டாஸ்மாக் பார் தொடங்குவதற்கான விதிகள் தளர்வு! மாறிய விதிமுறைகள்! முழு விவரம்!

தமிழகத்தில் டாஸ்மாக் மதுக்கடைகளுடன் இணைந்து செயல்படும் பார்கள் தொடர்பாக புதிய தளர்வுகள் மற்றும் விதிமுறை மாற்றங்களை டாஸ்மாக் நிர்வாகம் அறிவித்துள்ளது. புதிய டெண்டர் நடைமுறைக்கு ஏற்ப வெளியிடப்பட்டுள்ள இந்த மாற்றங்கள், பார் உரிமம் பெற விரும்புவோர் மற்றும் ஏற்கனவே பார் நடத்தி வருபவர்கள் மத்தியில் கவனத்தை ஈர்த்துள்ளன.

இதுவரை டாஸ்மாக் மதுக்கடையை ஒட்டிய பகுதிகளில் மட்டுமே பார் அமைக்க அனுமதி வழங்கப்பட்டு வந்தது. ஆனால் புதிய விதிமுறையின்படி, இனி டாஸ்மாக் மதுக்கடையில் இருந்து 100 மீட்டர் சுற்றளவுக்குள் பார் அமைக்க அனுமதி வழங்கப்படும். இதன் மூலம் பார் அமைப்பதற்கான இடத் தேர்வில் கூடுதல் சலுகை கிடைக்கும் என்று எதிர்பார்க்கப்படுகிறது.

அதேபோல், பார் அமைப்பதற்கான குறைந்தபட்ச பரப்பளவும் மாற்றப்பட்டுள்ளது. முன்பு 15 சதுர மீட்டர் பரப்பளவு போதுமானதாக இருந்த நிலையில், தற்போது அது 20 சதுர மீட்டராக உயர்த்தப்பட்டுள்ளது. வாடிக்கையாளர்களுக்கு கூடுதல் இடவசதி மற்றும் மேம்பட்ட அடிப்படை வசதிகளை ஏற்படுத்தும் நோக்கில் இந்த மாற்றம் செய்யப்பட்டுள்ளதாக கூறப்படுகிறது.

இதையும் படிங்க: பாட்டிலுக்கு 10 ரூபாய்... 27ம் தேதிக்கு பிறகு காத்திருக்கும் ட்விஸ்ட்... அமைச்சர் விக்னேஷ் அதிரடி அறிவிப்பு...!

டாஸ்மாக் பார்களில் நீண்ட காலமாக நிலவி வந்த ஏகபோக உரிமை நடைமுறையிலும் மாற்றம் கொண்டு வரப்பட்டுள்ளது. புதிய டெண்டர் விதிகளின் மூலம் குறிப்பிட்ட ஒப்பந்ததாரர்கள் மட்டுமே தொடர்ந்து பார் நடத்தும் நிலை மாறி, புதிய விண்ணப்பதாரர்களுக்கும் டெண்டரில் பங்கேற்று உரிமம் பெற வாய்ப்பு உருவாகும் என எதிர்பார்க்கப்படுகிறது.

இதற்கிடையில், பழைய பார் உரிமங்களின் காலம் முடிவடைந்ததைத் தொடர்ந்து, புதிய டெண்டர் விதிமுறைகள் இறுதி செய்யப்படும் வரை பார்கள் தற்காலிகமாக செயல்பட அனுமதி வழங்கப்பட்டிருந்தது. தற்போது புதிய நடைமுறைகள் அமலுக்கு வருவதற்கான பணிகள் தீவிரமாக நடைபெற்று வருகின்றன.

இடவசதி தொடர்பான தளர்வுகள் வழங்கப்பட்டாலும், பார்களில் விதிக்கப்பட்டுள்ள கட்டுப்பாடுகள் தொடர்ந்து அமலில் இருக்கும் என்று டாஸ்மாக் நிர்வாகம் தெரிவித்துள்ளது. குறிப்பாக, பீடி மற்றும் சிகரெட் விற்பனைக்கு தடை, குடிநீர் மற்றும் சிற்றுண்டிகளை நிர்ணயிக்கப்பட்ட விலையை விட அதிகமாக விற்கக் கூடாது உள்ளிட்ட விதிமுறைகள் கடுமையாக கண்காணிக்கப்படும் என்றும் அதிகாரிகள் தெரிவித்துள்ளனர்.

புதிய டெண்டர் மற்றும் விதிமுறை மாற்றங்கள் நடைமுறைக்கு வந்த பிறகு, டாஸ்மாக் பார்கள் செயல்படும் முறை மற்றும் உரிமம் வழங்கும் நடைமுறையில் குறிப்பிடத்தக்க மாற்றங்கள் ஏற்படும் என எதிர்பார்க்கப்படுகிறது.

இதையும் படிங்க: மதுப்பிரியர்களுக்கு குட் நியூஸ்! டாஸ்மாக்கில் 54 புதிய மதுபான பிராண்டுகள்? விரைவில் அறிமுகம் செய்ய திட்டம்!