முதல்முறை வாக்காளர்களுக்காக அக். 10-ல் சிறப்பு முகாம்! தலைமை தேர்தல் அதிகாரி அறிவிப்பு!
தகுதியுடைய இளம் மற்றும் முதல்முறை வாக்காளர்களை வாக்காளர் பட்டியலில் சேர்க்க அக். 10 அன்று தமிழகத்தின் மாவட்டங்களில் சிறப்பு முகாம்கள் நடைபெறும் என தேர்தல் அதிகாரி அறிவித்துள்ளார்.
- Wed, 07 Oct 2026 19:13:13 IST
by
Thenmozhi Kumar
- #
தமிழ்நாட்டில் தகுதிவாய்ந்த இளம் மற்றும் முதல்முறை வாக்காளர்களை வாக்காளர் பட்டியலில் சேர்ப்பதற்காக அக். 7, 8 மற்றும் 9 ஆகிய தேதிகளில் சிறப்பு நடவடிக்கைகள் மேற்கொள்ளப்படும் என்றும், வரும் அக்டோபர் 10-ஆம் தேதி (சனிக்கிழமை) மாவட்டங்களில் தேவைக்கேற்ப சிறப்பு முகாம்கள் நடத்தப்படும் என்றும் தமிழ்நாடு தலைமைத் தேர்தல் அதிகாரி மற்றும் அரசு முதன்மைச் செயலாளர் அர்ச்சனா பட்நாயக் அதிகாரப்பூர்வமாக அறிவித்துள்ளார்.
இந்தியத் தேர்தல் ஆணையத்தின் அறிவுறுத்தலின்படி, சிறப்புத் தீவிரத் திருத்தப் பணி நிறைவடைந்துள்ள மாநிலங்கள் மற்றும் யூனியன் பிரதேசங்களில் விடுபட்ட தகுதியுள்ள இளம் மற்றும் முதல்முறை வாக்காளர்களைப் பதிவு செய்வதற்கான சிறப்பு நடவடிக்கைகளை மேற்கொள்ள உத்தரவிடப்பட்டுள்ளது. இதன்படி, தமிழக அரசின் பொதுத் (தேர்தல்கள்-I) துறை சார்பில் இன்று (07-10-2026) முக்கியச் செய்திக்குறிப்பு வெளியிடப்பட்டுள்ளது.
அதில், இளம் மற்றும் முதல்முறை வாக்காளர்களை வாக்காளர் பட்டியலில் விரைவாக இணைக்கும் நோக்கில், 2026 அக்டோபர் 7, 8 மற்றும் 9 ஆகிய மூன்று தினங்களில் சிறப்புப் பதிவு நடவடிக்கைகள் மாநிலம் முழுவதும் தீவிரமாக நடத்தப்படும் என்று தெரிவிக்கப்பட்டுள்ளது. மேலும், வாக்காளர் பட்டியலில் சேரத் தகுதியுடைய இளம் வாக்காளர்களின் வசதிக்காக, மாவட்டங்களின் தேவைக்கேற்ப வரும் அக்டோபர் 10-ஆம் தேதி சனிக்கிழமை அன்று அனைத்துப் பகுதிகளிலும் சிறப்பு முகாம்கள் அமைக்கப்பட்டுப் படிவங்கள் பெறப்பட உள்ளன.
இதையும் படிங்க: வாக்காளர் பட்டியலில் பெயர் சேர்க்க சிறப்பு முகாம்கள்: தலைமை தேர்தல் அதிகாரி அர்ச்சனா பட்நாயக் அறிவிப்பு!
குறிப்பாக, முதல்முறை மற்றும் இளம் வாக்காளர்களின் சேர்க்கை விகிதத்தை அதிகரிக்கும் நோக்கில், நகர்ப்புறப் பகுதிகள் மற்றும் பெருநகரங்களுக்கு இம்முகாம்களில் சிறப்புக் கவனம் செலுத்தப்படும். அத்துடன், பள்ளிகள் மற்றும் கல்லூரிகளில் செயல்பட்டு வரும் தேர்தல் கல்வியறிவுக் குழுக்களின் சேவைகளை முழுமையாகப் பயன்படுத்தி, தகுதியுடைய மாணவ-மாணவிகளிடையே விழிப்புணர்வு ஏற்படுத்தப்பட்டு அவர்களைப் பட்டியலில் சேர்க்க நடவடிக்கை எடுக்கப்படும் என்றும் கூறப்பட்டுள்ளது.
இச்சிறப்பு முகாம்கள் குறித்து ஊடகங்கள் மற்றும் மாவட்டத் தேர்தல் அதிகாரிகளின் அதிகாரப்பூர்வ சமூக வலைதளப் பக்கங்கள் மூலம் பரவலாக விளம்பரம் செய்யப்படும். மேலும், வாக்காளர் பதிவு அலுவலர்கள் வாக்குச்சாவடி நிலை அலுவலர்களுடன் தொடர் ஆய்வுக் கூட்டங்களை நடத்திப் பணிகளைத் தீவிரமாகக் கண்காணிப்பார்கள் என்று தலைமைத் தேர்தல் அதிகாரி அர்ச்சனா பட்நாயக் தெரிவித்துள்ளார்.
இதையும் படிங்க: வாக்காளர் பட்டியலில் பெயர் சேர்க்க சிறப்பு முகாம்கள்: தலைமை தேர்தல் அதிகாரி அர்ச்சனா பட்நாயக் அறிவிப்பு!
