தமிழகம் வரும் ராகுல்காந்தி! தமிழக காங்கிரசில் அதிரடி மாற்றம்! 77 புதிய மாவட்ட தலைவர்களுக்கு சிறப்பு பயிற்சி!
தமிழக காங்கிரசுக்கு புதிய மாவட்ட தலைவர்களை அகில இந்திய காங்கிரஸ் கமிட்டி நேரடியாக தேர்வு செய்தது. அவ்வாறு தேர்வு செய்யப்பட்ட 77 மாவட்ட தலைவர்களுக்கும் 10 நாட்கள் பயிற்சி வழங்கப்படுகிறது.
by
தமிழக காங்கிரஸ் கட்சியின் அமைப்பை மேலும் வலுப்படுத்தும் நோக்கில், அகில இந்திய காங்கிரஸ் கமிட்டி (AICC) தேர்வு செய்துள்ள 77 புதிய மாவட்ட தலைவர்களுக்கு 10 நாட்கள் சிறப்பு பயிற்சி வழங்கப்பட உள்ளது. இந்த பயிற்சி முகாம் வருகிற ஜூலை 23 முதல் ஆகஸ்ட் 1 வரை மகாபலிபுரத்தில் நடைபெறுகிறது. மாநிலம் முழுவதும் இருந்து தேர்வு செய்யப்பட்ட மாவட்ட தலைவர்கள் இதில் பங்கேற்க உள்ளனர்.
கட்சி நிர்வாக திறன், அமைப்பு வளர்ச்சி, உறுப்பினர் சேர்க்கை, தேர்தல் பணிகள், மக்கள் தொடர்பு மற்றும் நவீன அரசியல் செயல்பாடுகள் உள்ளிட்ட பல்வேறு அம்சங்கள் குறித்து இந்த பயிற்சியில் விளக்கப்பட உள்ளது. பயிற்சி முகாமின் போது கட்சியின் தேசிய தலைவர்களும் மூத்த நிர்வாகிகளும் கலந்துகொண்டு ஆலோசனைகளை வழங்க உள்ளதாக தகவல்கள் வெளியாகியுள்ளன.
மேலும், இந்த 10 நாள் பயிற்சியின் ஏதாவது ஒரு நாளில் மக்களவை எதிர்க்கட்சித் தலைவர் ராகுல் காந்தியும் கலந்து கொண்டு புதிய மாவட்ட தலைவர்களுடன் கலந்துரையாடுவார் என கூறப்படுகிறது. இதுகுறித்து அதிகாரப்பூர்வ அறிவிப்பு இன்னும் வெளியாகவில்லை.
இதையும் படிங்க: நாடாளுமன்ற மழைக்கால கூட்டத்தொடர்..! 8 மசோதாக்கள் ரெடி..! மத்திய அரசு அதிரடி ஆக்சன்..!!
இந்த பயிற்சி நிறைவடைந்த பிறகு, மாநிலம் முழுவதும் வட்டார, நகர மற்றும் பேரூர் காங்கிரஸ் தலைவர்களை தேர்வு செய்யும் பணிகள் தொடங்கப்பட உள்ளன. இதற்காக ஒவ்வொரு மாவட்டத்திற்கும் தனித்தனி பார்வையாளர்கள் நியமிக்கப்படவுள்ளனர்.
அவர்கள் நேரடியாக அந்தந்த பகுதிகளுக்குச் சென்று கட்சி நிர்வாகிகள் மற்றும் தொண்டர்களிடம் கருத்துகளை கேட்டறிந்து, பொறுப்புக்கு தகுதியானவர்களின் பட்டியலை தயாரிப்பார்கள். பின்னர், மாநில காங்கிரஸ் தலைவர் ஒப்புதலுடன் புதிய நிர்வாகிகள் அதிகாரப்பூர்வமாக நியமிக்கப்படுவார்கள்.
இந்த முழு அமைப்பு மறுசீரமைப்பு பணிகளை அடுத்த இரண்டு மாதங்களுக்குள் நிறைவு செய்ய கட்சி திட்டமிட்டுள்ளதாக தகவல்கள் தெரிவிக்கின்றன. வட்டார, நகர மற்றும் பேரூர் மட்டங்களில் மட்டும் சுமார் ஆயிரம் புதிய நிர்வாகிகள் பொறுப்பேற்க வாய்ப்புள்ளதாக கூறப்படுகிறது. புதிய தலைமுறையினருக்கு வாய்ப்பு வழங்கப்படுவதன் மூலம் கட்சிக்கு புதிய உற்சாகம் கிடைக்கும் என்றும், களப்பணிகள் மேலும் வலுப்பெறும் என்றும் காங்கிரஸ் நிர்வாகிகள் நம்பிக்கை தெரிவித்துள்ளனர்.
இதற்கிடையில், மாநில அளவிலான நிர்வாகிகள் நியமனம் குறித்த எதிர்பார்ப்பும் கட்சிக்குள் அதிகரித்துள்ளது. தற்போதைய மாநில நிர்வாகிகள் பல ஆண்டுகளாக பதவியில் உள்ளதால், மாநில நிர்வாக அமைப்பிலும் விரைவில் மாற்றம் கொண்டு வர வேண்டும் என்ற கோரிக்கை கட்சியினரிடையே வலுத்து வருகிறது. இதனால், மாவட்ட மட்ட மாற்றங்களைத் தொடர்ந்து மாநில அளவிலும் முக்கிய அறிவிப்புகள் வெளியாகுமா என்ற எதிர்பார்ப்பு அரசியல் வட்டாரங்களில் உருவாகியுள்ளது.
இதையும் படிங்க: அயோத்தி ராமர் கோயில் நன்கொடை முறைகேடு விஸ்வரூபம்? பிரதமர் மோடிக்கு ராகுல்-கார்கே கூட்டாக கடிதம்!
