தமிழகத்தில் வெளுத்து வாங்கப்போகும் வடகிழக்கு பருவமழை? நவம்பரில் என்ன நடக்கும்? வானிலை ஆய்வாளர் கணிப்பு!!

சென்னை: தமிழ்நாடு மற்றும் புதுச்சேரியில் இந்த ஆண்டு வடகிழக்கு பருவமழை இயல்பைவிட அதிகமாக பெய்ய வாய்ப்புள்ளதாக தனியார் வானிலை ஆய்வாளர் ஹேமச்சந்தர் தெரிவித்துள்ளார். குறிப்பாக நவம்பர் மாதத்தில் மழையின் தாக்கம் அதிகமாக இருக்கும் என்றும் அவர் கணித்துள்ளார்.

தமிழகத்தின் முக்கியமான மழைக்காலங்களில் ஒன்றாக வடகிழக்கு பருவமழை உள்ளது. ஆண்டுதோறும் அக்டோபர் மாதத்தில் தொடங்கும் இந்த பருவமழை, டெல்டா மாவட்டங்கள் முதல் சென்னை உள்ளிட்ட வட மாவட்டங்கள் வரை பல்வேறு பகுதிகளின் நீர்வளத்துக்கு முக்கிய பங்காற்றுகிறது. விவசாயத்துக்கும் இந்த மழை மிகவும் முக்கியமானதாக உள்ளது.

இந்த நிலையில், நடப்பு ஆண்டுக்கான வடகிழக்கு பருவமழை குறித்து தனியார் வானிலை ஆய்வாளர் ஹேமச்சந்தர் வெளியிட்டுள்ள கணிப்பு கவனம் பெற்றுள்ளது.

இதையும் படிங்க: வடகிழக்கு பருவமழை எதிரொலி! அலர்ட் மோடில் முதல்வர் விஜய்! இன்று 2-வது நாளாக ஆலோசனை!

அவரது கணிப்பின்படி, தமிழ்நாடு மற்றும் புதுச்சேரியில் அக்டோபர் 20-ம் தேதி முதல் டிசம்பர் 20-ம் தேதி வரை வடகிழக்கு பருவமழை தீவிரமாக இருக்கும் என தெரிவிக்கப்பட்டுள்ளது.

இதில் குறிப்பாக நவம்பர் மாதம் பிரதான மழை மாதமாக அமையும் என்றும் அவர் கூறியுள்ளார். பருவமழை காலத்தில் பல்வேறு கட்டங்களாக கனமழை பெய்யக்கூடிய சூழல் உருவாகலாம் என்றும் கணிக்கப்பட்டுள்ளது.

தமிழ்நாட்டில் வடகிழக்கு பருவமழை காலத்தில் சராசரியாக சுமார் 44 செ.மீ. மழை பதிவாகும். ஆனால், இந்த ஆண்டு சராசரியை விட அதிகமான மழை கிடைக்க வாய்ப்புள்ளதாக ஹேமச்சந்தர் தெரிவித்துள்ளார். அதன்படி, ஒட்டுமொத்த பருவத்தில் 50 முதல் 60 செ.மீ. வரை மழை பதிவாகக்கூடும் என அவர் கூறியுள்ளார்.

இந்த கணிப்பு உறுதி செய்யப்பட்ட அதிகாரப்பூர்வ வானிலை முன்னறிவிப்பு அல்ல என்பதால், மழையின் அளவு மற்றும் பரவல் குறித்து தொடர்ந்து வெளியாகும் வானிலை மைய அறிவிப்புகளை பொதுமக்கள் கவனிக்க வேண்டியது அவசியமாகும். குறிப்பாக கனமழை காலங்களில் தாழ்வான பகுதிகளில் வசிப்பவர்கள் முன்னெச்சரிக்கை நடவடிக்கைகளை மேற்கொள்ள வேண்டிய சூழல் ஏற்படலாம்.

வடகிழக்கு பருவமழை தொடங்க இன்னும் சில வாரங்களே உள்ள நிலையில், இந்த ஆண்டு இயல்பைவிட அதிக மழை பெய்யும் என்ற கணிப்பு தமிழக மக்களிடையே கவனத்தை ஏற்படுத்தியுள்ளது.

இதையும் படிங்க: மக்களே உஷார்! தமிழகத்தில் கொட்டப்போகும் கனமழை! நாளையும் தொடரும் எச்சரிக்கை! எந்தெந்த மாவட்டங்கள் தெரியுமா?