100 கோடி கிளப்பில் இணைந்த பராசக்தி - டான் பிக்சர்ஸ் வெளியிட்ட மாஸ் போஸ்டர்..!

 சிவகார்த்திகேயன் நடிப்பில் பெரும் எதிர்பார்ப்புக்கு மத்தியில் கடந்த ஜனவரி 10-ஆம் தேதி பொங்கல் விருந்தாக திரைக்கு வந்த திரைப்படம் 'பராசக்தி'. 1965-ஆம் ஆண்டு தமிழகத்தில் நடைபெற்ற இந்தி எதிர்ப்புப் போராட்டத்தை மையமாகக் கொண்டு எடுக்கப்பட்ட இந்தப் படம், வெளியான முதல் நாளிலிருந்தே பாக்ஸ் ஆபீஸில் தனது ஆதிக்கத்தைச் செலுத்தத் தொடங்கியது. தற்போது படம் வெளியாகி 10 நாட்கள் நிறைவடைந்துள்ள நிலையில், உலகம் முழுவதும் இந்தப் படம் 100 கோடி ரூபாய் வசூலைத் தாண்டியுள்ளதாகத் தயாரிப்பு நிறுவனமான ‘டான் பிக்சர்ஸ்’  ஒரு பிரத்யேக போஸ்டரை வெளியிட்டு உறுதிப்படுத்தியுள்ளது.

இந்த 100 கோடி வசூலில் தமிழகத்தில் மட்டும் சுமார் 50 கோடி ரூபாய்க்கு மேல் வசூலாகியுள்ளது குறிப்பிடத்தக்கது. கர்நாடகா மற்றும் கேரளா போன்ற அண்டை மாநிலங்களிலும், குறிப்பாக வெளிநாடுகளிலும்  படத்திற்கு நல்ல வரவேற்பு கிடைத்துள்ளது. படத்திற்குச் சமூக வலைதளங்களில் கலவையான விமர்சனங்கள் வந்த போதிலும், குடும்பங்கள் மற்றும் இளைஞர்களின் வருகையால் வசூல் குறையாமல் ஏறுமுகத்திலேயே உள்ளது. ‘அமரன்’ படத்தின் பிரம்மாண்ட வெற்றிக்குப் பிறகு, சிவகார்த்திகேயனுக்குத் தொடர்ச்சியாகக் கிடைக்கும் இந்த 100 கோடி வசூல், அவரது மார்க்கெட் வேல்யூவை அடுத்த கட்டத்திற்கு உயர்த்தியுள்ளது.

ஜி.வி. பிரகாஷின் பின்னணி இசை மற்றும் சுதா கொங்கராவின் எதார்த்தமான இயக்கம் ஆகியவை படத்திற்குப் பலமாக அமைந்துள்ளன. இதற்கிடையே, ஜீவா நடிப்பில் வெளியான 'தலைவர் தம்பி தலைமையின் கீழ்' மற்றும் கார்த்தியின் 'வா வாத்தியாரே' போன்ற படங்கள் போட்டியாக இருந்தும், ‘பராசக்தி’ தனது வசூல் வேட்டையைத் தடையின்றித் தொடர்ந்து வருகிறது. படத்தின் இரண்டாம் வாரத் தொடக்கத்திலும் பல திரையரங்குகளில் ‘ஹவுஸ்ஃபுல்’  காட்சிகள் ஓடிக்கொண்டிருப்பதால், வரும் நாட்களில் வசூல் இன்னும் அதிகரிக்க வாய்ப்புள்ளதாகத் திரையரங்கு உரிமையாளர்கள் தெரிவிக்கின்றனர்.
 

இதையும் படிங்க: வண்டலூர் பூங்காவில் ‘SK’ செய்த நெகிழ்ச்சி காரியம்!  பூங்கா அதிகாரிகளுக்கு பாராட்டு!

இதையும் படிங்க: விஜய் நடிகரா இருந்தா டெல்லிக்கு அழைத்திருப்போம்! பராசக்தி படக்குழு விவகாரத்தில் தமிழிசை சௌந்தரராஜன் விளக்கம்!