காற்றழுத்த தாழ்வால் தமிழகத்தில் மீண்டும் கனமழை எச்சரிக்கை! 8 மாவட்டங்களுக்கு அலர்ட்!
தமிழகத்தில் இன்று காஞ்சிபுரம், செங்கல்பட்டு, கோவை, நீலகிரி உள்ளிட்ட 8 மாவட்டங்களில் கனமழைக்கு வாய்ப்புள்ளதாக சென்னை வானிலை மையம் அறிவித்துள்ளது. மேலும் பல மாவட்டங்களில் மிதமான மழையும் பெய்யும் என தெரிவிக்கப்பட்டுள்ளது.
by
தமிழகத்தில் மழை மீண்டும் தீவிரமடையும் சூழல் உருவாகியுள்ளது. சென்னை வானிலை ஆய்வு மையம் வெளியிட்டுள்ள சமீபத்திய அறிவிப்பின்படி, இன்று (ஆகஸ்ட் 3) மாநிலத்தின் 8 மாவட்டங்களில் கனமழை பெய்யக்கூடும் என எச்சரிக்கை விடுக்கப்பட்டுள்ளது. இதனால் பொதுமக்கள் மற்றும் விவசாயிகள் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளது.
வானிலை ஆய்வு மையத்தின் தகவலின்படி, வட உள்கர்நாடகத்தில் இருந்து குமரிக்கடல் வரை தென் உள்கர்நாடகம், கேரளா மற்றும் தமிழகம் வழியாக ஒரு காற்றழுத்த தாழ்வு பாதை நிலவுகிறது. மேலும், தெற்கு குஜராத்தில் இருந்து கேரளா வரை மற்றொரு காற்றழுத்த தாழ்வு பாதையும் உருவாகியுள்ளது. இந்த இரு வானிலை அமைப்புகளின் தாக்கம் காரணமாக தமிழகத்தின் பல பகுதிகளில் மழை தீவிரமடையும் என்று கூறப்பட்டுள்ளது.
இன்று கனமழைக்கு வாய்ப்புள்ள மாவட்டங்களாக காஞ்சிபுரம், செங்கல்பட்டு, திருவண்ணாமலை, விழுப்புரம், கடலூர், தேனி, கோவை மற்றும் நீலகிரி ஆகியவை குறிப்பிடப்பட்டுள்ளன. குறிப்பாக மலைப்பகுதிகள் மற்றும் மேற்கு தொடர்ச்சி மலைப் பகுதிகளில் வசிக்கும் மக்கள் கூடுதல் எச்சரிக்கையுடன் இருக்குமாறு வானிலை ஆய்வு மையம் அறிவுறுத்தியுள்ளது.
இதையும் படிங்க: தமிழக விவசாயிகளுக்கு குட் நியூஸ்! காவிரி நீர்ப்பிடிப்பு பகுதிகளில் கொட்டும் கனமழை... 5 மாவட்டங்களுக்கு வானிலை அலர்ட்!
இதனுடன், டெல்டா மாவட்டங்கள், வட கடலோர தமிழகத்தின் சில பகுதிகள், மேற்கு தொடர்ச்சி மலை மாவட்டங்கள் மற்றும் காரைக்கால் பகுதிகளில் இன்று மிதமான மழை பெய்யும் வாய்ப்பும் இருப்பதாக தெரிவிக்கப்பட்டுள்ளது.
வரும் நாட்களுக்கான முன்னறிவிப்பிலும் சில மாவட்டங்களுக்கு கனமழை எச்சரிக்கை தொடர்கிறது. ஆகஸ்ட் 6-ஆம் தேதி தேனி மற்றும் திருநெல்வேலி மாவட்ட மலைப்பகுதிகளில் கனமழை பெய்யக்கூடும். அதேபோல், ஆகஸ்ட் 7-ஆம் தேதி திருநெல்வேலி மலைப்பகுதிகளில் மீண்டும் கனமழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது.
தொடர்ச்சியாக பெய்து வரும் மழையால் தாழ்வான பகுதிகளில் தண்ணீர் தேங்கும் வாய்ப்பு இருப்பதால், தேவையற்ற பயணங்களை தவிர்க்கவும், உள்ளூர் நிர்வாகம் வெளியிடும் எச்சரிக்கைகளை கவனமாக பின்பற்றவும் பொதுமக்களுக்கு அறிவுறுத்தப்பட்டுள்ளது.
இதையும் படிங்க: குடையை தயாரா வச்சுக்கோங்க!! கொட்டித் தீர்க்கப்போகுது கனமழை!! 5 மாவட்டங்களுக்கு வந்தாச்சு அலர்ட்!
