அடிக்கடி ஏற்படும் மின்தடை! அல்லல்படும் மக்கள்! மின் வாரியம் புதிய திட்டம்!

சென்னை: தமிழகத்தில் அடிக்கடி ஏற்படும் மின் தடை பிரச்னைக்கு நிரந்தர தீர்வு காண மின் வாரியம் புதிய முயற்சியைத் தொடங்கியுள்ளது. ஆர்.டி.இ.பி. எனப்படும் மீண்டும் மீண்டும் ஏற்படும் மின் துண்டிப்புகளை ஒழிக்கும் திட்டத்தை செயல்படுத்த மின் வாரிய தலைவர் ராதாகிருஷ்ணன் உத்தரவு பிறப்பித்துள்ளார். 

தமிழகத்தில் பல இடங்களில் துணை மின் நிலையங்கள், மின் வழித்தடங்கள் மற்றும் டிரான்ஸ்பார்மர்களில் அடிக்கடி பழுது ஏற்படுவதால் மக்கள் கடும் அவதிக்கு ஆளாகின்றனர். இந்தப் பிரச்னையை முழுமையாகக் களையும் வகையில் இந்த புதிய திட்டம் உருவாக்கப்பட்டுள்ளது. கடந்த ஆறு மாதங்களில் தொடர்ந்து மின் தடை ஏற்பட்ட பகுதிகளை மண்டல பொறியாளர்கள் உடனடியாக அடையாளம் காண வேண்டும் என்று உத்தரவு வழங்கப்பட்டுள்ளது.

ஒவ்வொரு மின் துண்டிப்பு எத்தனை முறை நிகழ்ந்தது, எவ்வளவு நேரம் மின் தடை நீடித்தது, எத்தனை நுகர்வோர் பாதிக்கப்பட்டனர், மருத்துவமனை, பள்ளி, கல்லூரி உள்ளிட்ட அத்தியாவசிய சேவைகள் எவ்வளவு பாதிக்கப்பட்டன என்பது உள்ளிட்ட விவரங்களை தனிப்பதிவேட்டில் பதிவு செய்ய வேண்டும். மழை, புயல் போன்ற வானிலை காரணமா அல்லது சாதனப் பழுதா என்பதையும் ஆராய வேண்டும். 

இதையும் படிங்க: ரூ.11,526 கோடி!!! திமுக ஆட்சியில் அரசு துறைகளில் பயன்படுத்தப்படாத பணம்!! கருவூலத்தில் ஒப்படைப்பு!

மின் தடை அடிக்கடி ஏற்படும் இடங்களில் புதிய துணை மின் நிலையங்கள் அமைப்பது, கூடுதல் டிரான்ஸ்பார்மர்கள் நிறுவுவது, பழுதடைந்த மின் சாதனங்களை உடனடியாக மாற்றுவது உள்ளிட்ட நடவடிக்கைகளை விரைவாக மேற்கொள்ள உத்தரவிடப்பட்டுள்ளது. இதன் மூலம் மக்களுக்கு தொடர் மின் தடை பிரச்னையிலிருந்து நிவாரணம் கிடைக்கும் என எதிர்பார்க்கப்படுகிறது.

மின் வாரிய அதிகாரிகள் இந்த திட்டத்தை தீவிரமாக செயல்படுத்தினால், குறிப்பாக கோடை காலத்தில் மின் தேவை அதிகரிக்கும் போது மக்கள் பெரும் நிம்மதி அடையலாம். தற்போது பல பகுதிகளில் மின் தடை காரணமாக வியாபாரம், தொழில் மற்றும் அன்றாட வாழ்க்கை பாதிக்கப்படுவது வழக்கமாக உள்ளது. இந்தப் புதிய முயற்சி வெற்றி பெற்றால் மின் வழங்கல் தரம் மேம்படும் என மக்கள் நம்பிக்கை தெரிவிக்கின்றனர். 

மின் வாரியம் இந்த திட்டத்தின் மூலம் மக்களின் மின் தேவையை சிறப்பாக நிறைவேற்றும் என எதிர்பார்க்கப்படுகிறது. 

இதையும் படிங்க: பொறுப்பேற்ற மறுநாளில் இடமாற்றம்! ஒரே நாளில் ட்ரான்ஸ்ஃபர் செய்யப்பட்ட IAS!