கூட்டணி அறிவிப்பில் அவசரம் காட்டிய விசிக? விஜய்யின் மௌனத்தால் வருத்தத்தில் சிறுத்தைகள்!!

தமிழக அரசியலில் விடுதலைச் சிறுத்தைகள் கட்சி (விசிக) தமிழக வெற்றிக் கழகத்துடன் (தவெக) இணைந்து பயணிப்பதாக அறிவித்த போதிலும், முதல்வர் விஜய் மற்றும் தவெக தலைமை தரப்பில் எதிர்பார்த்த உற்சாகம் தென்படவில்லை. இதனால் கூட்டணி அறிவிப்பை அவசரமாக வெளியிட்டுவிட்டோமா என்ற கேள்வி விசிக தொண்டர்களிடையே எழுந்துள்ளது.

ஆகஸ்ட் 17 அன்று கள்ளக்குறிச்சி மாவட்டம் உளுந்தூர்பேட்டையில் விசிகவின் தமிழ்த் தேசிய எழுச்சி மாநாடு நடைபெற்றது. இது விசிக தலைவர் தொல். திருமாவளவனின் பிறந்தநாளையொட்டி நடத்தப்பட்டது. லட்சக்கணக்கான தொண்டர்கள் திரண்ட நிலையில், போக்குவரத்து நெரிசல் ஏற்பட்டது. மாநாட்டு மேடையைச் சுற்றி கூட்ட நெரிசல் கட்டுக்கடங்காமல் போனது. தொண்டர்கள் செல்ஃபி எடுக்கவும், தலைவரை தொட்டுப் பார்க்கவும் மேடைக்கு ஏறியதால் காவல்துறை கட்டுப்படுத்த முடியவில்லை.

திருமாவளவனுக்கு மூச்சுத் திணறல் ஏற்பட்டதாகவும் தகவல்கள் வெளியாயின. இதனால் அவர் வெறும் சில நிமிடங்களில் உரையை முடித்து மேடையை விட்டு வெளியேறினார். தேசிய கீதம் பாடப்பட்டு மாநாடு பாதியிலேயே முடிக்கப்பட்டது. இருப்பினும், அந்த உரையிலேயே திருமாவளவன் “தமிழக அரசியல் களத்தில் விசிகவும் தவெகவும் இனி இணைந்தே பயணிக்கும். விசிக தமிழகத்தின் ஆளுங்கட்சியாக வளர வேண்டும்” என்று அறிவித்தார். இதற்கு விசிக தொண்டர்கள் மத்தியில் பெரும் உற்சாகம் ஏற்பட்டது. 

இதையும் படிங்க: முன்கூட்டியே முடிந்த விசிக மாநாடு.. மேடையில் டென்ஷனான திருமா..!! என்ன நடந்தது..??

உள்ளாட்சித் தேர்தலில் அதிக இடங்கள் கிடைக்கலாம், ஒருவேளை மேயர் பதவியும் கைப்பற்றலாம் என்ற எதிர்பார்ப்பே இதற்குக் காரணம். ஆனால் மாநாட்டிற்கு முதல்வர் விஜய்க்கு அழைப்பு விடுக்கப்பட்ட போதிலும் அவர் கலந்துகொள்ளவில்லை. அதைத் தொடர்ந்து அமைச்சர்கள் புஸ்ஸி ஆனந்த், ஆதவ் அர்ஜுனா ஆகியோருக்கும் அழைப்பு விடுக்கப்பட்டது. அவர்களும் வரவில்லை. அடுத்த நாள் (ஆகஸ்ட் 18) திருமாவளவன் முதல்வர் விஜயை தலைமைச் செயலகத்தில் சந்தித்து மாநாட்டில் நிறைவேற்றப்பட்ட தீர்மானங்களை ஒப்படைத்தார். 

ஆட்சி முழு ஐந்தாண்டு காலமும் தொடர விசிக ஆதரவு உண்டு என உறுதிப்படுத்தியுள்ளார். எனினும், விசிகவை கூட்டணிக்கு வரவேற்கிறோம் என்ற அதிகாரப்பூர்வ அறிக்கை எதுவும் தவெக தரப்பில் இதுவரை வெளியாகவில்லை. தவெகவில் புதிய உறுப்பினர்கள் பெருமளவில் இணைந்து வரும் நிலையில், அதிகாரப் பங்கீடு குறித்த சிக்கல்கள் முதல்வர் விஜய்க்கு உள்ளனவாகக் கருதப்படுகிறது.

உள்ளாட்சித் தேர்தல் நெருங்கும் போது அதிருப்தி ஏற்படும் சூழல் உருவாகலாம் என்று அரசியல் வட்டாரங்கள் கருதுகின்றன. விசிக தொண்டர்களின் உற்சாகமும், தவெக தரப்பின் அமைதியும் தற்போது அரசியல் கவனத்தை ஈர்த்துள்ளன.

இதையும் படிங்க: தவிர்க்க முடியாத சக்தி.. தமிழக அரசியல் களத்தில் விசிக-தவெக இணைந்தே பயணிக்கும் - திருமாவளவன்!!