பொங்கல் பரிசு வாங்க வேற வழி இருக்கா?!! வெளியூரில் வசிக்கும் மக்கள்! அரசுக்கு வைக்கும் கோரிக்கை!!

தமிழகத்தில் பொங்கல் பண்டிகையை முன்னிட்டு அரிசி ரேஷன் கார்டுதாரர்களுக்கு வழங்கப்பட்ட ரூ.3,000 ரொக்கம் + பரிசுத் தொகுப்பு பெரும்பாலானோருக்கு சென்றடைந்துள்ள நிலையில், வெளிமாநிலங்கள், தொலைதூர நகரங்களில் வசிக்கும் பலர் இன்னும் பெற முடியாமல் தவித்து வருகின்றனர். இதனால், "வங்கி கணக்கில் நேரடியாக வரவு வைக்க வேண்டும்" அல்லது "உறவினர்கள் மூலம் பெற அனுமதி வழங்க வேண்டும்" என்ற கோரிக்கை வலுத்து வருகிறது.

தமிழக அரசு 2026 பொங்கல் பண்டிகைக்காக 2.22 கோடி அரிசி ரேஷன் கார்டு குடும்பங்களுக்கு தலா ரூ.3,000 ரொக்கம், 1 கிலோ பச்சரிசி, 1 கிலோ சர்க்கரை, ஒரு முழு கரும்பு, வேட்டி-சேலை ஆகியவற்றை உள்ளடக்கிய பரிசுத் தொகுப்பை வழங்கியது. 

முதல்வர் மு.க. ஸ்டாலின் ஜனவரி 8-ஆம் தேதி சென்னை அலந்தூரில் தொடங்கி வைத்த இத்திட்டத்தின் மொத்த செலவு சுமார் ரூ.6,936 கோடி என அறிவிக்கப்பட்டது. ஜனவரி 8 முதல் 14 வரை முதன்மை விநியோகம் நடைபெற்றது. அதன் பின்னரும், தவறியவர்களுக்கு தொடர்ந்து வழங்கப்பட்டு வருகிறது.

இதையும் படிங்க: பொங்கல் பரிசு தொகுப்பில் குறையா?! தரமில்லாத பொருட்கள் விநியோகமா?! அரசு அதிரடி உத்தரவு!

அதிகாரப்பூர்வ தரவுகளின்படி, 2.15 கோடி குடும்பங்கள் (97%) பரிசை பெற்று விட்டன. மீதமுள்ள 7.6 லட்சம் கார்டுதாரர்களில் பெரும்பாலானோர் சொந்த ஊருக்கு வெளியே – சென்னை, பெங்களூரு, மும்பை, டெல்லி போன்ற நகரங்கள் அல்லது வெளிமாநிலங்களில் வேலை செய்பவர்கள், திருமணத்தால் பிரிந்து புதிய கார்டு விண்ணப்பித்தவர்கள், 10 ஆண்டுகளுக்கு முன் உயிரிழந்த குடும்ப உறுப்பினர்களின் வாரிசுகள் போன்றோர் ஆவர். ஒவ்வொரு ரேஷன் கடையிலும் சராசரியாக 10 முதல் 50 பேர் வரை இன்னும் பெறாத நிலையில் உள்ளதாக கடை ஊழியர்கள் தெரிவிக்கின்றனர்.

இவர்கள் பெரும்பாலும் பயணச் செலவு, வேலை இடைவெளி, நேர வசதி இல்லாததால் நேரில் வர முடியாமல் தவிக்கின்றனர். "ரூ.3,000-ஐ நேரடியாக வங்கி கணக்குக்கு அனுப்பினால் அல்லது எங்களது எழுத்துப்பூர்வ சம்மதத்துடன் உறவினர்கள்/நண்பர்கள் மூலம் பெற அனுமதித்தால் போதும்" என்று பலர் சமூக வலைதளங்களிலும், ஊடகங்களிலும் கோரிக்கை விடுத்து வருகின்றனர். சிலர் "பொங்கல் முடிந்த பிறகும் பெற முடியாத நிலை ஏன்?" என்று கேள்வி எழுப்புகின்றனர்.

இதுகுறித்து தமிழக உணவு வழங்கல் துறை இயக்குநர் சிவராசு கூறுகையில், "இதுவரை பெறாதவர்கள் ரேஷன் கடைக்கு நேரில் சென்று பரிசுத் தொகுப்பை (ரொக்கம் உட்பட) வாங்கிக் கொள்ளலாம். தேவையான ஆவணங்களுடன் சென்றால் உடனடியாக வழங்கப்படும்" என்றார். இருப்பினும், வெளியூர் வசிப்பவர்களுக்கான மாற்று வழி குறித்து எந்த அறிவிப்பும் இதுவரை வெளியாகவில்லை.

இந்நிலையில், தேர்தல் காலத்தை முன்னிட்டு அறிவிக்கப்பட்ட இத்திட்டத்தில், பயனாளர்களின் சிரமங்களை கருத்தில் கொண்டு அரசு விரைவில் மாற்று ஏற்பாடு செய்ய வேண்டும் என்ற எதிர்பார்ப்பு அதிகரித்துள்ளது. வெளிமாநில தமிழர்களின் குரல் இப்போது வலுத்து வருவதால், அரசு விரைவில் பதிலளிக்குமா என்பது காத்திருப்பு தொடர்கிறது.

இதையும் படிங்க: பொங்கலுக்கு வேட்டி, சேலை உண்டா? ரொக்கம் எவ்வளவு? புதுச்சேரி அரசு வெளியிட்ட முக்கிய அறிவிப்பு!