பெட்ரோல் பங்க்குகளில் இனி ‘கூகுள் பே’ கிடையாது? தமிழகம் முழுவதும் டிஜிட்டல் பணப் பரிவர்த்தனைக்கு திடீர் சிக்கல்!

சென்னை: தமிழகம் முழுவதும் உள்ள பெட்ரோல் பங்க்குகளில் டிஜிட்டல் முறையில் பணம் பெறுவதை தற்காலிகமாக நிறுத்துவது குறித்து பரிசீலிக்க வேண்டிய சூழல் உருவாகலாம் என தமிழக பெட்ரோலியம் டீலர்கள் சங்கம் எச்சரித்துள்ளது. இந்த விவகாரம் வாடிக்கையாளர்கள் மத்தியில் பரபரப்பை ஏற்படுத்தியுள்ளது.

தமிழகத்தில் சுமார் 7,000 பெட்ரோல் பங்க்குகள் செயல்பட்டு வருவதாக சங்கம் தெரிவித்துள்ளது. இங்கு நடைபெறும் மொத்த விற்பனையில் கணிசமான பகுதி தற்போது டிஜிட்டல் முறையில் நடைபெறுகிறது. கிரெடிட் மற்றும் டெபிட் கார்டுகள், கூகுள் பே உள்ளிட்ட UPI செயலிகள் மூலம் வாடிக்கையாளர்கள் எரிபொருளுக்கான கட்டணத்தை செலுத்தி வருகின்றனர்.

ஆனால், டிஜிட்டல் பணப் பரிவர்த்தனைகளில் ஒரு புதிய பிரச்னையை பெட்ரோல் பங்க் உரிமையாளர்கள் எதிர்கொள்வதாக சங்கம் கூறியுள்ளது. வாடிக்கையாளர் செலுத்தும் பணத்தின் பின்னணி அல்லது அந்தத் தொகை எங்கிருந்து வந்தது என்பது குறித்து பங்க் டீலர்களுக்கு முழுமையான தகவல் இருப்பதில்லை. இதனால், அந்தப் பணம் சட்டவிரோத பரிவர்த்தனையுடன் தொடர்புடையதாக சந்தேகிக்கப்பட்டால், விசாரணையில் டீலர்களும் சிக்க வேண்டிய நிலை ஏற்படுவதாக தெரிவிக்கப்பட்டுள்ளது.

இதையும் படிங்க: "நான் வேண்டாமா"..? காதல் பிரச்சனை... பல்லடத்தில் தாய், மகள் இரட்டை கொலை. இளைஞர் வெறிச்செயல்..!!

சைபர் கிரைம் வழக்குகளில் விசாரணை நடத்தும்போது பெட்ரோல் பங்க் உரிமையாளர்களை அதிகாரிகள் அழைத்து விசாரிப்பதாகவும், இதனால் தேவையற்ற மன உளைச்சல் ஏற்படுவதாகவும் சங்கம் குற்றம்சாட்டியுள்ளது. மேலும், விசாரணை தொடர்பான அறிவுறுத்தல்களை அடிப்படையாகக் கொண்டு சில நேரங்களில் வங்கிகள் டீலர்களின் கணக்குகளை முடக்குவதால், அன்றாட விற்பனை மற்றும் தொழில் நடவடிக்கைகள் பாதிக்கப்படுவதாகவும் கூறப்பட்டுள்ளது.

இதுபோன்ற நடவடிக்கைகள் தொடர்ந்தால், தமிழகம் முழுவதும் பெட்ரோல் பங்க்குகளில் டிஜிட்டல் பண வசூலை தற்காலிகமாக நிறுத்துவது குறித்து முடிவெடுக்க வேண்டிய கட்டாயம் ஏற்படலாம் என சங்க தலைவர் முரளி தெரிவித்துள்ளார்.

மேலும், டீலர்கள் மீது நேரடியாக நடவடிக்கை எடுப்பதற்கு முன், சந்தேகத்திற்குரிய பரிவர்த்தனை குறித்த விவரங்களை எழுத்துப்பூர்வமாக தெரிவித்து, உரிய விசாரணை நடைமுறைகளை அதிகாரிகள் பின்பற்ற வேண்டும் என்றும் அவர் வலியுறுத்தியுள்ளார்.

டிஜிட்டல் பரிவர்த்தனைகள் தொடர்பான சைபர் கிரைம் விசாரணைகளில் பெட்ரோல் பங்க் டீலர்கள் எவ்வாறு கையாளப்பட வேண்டும் என்பது குறித்து மத்திய உள்துறை அமைச்சகம் தெளிவான வழிகாட்டுதல்களை வெளியிட வேண்டும் என்றும் சங்கம் கோரிக்கை விடுத்துள்ளது.

இதனால், பெட்ரோல் பங்க்குகளில் வழக்கமாக UPI அல்லது கார்டு மூலம் பணம் செலுத்தும் வாடிக்கையாளர்கள் மத்தியில், டிஜிட்டல் கட்டண வசதி தொடருமா என்ற கேள்வி எழுந்துள்ளது.

இதையும் படிங்க: காவிரி நீர் விவகாரம்! உச்சநீதிமன்றத்தை நாடிய தமிழக அரசு! 13ம் தேதி முக்கிய விசாரணை!