ட்..!!