2 நாளில் 5,000 குழந்தைகள்! தாய்மாமன் தங்க மோதிரம் திட்டத்தில் வேகமெடுக்கும் விநியோகம்!

சென்னை: தமிழக அரசின் ‘தாய்மாமன் தங்க மோதிரம்’ திட்டத்தின் கீழ் தொடங்கிய இரண்டு நாட்களிலேயே 5,000 குழந்தைகளுக்கு தங்க மோதிரங்கள் வழங்கப்பட்டுள்ளதாக மக்கள் நல்வாழ்வுத் துறை அதிகாரிகள் தெரிவித்துள்ளனர்.

அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் இந்தத் திட்டம் செப்டம்பர் 28ஆம் தேதி மதுரை ராஜாஜி அரசு மருத்துவமனையில் தொடங்கப்பட்டது.

அரசு மருத்துவமனைகள் மற்றும் ஆரம்ப சுகாதார நிலையங்களில் பிறக்கும் குழந்தைகளுக்கு தங்க மோதிரம் வழங்கும் வகையில் இந்தத் திட்டம் செயல்படுத்தப்பட்டுள்ளது. திட்டத்தின் தொடக்க விழாவில் முதல்வர் விஜய் குழந்தைகளுக்கு மோதிரம் அணிவித்து திட்டத்தைத் தொடங்கி வைத்தார்.

இதையும் படிங்க: ‘தாய்மாமன் தங்க மோதிரம்’ விழா! உசிலம்பட்டிக்கு பதில் மதுரைக்கு இடம் மாற்றம்?! வெளியானது புதிய தகவல்!

முதல் கட்டமாக ஏராளமான தங்க மோதிரங்கள் கொள்முதல் செய்யப்பட்டு, மாநிலம் முழுவதும் விநியோகிப்பதற்கான ஏற்பாடுகள் செய்யப்பட்டிருந்தன. 22 கேரட் தரத்தில் ஒரு கிராம் எடையுள்ள மோதிரங்கள் தயாரிக்கப்பட்டு வழங்கப்பட்டுள்ளதாக தெரிவிக்கப்பட்டுள்ளது.

சென்னை உள்ளிட்ட பல்வேறு மாவட்டங்களில் உள்ள அரசு மருத்துவமனைகளில் இந்தத் திட்டத்தின் கீழ் மோதிரம் வழங்கும் பணிகள் தொடங்கியுள்ளன. மாநிலம் முழுவதும் 100-க்கும் மேற்பட்ட மருத்துவமனைகளில் திட்டம் நடைமுறைக்கு வந்துள்ளது.

திட்டம் செயல்படுத்தப்பட்ட முதல் நாளில் மட்டும் 3,300 குழந்தைகளுக்கு தங்க மோதிரங்கள் வழங்கப்பட்டன. தொடர்ந்து இரண்டாவது நாளில் மேலும் 1,700 குழந்தைகளுக்கு மோதிரங்கள் வழங்கப்பட்டுள்ளன. இதன் மூலம் இரண்டு நாட்களில் மொத்தம் 5,000 குழந்தைகள் திட்டத்தின் கீழ் பயனடைந்துள்ளனர்.

அரசு மருத்துவமனைகளில் கடந்த ஜூன் 22ஆம் தேதி முதல் திட்டம் தொடங்கும் நாள் வரையிலான காலகட்டத்தில் பிறந்த குழந்தைகளுக்கும் திட்டப் பயன் கிடைக்கும் வகையில் ஏற்பாடுகள் செய்யப்பட்டுள்ளதாக அரசு சார்ந்த தகவல்கள் தெரிவிக்கின்றன. இதற்காக பல மையங்களில் சிறப்பு ஏற்பாடுகள் மேற்கொள்ளப்பட்டுள்ளன.

தமிழகத்தில் ஆண்டுதோறும் சுமார் 7.80 லட்சம் குழந்தைகள் பிறக்கும் நிலையில், அரசு மருத்துவமனைகளில் 4.20 லட்சத்துக்கும் அதிகமான பிரசவங்கள் நடைபெறுவதாக கூறப்படுகிறது. இந்தத் திட்டத்தை செயல்படுத்த ஆண்டுக்கு ரூ.756 கோடி ஒதுக்கீடு செய்யப்பட்டுள்ளது.

தொடங்கிய இரண்டு நாட்களிலேயே 5,000 குழந்தைகளுக்கு மோதிரம் வழங்கப்பட்டுள்ள நிலையில், வரும் நாட்களில் திட்டத்தின் கீழ் பயனடையும் குழந்தைகளின் எண்ணிக்கை மேலும் அதிகரிக்கும் என எதிர்பார்க்கப்படுகிறது.

இதையும் படிங்க: தாய் மாமன் தங்க மோதிரம் திட்ட பணிகள் தீவிரம்! முழு வீச்சில் நடக்கும் பார்சல் அனுப்பும் பணி!