தாய் மாமன் தங்க மோதிரம் திட்டம்... யாரெல்லாம் இத்திட்டத்தில் பலன் பெறலாம்?... வெளியானது முக்கிய நிபந்தனை...!

தமிழக அரசு மருத்துவமனைகளில் பிறக்கும் பச்சிளம் குழந்தைகளுக்கு 1 கிராம் தங்க மோதிரம் வழங்கும் ‘தாய் மாமன் தங்க மோதிரம்’ திட்டம் மக்கள் மத்தியில் பெரும் வரவேற்பைப் பெற்றுள்ளது.

இந்நிலையில், இந்தத் திட்டத்தின் கீழ் பயனடைவதற்கான தகுதிகள், கட்டுப்பாடுகள் மற்றும் நிபந்தனைகள் என்னென்ன என்பது குறித்த முக்கிய விவரங்கள் வெளியாகியுள்ளன.

ஆண், பெண் என எந்தவிதமான பாலினப் பாகுபாடும் இன்றி எந்தெந்த குழந்தைகளுக்கு இந்தத் தங்க மோதிரம் கிடைக்கும்? என்னென்ன சான்றிதழ்கள் அவசியம்? என்பது குறித்து விரிவாக பார்க்கலாம்... 

இதையும் படிங்க: தாய்மாமன் தங்க மோதிரம் திட்டம்: விஜய் மதுரையை தேர்வு செய்தது ஏன்?... அமைச்சர் நிர்மல் குமார் சொன்ன முக்கிய தகவல்...!

தமிழக அரசின் ‘தாய் மாமன் தங்க மோதிரம்’ திட்டத்தின் கீழ், மாநிலத்தில் உள்ள அரசு ஆரம்ப சுகாதார நிலையங்கள், வட்டார மருத்துவமனைகள் மற்றும் அரசு மருத்துவக் கல்லூரி மருத்துவமனைகளில் பிறக்கும் குழந்தைகளுக்கு மட்டுமே 22 கேரட் தூய்மையிலான 1 கிராம் தங்க மோதிரம் வழங்கப்படுகிறது.

தனியார் மருத்துவமனைகளில் பிறக்கும் குழந்தைகளுக்கு இந்தத் திட்டம் பொருந்தாது என்பதும், தனியார் மருத்துவமனையில் பிறந்து பின்னர் அவசர சிகிச்சைக்காக அரசு மருத்துவமனையின் பச்சிளம் குழந்தைகள் பிரிவில் அனுமதிக்கப்படும் குழந்தைகளுக்கும் இந்தத் தங்க மோதிரம் வழங்கப்படாது என்பதும் குறிப்பிடத்தக்கது.

இந்தத் திட்டத்தில் பயனடைவதற்கு ஆண் குழந்தை, பெண் குழந்தை என்ற எந்தவிதமான பாலின வேறுபாடும் கிடையாது. அதேபோல், பெற்றோரின் ஆண்டு வருமானத்திற்கும் எந்தவிதமான வரம்பும் நிர்ணயிக்கப்படவில்லை.

குடும்பத்தின் வருமானம் எதுவாக இருந்தாலும், அரசு மருத்துவமனையில் பிரசவம் மேற்கொள்ளும் அனைத்து தமிழகக் குடும்பங்களும் இந்தத் திட்டத்தின் பலனைப் பெற முடியும்.

மேலும், முதல் குழந்தை, இரண்டாவது குழந்தை என குழந்தைகளின் எண்ணிக்கையிலும் எந்தக் கட்டுப்பாடும் விதிக்கப்படவில்லை.

இருப்பினும், இத்திட்டத்தின் கீழ் பயன்பெற சில முக்கிய நிபந்தனைகள் விதிக்கப்பட்டுள்ளன.

குழந்தையின் பெற்றோர் தமிழ்நாட்டைச் சேர்ந்தவர்களாக இருக்க வேண்டும் என்பதால், குடும்ப அட்டை, அடையாளச் சான்று அல்லது இருப்பிடச் சான்று ஆகியவற்றில் தேவையான ஆவணங்களைச் சமர்ப்பிப்பது அவசியமாகும்.

மேலும், கர்ப்பிணித் தாய்மார்கள் தமிழ்நாடு அரசின் PICME அமைப்பில் கண்டிப்பாக முன்பதிவு செய்து, RCH அடையாள எண்ணைப் பெற்றிருக்க வேண்டும்.

உயிருடன் பிறக்கும் பச்சிளம் குழந்தைகளுக்கு மட்டுமே இந்தத் தங்க மோதிரம் வழங்கப்படும் என்பதும் அரசின் வழிகாட்டுதலில் தெளிவுபடுத்தப்பட்டுள்ளது.

ஏழை, எளிய குடும்பங்களுக்கு பெரும் உதவியாக இருக்கும் இந்தத் திட்டத்தின் கீழ் பயன்பெற, கர்ப்ப காலத்திலேயே அரசு அமைப்புகளில் முறையாகப் பதிவு செய்து, தேவையான ஆவணங்களைச் சமர்ப்பித்து தங்களுக்கான உரிமையைத் தாய்மார்கள் உறுதி செய்து கொள்ளலாம்.

இதையும் படிங்க: இடதுசாரியா..? வலதுசாரியா..? தவெக சித்தாந்தம் என்ன.? குறிவைத்த M.P. சுப்பராயன்..!!