தமிழகத்தில் SIR பணிகள் விறுவிறு..!! மேலும் 10 நாட்கள் அவகாசம்..!! சுப்ரீம் கோர்ட் அதிரடி..!!

தமிழகத்தில் நடைபெற்று வரும் வாக்காளர் பட்டியல் சிறப்பு தீவிரத் திருத்தப் பணிகளுக்கு உச்ச நீதிமன்றம் மேலும் 10 நாட்கள் அவகாசம் வழங்கியுள்ளது. திமுக சார்பில் தொடரப்பட்ட வழக்கில் இந்த உத்தரவு பிறப்பிக்கப்பட்டுள்ளது. இதனால், ஜனவரி 30-ஆம் தேதியுடன் முடிவடைய இருந்த பெயர் சேர்க்கும் கால அவகாசம் பிப்ரவரி 9-ஆம் தேதி வரை நீட்டிக்கப்பட்டுள்ளது

தேர்தல் ஆணையத்தின் சிறப்பு தீவிரத் திருத்த நடவடிக்கைகள் கடந்த நவம்பர் 4-ஆம் தேதி தொடங்கின. இதன் ஒரு பகுதியாக, டிசம்பர் 19-ஆம் தேதி வரைவு வாக்காளர் பட்டியல் வெளியிடப்பட்டது. அப்போது தமிழகத்தில் மொத்தம் 6 கோடியே 41 லட்சத்து 14 ஆயிரத்து 587 வாக்காளர்கள் இருந்த நிலையில், வரைவு பட்டியலில் 97.38 லட்சம் பேரின் பெயர்கள் நீக்கப்பட்டன. இதனால் மொத்த வாக்காளர் எண்ணிக்கை 5 கோடியே 43 லட்சத்து 76 ஆயிரத்து 756 ஆக குறைந்தது. இந்த பெருமளவிலான நீக்கங்கள் வாக்காளர்களிடையே பெரும் அதிர்ச்சியையும் கவலையையும் ஏற்படுத்தியிருந்தன.

இதையும் படிங்க: தமிழ்நாட்டில் வாக்காளர் பட்டியல் திருத்தம்: நாளை கடைசி நாள்..!!

வரைவு பட்டியலில் பெயர் இல்லாதவர்கள் தங்கள் பெயர்களை சேர்த்துக்கொள்ளவும், 18 வயது நிரம்பிய புதிய வாக்காளர்கள் பதிவு செய்யவும் வாய்ப்பு அளிக்கப்பட்டது. இதற்காக டிசம்பர் 19 முதல் ஜனவரி 18 வரை கால அவகாசம் வழங்கப்பட்டது. ஆனால், எதிர்பார்த்த அளவுக்கு படிவங்கள் (பாரம் 6, 7 போன்றவை) பெறப்படவில்லை. இதையடுத்து, ஜனவரி 30-ஆம் தேதி வரை கூடுதல் அவகாசம் அளிக்கப்பட்டது. இந்த காலக்கெடு நாளை (ஜனவரி 30) மாலையுடன் நிறைவடைய இருந்த நிலையில், உச்ச நீதிமன்றத்தின் இந்த உத்தரவு வாக்காளர்களுக்கு பெரும் நிவாரணமாக அமைந்துள்ளது.

திமுகவின் வழக்கில், பெயர் நீக்கப்பட்டவர்களுக்கு மீண்டும் பதிவு செய்ய போதிய கால அவகாசம் தேவை என்று வாதிடப்பட்டது. நீதிமன்றம் இதை ஏற்று, மேலும் 10 நாட்கள் நீட்டிப்பு வழங்கியுள்ளது. இதனால், பெயர் நீக்கப்பட்டவர்கள், புதிய வாக்காளர்கள் உள்ளிட்ட அனைவரும் தங்கள் வாக்குரிமையை பாதுகாக்க இன்னும் சில நாட்கள் கூடுதல் வாய்ப்பு கிடைத்துள்ளது. இந்த திருத்தப் பணிகள் முடிந்த பின்னர் இறுதி வாக்காளர் பட்டியல் வெளியாகும் என எதிர்பார்க்கப்படுகிறது.

தேர்தல் ஆணையம் இதற்கான அனைத்து ஏற்பாடுகளையும் மேற்கொண்டு வருவதாகவும், வாக்காளர்கள் தங்கள் பெயர்களை சரிபார்த்து தேவையான நடவடிக்கைகளை எடுக்குமாறு அறிவுறுத்தியுள்ளது. இந்த நீட்டிப்பு, தமிழகத்தில் வரும் சட்டமன்றத் தேர்தலுக்கு முன்னதாக வாக்காளர் பட்டியலை மிகவும் துல்லியமாக்கும் முயற்சியாக பார்க்கப்படுகிறது.

இதையும் படிங்க: மிஸ் பண்ணிடாதீங்க மக்களே..! சென்னையில் வாக்காளர் பட்டியல் திருத்த முகாம்..! முக்கிய அறிவிப்பு..!