திருப்பூரில் பாய்லர் வெடித்து விபத்து..! 9 பெண்களுக்கு சிகிச்சை... பரபரப்பு..!!
திருப்பூரில் பாய்லர் வெடித்து ஏற்பட்ட விபத்தில் ஒன்பது பெண்கள் மயக்கம் அடைந்து மருத்துவமனையில் அனுமதிக்கப்பட்டுள்ளனர்.
by
திருப்பூர் அருகே தனியார் பனியன் நிறுவனத்தில் பாய்லர் வெடித்து விபத்து ஏற்பட்டுள்ளது. திருப்பூர் மாவட்டம், பல்லடம் அடுத்த அருள்புரத்தில் செயல்பட்டு வரும் தனியார் பனியன் நிறுவனத்தில் பாய்லர் பலத்த சத்தத்துடன் வெடித்ததில் பரபரப்பு ஏற்பட்டது. இந்த விபத்தில் அதிர்ச்சியடைந்து மயக்கமடைந்த 9 பெண்கள் மருத்துவமனையில் அனுமதிக்கப்பட்டுள்ளனர். மதிய உணவு இடைவேளையின்போது சம்பவம் நடந்ததால், பெரும் உயிர்ச்சேதம் தவிர்க்கப்பட்டதாக கூறப்படுகிறது.
அருள்புரம் பகுதியில் செயல்பட்டு வரும் அந்த தனியார் பனியன் நிறுவனத்தில் தமிழகம் மட்டுமின்றி வட மாநிலங்கள் மற்றும் தென் மாவட்டங்களைச் சேர்ந்த 500-க்கும் மேற்பட்ட தொழிலாளர்கள் பணியாற்றி வருகின்றனர். வழக்கம்போல் தொழிலாளர்கள் பணியில் ஈடுபட்டிருந்த நிலையில், மதிய உணவு இடைவேளையின்போது நிறுவன வளாகத்தில் இருந்த பாய்லர் திடீரென பலத்த சத்தத்துடன் வெடித்தது.
பாய்லர் வெடித்த சத்தம் நிறுவன வளாகம் மற்றும் சுற்றுப்புறப் பகுதிகளில் பெரும் அதிர்வை ஏற்படுத்தியது. இதனால் அங்கு இருந்த தொழிலாளர்கள் அச்சமடைந்து அலறியடித்தபடி வெளியேறினர். திடீர் சத்தம் மற்றும் ஏற்பட்ட அதிர்ச்சியின் காரணமாக 9 பெண்கள் மயக்கமடைந்த நிலையில் மருத்துவமனையில் அனுமதிக்கப்பட்டனர். சம்பவம் குறித்து தகவல் அறிந்ததும் போலீசார் சம்பவ இடத்துக்கு விரைந்து சென்று விசாரணை மேற்கொண்டனர். பாய்லர் எந்த காரணத்தால் வெடித்தது, அது முறையாக பராமரிக்கப்பட்டதா, பாதுகாப்பு விதிமுறைகள் பின்பற்றப்பட்டனவா, பாய்லரை இயக்குவதற்கான தொழில்நுட்ப ஆய்வுகள் மேற்கொள்ளப்பட்டிருந்தனவா என்பன உள்ளிட்ட பல்வேறு கோணங்களில் விசாரணை நடைபெற்று வருகிறது.
இதையும் படிங்க: கொளத்தூர் MLA V.S. பாபு உடல்நிலையில் முன்னேற்றம்..! மருத்துவமனை நிர்வாகம் தகவல்..!!
மேலும், நிறுவனத்தில் பணியாற்றும் தொழிலாளர்களின் பாதுகாப்புக்காக தேவையான முன்னெச்சரிக்கை நடவடிக்கைகள் மேற்கொள்ளப்பட்டிருந்தனவா என்பதையும் அதிகாரிகள் ஆய்வு செய்து வருகின்றனர். பாய்லர் அமைந்திருந்த பகுதி, அதனைச் சுற்றியுள்ள கட்டமைப்புகள் மற்றும் விபத்தால் ஏற்பட்ட சேதங்கள் குறித்தும் அதிகாரிகள் பார்வையிட்டனர்.
மருத்துவமனையில் அனுமதிக்கப்பட்ட 9 பெண்களின் உடல்நிலை குறித்து மருத்துவர்கள் தொடர்ந்து கண்காணித்து வருகின்றனர். அவர்கள் அதிர்ச்சியால் மயக்கமடைந்ததாக முதற்கட்ட தகவல்கள் தெரிவிக்கின்றன. அவர்களுக்கு தேவையான சிகிச்சை அளிக்கப்பட்டு வரும் நிலையில், போலீசார் சம்பவம் தொடர்பாக வழக்குப் பதிவு செய்து விசாரணையை தீவிரப்படுத்தி உள்ளனர்.
இதையும் படிங்க: கோவில் திருவிழாக்களில் யானைகள்..! வழிகாட்டு நெறிமுறைகள் எங்கே.? ஹை கோர்ட் உத்தரவு...!!
