தமிழகத்தில் உள்ள மதுக்கடைகள் எண்ணிக்கை எத்தனை?! மூடப்பட்ட கடைகள் எவ்வளவு? பதிலளிக்க டாஸ்மாக் மறுப்பு!

சென்னை: தமிழகத்தில் உள்ள மொத்த மதுக்கடைகளின் எண்ணிக்கை மற்றும் சமீபத்தில் மூடப்பட்ட கடைகள் குறித்த தகவல்களை தகவல் அறியும் உரிமைச் சட்டத்தின் கீழ் கேட்டதற்கு, “கோப்பு நிலுவையில் உள்ளது, எனவே தகவல் வழங்க இயலாது” என டாஸ்மாக் நிர்வாகம் பதில் அளித்துள்ளது. இந்தப் பதில் பெரும் விமர்சனத்துக்கு உள்ளாகியுள்ளது.

தமிழக அரசின் மதுவகை விற்பனை நிறுவனமான டாஸ்மாக் தற்போது 4,765 சில்லரை மதுக்கடைகள் மூலம் மது விற்பனையை மேற்கொண்டு வருகிறது. மக்கள் நலன் கருதி, கல்வி நிலையங்கள், வழிபாட்டுத் தலங்கள், பேருந்து நிலையங்கள் உள்ளிட்ட இடங்களுக்கு அருகில் இருந்த 717 மதுக்கடைகளை இரு வாரங்களுக்குள் மூட உத்தரவிட்டார் முதலமைச்சர் விஜய். கடந்த மாதம் 12-ம் தேதி பிறப்பிக்கப்பட்ட இந்த உத்தரவின்படி, அந்தக் கடைகள் சமீபத்தில் மூடப்பட்டன.

இந்நிலையில், சென்னை அயப்பாக்கத்தைச் சேர்ந்த காசிமாயன் என்பவர், மே 19-ம் தேதி டாஸ்மாக் நிறுவனத்துக்கு தகவல் அறியும் உரிமை மனு ஒன்றை அனுப்பினார். மொத்த மதுக்கடைகளின் எண்ணிக்கை, மூடப்பட்ட கடைகளின் விவரம் உள்ளிட்ட தகவல்களை கோரிய அவர், இம்மாதம் 5-ம் தேதி பெற்ற பதிலில் அதிர்ச்சி அடைந்தார். “கோப்பு நிலுவையில் உள்ளது. எனவே தகவல் வழங்க இயலாது” என டாஸ்மாக் நிர்வாகம் எழுத்துப்பூர்வமாக தெரிவித்துள்ளது.

இதையும் படிங்க: போலி வெற்றி நீண்ட நாள் நிலைக்காது CM சார்! திமுக சாதனைகள் மீது தவெக ஸ்டிக்கர் ஒட்டியதாக உதயநிதி விமர்சனம்!

மக்கள் வரிப்பணத்தில் இயங்கும் டாஸ்மாக் நிறுவனம் அடிப்படை தகவல்களைக்கூட வெளியிட மறுப்பது ஏன் என்பது குறித்து அரசியல் கட்சிகள் மற்றும் சமூக ஆர்வலர்கள் கேள்வி எழுப்பி வருகின்றனர். முதலமைச்சர் விஜய் மதுக்கடைகளை குறைப்பதாக அறிவித்த நிலையில், துல்லியமான எண்ணிக்கை விவரங்கள் பொதுமக்களுக்கு தெரியவேண்டும் என்பது பலரின் எதிர்பார்ப்பாக உள்ளது.

இந்த விவகாரம் தமிழக அரசின் தகவல் வெளிப்படைத்தன்மை குறித்த விவாதத்தை எழுப்பியுள்ளது. டாஸ்மாக் போன்ற பொதுத் துறை நிறுவனங்கள் RTI மனுக்களுக்கு உரிய நேரத்தில் முழுமையான பதில் அளிக்க வேண்டும் என உரிமை ஆர்வலர்கள் வலியுறுத்துகின்றனர்.

தற்போது மதுக்கடைகள் எண்ணிக்கை குறித்த தகவல்கள் மக்களிடமிருந்து மறைக்கப்படுவதாகவும், அரசு இதில் வெளிப்படைத்தன்மையுடன் செயல்பட வேண்டும் எனவும் கோரிக்கைகள் எழுந்துள்ளன. இந்த RTI மறுப்பு விவகாரம் அடுத்தக்கட்ட நடவடிக்கைகளுக்கு வழிவகுக்கும் என எதிர்பார்க்கப்படுகிறது.

இதையும் படிங்க: எம்.ஜி.ஆர் பாணியில் விஜய்! கொல்லூர் மூகாம்பிகை கோயிலில் இன்று வழிபாடு! சிறப்பு பூஜை!