விடுதி உணவை சாப்பிட்ட அரசுப்பள்ளி மாணவிகள்.. வாந்தி, மயக்கத்தால் ஹாஸ்பிடலில் அட்மிட்..!

தமிழ்நாட்டில் அரசு மற்றும் தனியார் விடுதிகளில் தங்கியிருக்கும் மாணவர்கள், உணவு உட்கொண்ட பின்னர் உடல்நலக் குறைவு ஏற்பட்டு மருத்துவமனைகளில் அனுமதிக்கப்படும் சம்பவங்கள் சமீப காலமாக அதிகரித்து வருகின்றன. தென்காசி, குற்றாலம், திருவண்ணாமலை, தஞ்சாவூர் உள்ளிட்ட பல மாவட்டங்களில் உள்ள அரசு மற்றும் அரசு உதவி பெறும் பள்ளி விடுதிகளில் மாணவர்கள் உணவு விஷத்தால் பாதிக்கப்பட்டுள்ளனர். 

தென்காசி மாவட்டம், குற்றாலம் அருகே பண்பொழி அரசு மகளிர் மேல்நிலைப் பள்ளி செயல்பட்டு வருகிறது. இந்து சமய அறநிலையத்துறை கட்டுப்பாட்டில் உள்ள இந்த பள்ளியின் விடுதியில் 53 மாணவிகள் தங்கி படித்து வருகின்றனர். இந்நிலையில் விடுதியில் தங்கியிருந்த மாணவிகள், உணவு உட்கொண்ட பின்னர் உடல்நலக் குறைவு ஏற்பட்டு மருத்துவமனையில் அனுமதிக்கப்பட்ட சம்பவம் அதிர்ச்சியை ஏற்படுத்தியுள்ளது. 

விடுதியில் இரவு உணவு உண்ட புன்னையாபுரம், கேரளா, போகநல்லூர் பகுதியை சேர்ந்த 9 மாணவிகளுக்கு திடீரென வாந்தி, மயக்கம் உள்ளிட்ட அறிகுறிகள் தோன்றியதை அடுத்து, அவர்கள் உடனடியாக 108 ஆம்புலன்ஸ் மூலம் தென்காசி அரசு மருத்துவமனைக்கு கொண்டு செல்லப்பட்டனர். மருத்துவர்கள் மாணவிகளுக்கு தீவிர சிகிச்சை அளித்து வருகின்றனர். இவர்களில் பெரும்பாலோர் உணவு விஷத்தால் பாதிக்கப்பட்டிருக்கலாம் என முதற்கட்ட விசாரணையில் தெரியவந்துள்ளது.

இதையும் படிங்க: அரசுப்பள்ளி மாணவர்களின் உயிருடன் விளையாடுவதா..? கேள்வியால் துளைத்தெடுத்த டிடிவி தினகரன்..!

இதையடுத்து, உணவு பாதுகாப்புத் துறை அதிகாரிகள் விடுதிக்கு விரைந்து, மாணவிகளுக்கு வழங்கப்பட்ட உணவு மாதிரிகளை சேகரித்து ஆய்வுக்கு அனுப்பியுள்ளனர். விடுதியில் உணவு தயாரிக்கப்பட்ட இடத்தையும், பயன்படுத்தப்பட்ட பொருட்களையும் ஆய்வு செய்தனர். உணவு ஒப்பந்ததாரரின் அனுமதி காலாவதியாகியிருப்பதாகவும், தரமற்ற பொருட்கள் பயன்படுத்தப்பட்டிருக்கலாம் என்றும் கூறப்படுகிறது.

இச்சம்பவம் குறித்து மாவட்ட கல்வித்துறை மற்றும் உள்ளூர் நிர்வாகம் விசாரணைக்கு உத்தரவிட்டுள்ளன. பெற்றோர்கள் மற்றும் பொதுமக்கள் மத்தியில் இது பெரும் அதிருப்தியை ஏற்படுத்தியுள்ளது. மாணவிகளின் உடல்நிலை தற்போது நிலையாக உள்ளதாக மருத்துவமனை வட்டாரங்கள் தெரிவிக்கின்றன. இதுபோன்ற சம்பவங்கள் மீண்டும் நிகழாமல் இருக்க, உணவு தயாரிப்பில் கடுமையான கண்காணிப்பு மற்றும் தர நிர்ணயம் அவசியம் என பொதுமக்கள் வலியுறுத்தியுள்ளனர்.
 

இதையும் படிங்க: உச்சநீதிமன்ற தலைமை நீதிபதி பி.ஆர். கவாய் மருத்துவமனையில் அனுமதி..!